EFISIA 5 - OTSAO BAIBEL (BSI)

Zangngai ma Ngokya

¹ Hünzom a Zange mongkünkya chix susabu daile, hünzom a chix lailai le ngo ang azong angkya changle.

² Khrista-e kem to mongkün ilaxle kem kuxma Zang mongzom amüile chix tsün ongan müile ngankya münga ningle tökya ma kox. Ija lailaile kem tsün a mongküne akox-akomle ngo angkya changle.

³ Hünzom a Zang khünaknu changkya daile, tüta ningkya chinunchakkai chichangba chitsao chithakya chichangba osing nüfux chemchu hünzom khama bwomle wün ngo angkya jaojao münchang.

⁴ Tamchu tsaima kaxshix, kaxbi ngaoba, chichangba wünle chingo homfang zangwün hünzome wün ngo angkya ojao münasu.

⁵ Chemthüikoxle chinunchakkai khünak, chitsaokya mix chichangba chapa shwomkya mix opupuechu Khrista hia Zang Wangting ma wom ang müntsuaküile hünzome awanle ngopu.

⁶ Ongat zangwünbu makhange owaechu nang dyen ang taxkox; ija khokhoma chix kax ma chilaxkyabu hato Zang mongtsik nguiüi.

⁷ Idaile iningkya khünakbu füi ojao taxtom.

⁸ Hünzom jaojaochu zangnak to ngokya, ikoxchu hünzom Zang khünaknu ang achangkya füi tomle, hünzom zangngai ma tüile. Idaile hünzome a zangngai khünakbu ningle saxmok angkya changle.

⁹ Chemthüikoxle müikya Otsao Chasa ilaxle otsingtsing oli pangwüi a zangngai oziak changle.

¹⁰ Jowanpa mong amüi angkya oli awanle kop ang azonglax.

¹¹ Zangnak kux, oja lap chemchu chitüi angkya khünakbue mokpuix, hünzom ibu füi ojao taxtom. Itülüi ibu zangngai to alaikox.

¹² (Huxsa ma zuile hwome mokkya mwot mo wün angkya tuita thünzak changle).

¹³ Üntoxle otue abakle zangngai to alai üihex, izuma hwom chemle hex ija komle angaile;

¹⁴ chemthüikoxle oja tsaotha le angaipuix, ija zangngai ang achangle. Idaile ile akaxkya tüile, “Jiple ngokya mix, zolax; üntoxle zi ngoünkya zolax, üntoxle Khrista-e nang to nyanüi.”

¹⁵ Idaile nang chemle ngopuix, ija bama khünkhi lax. Hwon-je chizaikyabu ningle taxngo, ikoxle je-tüi hwonlangkyabu ningle ngolax.

¹⁶ Hanpak omüi pangwüi sünle koplax, chemthüikoxle idu a chimüikya hanpak zanghanbu changpu.

¹⁷ Ongat ang taxchang! Ikoxle Zange nang ang chem naxmok le textüipuix, ija lomle shongkoplax.

¹⁸ Hünzom olithu angkya jue nang to taxtok; itülüi Chasae awangle ngolax.

¹⁹ Tata füi münchuak tsai, zangshwom tsai ilaxle otsao tsai makhange zangwünkox; Jowanpa ang hünzom mong ma achuakkya füi zangshwom tsai hia münchuak tsai ngaokox.

²⁰ Kem Jowanpa Jisu Khrista mün ma, Hopa Zang ang pangnu li towüi jento mongmüikya münchong fakox.

Kakonu üntoxle Kakopa

²¹ Jisu Khrista chathua zakya khoma hünzom tata tong to puinai le tüilax.

²² Kakonu, Zang tong to puikya ningle ma kakopa tong to puinai lax.

²³ Chemthüikoxle chemle müimüithom thakma apün-awang angkya Khrista ma zong tüipuix üntoxle chemle chix a ma tsangtsa tuita müimüithom zongto khosünpa hex, ilailaile kakopa ang ma kakonu thakma apün angkya zong tüile.

²⁴ Idaile müimüithome ma chemle Khrista tong to koxpuix, ilailaile kakonubue ma kakopabu tong to koxle thom angkya changle.

²⁵ Khrista-e chemle müimüithom to mongkün ilaxle ija hanpakma chemle chix tsün koxpuix, ilailaile kakopabue ma kakonubu to mongkünkox.

²⁶ Tima sole atsaokya füima chix kax makhange müimüithom a Zang ang atsaole kox angkya kuxma chixe ija mok.

²⁷ Ikoxletix müimüithom tuita chixe ma ang ija sünmüimüi ma komle, tsaotha le ilaxle thaikya ojao chitüi le, ofwot chichangba münwan chemchu chitüi chichangba münasu le thüi angkya chingui-chiwangkya chemchu chitüi le koxtsuaküi.

²⁸ Ma tsangtsa to otukuxle künpuix itukuxle kakopabue ma kakonu to mongkün angkya changle. Owae ma kakonu to mongkün puix chixe ma to mongkünpu.

²⁹ Ma tsangtsa to owaechu münanu. Itülüi, Khrista-e müimüithom to mokkya ningle, chixe ija tuxtsom ilaxle apu-achangle;

³⁰ chemthüikoxle kem a chix tsangtsa ma womle tüikya mik-chakbu changle.

³¹ Otsao Lai ma akaxle tüikya ningle: “Ija khoma lüka tuitae chix honu hia hopa danle toxüi ilaxle chix kakonu füi notomle ngoüi, ilaxle hokhi anyi tuita ang achangüi.”

³² Ija Otsao Lai kax ma angaikya huxsa zangwün a chongkya changle. Ikoxlechu kue Khrista hia chix müimüithom bama wünkya changpu.

³³ Ikoxlechu ija hünzom hanpakmachu wüi changle; kakopabu noke wüi ma pum-tsa bütukuxle ma kakonu to mongkün angkya changle, ilaxle kakonu noke ma kakopa chathua za ang