ESTAR 8 - OTSAO BAIBEL (BSI)

Judah Khünakbu ang Alünle Azan angkya Kaxkox

¹ Ija nyix-nyix wüi wanghompa-e, Judah nok zanpa Haman angkya tuina komkaile Estar ang kox. Estar-e wanghompa hama Mordekai a she zongto hopachong changpule ngai. Ija nyix makhange Mordekai a wanghom ngwotnui to dong ang kox.

² Chixe Haman angkya achatle laxkya münwan füikya chix khoptüt alailaxle Mordekai ang kox. Estar-e Mordekai a Haman tuina to hu-mix ang kam.

³ Ifüima Estar-e wanghompa füi anaolechu zangwün. She chix chitong to tswonle awütle sop. Agag sasün Haman-e Judah nok zongto chichangkya mongjang zingle toxdaokya bama ija abax angkya mwot mok angkya wüi changle le akax.

⁴ Wanghompa-e hun khoptüt she hato thüile-kox, ikhoma she ajong üntoxle akax,

⁵ “Chongwangpa, ija füi nang mongmüikya jangtüiba, nange kutüi texkya jangtüiba üntoxle nang zongma ija suüi ningle jangtüi thüiningle, Agag sixli Hammedatha sasün Haman-e, kaxtom oja, ija wangting angkya Judah nok komle lang angkya bama apukdaopuix, ija mwot chimok angkya bama khuapukox.

⁶ Kwom khünakbu hato iningkya thama hüilaxle ku füikya ma-mixbu langle changkya kue chemle adu thoüi?”

⁷ Wanghompa Sarkses-e Judah khünak Mordekai hia wangcha Estar hokhi ang thüi: “Hulax, Judah khünakbu to ile mok ang tungkya khoma kue Haman afünle langdaoa.

⁸ Ikoxlechu wanghompa mün ma chix shin füi top laxle apukdaokya kax a chatle anongle lax ang müntho. Ikoxlechu hünzome Judah khünakbu hato chemle zase tsupuix ile laiza afan ang tsuak; ilaxle ija hünzome ku münwan top laxle ku mün ma za ang tsuak.”

⁹ Ija a lyetnukua azom, Siwan lyetnu ma nyixtsa-azom lükya to ile chang. Mordekai-e wanghompa chakzamixbu nyak ilaxle Judah khünakbu hato apuk angkya laiza hwome za ang tun ma akaxle kox. Ija laiza a India hia Etheopia nyi zo ma tüikya 127 tingnu-noksabu angkya gowarnorbu, pünpa-chongwangbu üntoxle chu okax-okhobu pangwüi hato apuk angkya changkya.

¹⁰ Mordekai-e ija laiza wanghompa Sarkses mün ma zale lax. Chixe ibu to wanghom münwan top. Ibu a wanghom man pom angkya sümomle ziktsuakkya manbu khoma ngalaxle afan.

¹¹ Ija laiza ma wanghompa-e Judah khünakbu a tingnu pangkha towüi ma khose angkya hanpakma tusox zing ang tsuak angkya kax zale kox. Wangting tüta khato wüi changlax, chang-pax füikya khünakbue Judah nok, naosom hia shekobu to single jangchang thüiningle, hwome alünle ajong üntoxle hwom to singkya zanpabu amüt ang tsuak. Hwome khünak ibu akiakya mix to lünle mik amüt laxle hwom tuina lax ang tsuak.

¹² Ija wang-kaxfün a Parsia haxtok pangnu khato wüi hwom lang angkya hex-ole hanpak tyale thomkya nyix, lyetnu kua tsa lükya Adar lyetnu 13 nyix kha asu.

¹³ Ija a wanlom tuita ningle apuk angkya oli ang achang, Ija a angkya wangtsak ting pangnu khato wüi apuk angkya oli, ikoxtix hanpak nguikya zuma Judah khünakbu ma khose ang achwon ang thoüi.

¹⁴ Wanghompa kaxtom ma kaxho mixbue mankho ma ngalaxle akhangle apuk angkya ang chang. Ija wang-kaxfün a, pongwün tingnu Susa ma noknu hato apuk.

¹⁵ Mordekai wanghomkha angkya laile pao. Chixe hingkya hia tsekya wanghom za-pua laxlaxle tamchu baxnat nyinu hia osün müikya hun khohom laxlaxle tüikya. Susa tingnu angkya tingjang lomnu mongmüi-pwonla tungle akhongkyae awang.

¹⁶ Ikhama tüikya Judah khünakbue zan to anaokya khangkho zangngai to mongmüi tungle pwonla dongkya tüikya.

¹⁷ Wanghompa-e apukkya kaxho ojongpang to epuix, ibu haxtok pangkha towüi Judah khünakbue mongmüi tungle fongkhale nui. Otsingtsingma, athax khünakbu hwom thua zalaxle huanuma Judah khünak ang achangle hüi.