ESTAR 5 - OTSAO BAIBEL (BSI)

Estar-e Wanghompa hia Haman nyi Fongsax ang se.

¹ She-e chisax-chilingle atsaole zangjopkya nyix azom lükya to Estar, wangcha za-pua lax üntoxle khwa omong tokya nui ma wanghompa tüntong tunthoma ajong. Wanghompa a homkha ma tüikya. Chix a fülom chito hule ma tüntong ma thungle tüikya.

² Chemtue wanghompa-e nuitho ma Estar ajongle ngokya ngünle laxpuix, she-e chix chingcha kop ang tho ilaxle chixe chix chak angkya hun khoptüt she hato thuile kox. She hüilaxle ija füi tun apong.

³ Wanghompa-e atüi: “Wangcha Estar, ija a chem? Nange chem laxse hex tsupuix ija nange kopüi: ku haxtok süifi laxse thüikoxchu koxüi.”

⁴ Estar-e lan: “Nang mong jangmüi thüiba, O wanghompa, kue fongkhale achwon ngokya fongsax ang aja Haman hünkhi hom to nam-nguibae le texpu.”

⁵ Ikhoma wanghompa-e, Estar hom to fongsax ang pao angkya hanpakma achwon laxle chwonle ngui angkya Haman ang kaxkox. Ile wanghompa hia Haman nyi Estar hom to fongsax ang ngui.

⁶ Jutok laxle wanghompa-e Estar ang thüi: “Nange chem laxse texpuix ku hama akaxlax, nange ija kopüi. Ku wangting süifi changkox-ngaxchu kopüi.”

⁷ Estar-e lan,

⁸ “O wanghompa, kue chem jupuix ija kox ang nang mongtsukya jangtüi thüiningle, ngaija chuwüi Haman hünkhi pangnyi ikhato fongsax ang nguikoxle müisele texle. Ipongma kue chem laxse tsupuix ija kue nang hama akaxüi.”

Haman-e Mordekai Lang ang Tung

⁹ Ija fongsax üntoxle laile paopongma Haman a mongmüimüile tüikya. Ikoxlechu chemtue chixe wanghom homtho ma Mordekai ngünle laxpuix chix ang tüle mongtsik chemthüikoxle chix le pongma chix chathua zakya ahole Mordekai ajong laxle shwomle chichang.

¹⁰ Ikoxlechu chix lailai to adu-laxle hom to chat. Chixe chix hom to hozuibu se ilaxle ikhato chix kako chuwüi wom ang tom.

¹¹ Chixe ma ma tüikya tuinabu, su-sabu, wanghompa-e chix khwa ma achongkya mix ang zingkya, ilaxle chix a mama nguakax-wangkhobu füi chemtukuxle achongkya mix changpuix, ibu bama tüle tsaichong-kaxbongle akax.

¹² Ibu thak to Haman-e thüi: “Wangchanu Estar-e wanghompa kukhi boma she hom to fongsax ang owachu chise; kukhi a ngaija chuwüi sele tüile.

¹³ Ikoxlechu ija Judah sün wanghom homtho ma ajongle ngün-ngokya kople ku zongto ibu chem angchu münchang.”

¹⁴ Ikhoma chix kakonu hia hozui hwome mongkho adünle thüi: “75 fit tsuakya dangzembu büthüikoxle chizingpu? Ngainop ima Mordekai takle lang angkya tsaiju-kaxjule mwottsuak üntoxle khangkho chazangle fongsax ang paotsuaküi.” Haman-e ija a müikya olom changpule thüt üntoxle dangzembu zingle achwon.