EFISIA 4 - OTSAO BAIBEL (BSI)

Tsangtsa ma Notom

¹ Jowanpa mwot mok angkya khoma tuita kople thomkya mix, kue hünzom ang thüipu: Chixe hünzom nyak pongma tyale thoptox daokya chifün füi asule hünzom ahamkox.

² Othuithuima puinaikya, somdangkya, ilaxle adukya tüikox. Tata füi adukya tokhange hünzome künkak mongkün ahokox.

³ Hünzom tuita ang achangle kha thomkya mongsom makhange Chasae fakya notom sünle thom angkya bama tsuakkya apongle azongkox.

⁴ Monghom oja hato Zange hünzom nyak daopuix, ija lailaile tsangtsa üntoxle chasa a tuita wüi.

⁵ Jowanpa tuita, mongong tuita üntoxle baptikya tuita;

⁶ pangnu hopupa, pangnu makhange mwot mokkya, ilaxle nok ma wüi ngokya Zang üntoxle Hopa tuita wüi changle.

⁷ Khrista hingho thathüt ma thütlaxle kem pangnusa ang wüi chingcha kox.

⁸ Otsao Lai-e akaxkya ningle, “Otue chix ding to dongpuix, kople thomkya huanuma laxlax tox; chixe khünaknu ang hingho tüle kox.”

⁹ Athax “Chix ding to dong”, le chem ang thüi? Ija a pongwang ma chix chaxwannu tüle zukya khato shongju kopkya kax changle.

¹⁰ Ikhoma zangfang abakle chix ngokyae awang angkya hanpakma zangkangting to ilaxle owa ija akaile dongpuix, fang to jukya mixchu chix wüi changpu.

¹¹ “Khünakbu ang hingho kox”, le thüikyachu chix changpu; chixe züizüi wangshembu ang, züizüi ajebu ang, mamabu a kaxho apuk angkyabu ang, mamabu a chunnyetmixbu ang üntoxle nwotmixbu angle kam.

¹² Khrista tsangtsa zing angkya bama Zang khünakbu pangnu wüi khristan mwottho ma mok ang acha-achwon angkya kuxma chixe ija mok.

¹³ Ikhoma kem pangnusae wüi Zang Hosa awan ang kopkya kem mongong hia hwon-je tuita hato kem pangwüi hüi angkya changle; Khrista jaopo hato alople kem tsong angkya changle.

¹⁴ Ifüima kem, mae zingle alaikya tsingtsang othai hato mix zunle ngokyabu odyen khünakbu hwon-nwot tichape laxlax tox angkya ilaxle zangwin to lexlexchex le jeple paongo angkya athax kem a naosom münchang.

¹⁵ Itülüi, mongkün ma kaxtsing akaxkya füi, kem okhang Khrista ma, pangnu lom ma kem tsong angkya changle.

¹⁶ Chixe akumathum laxle tix tsangtsa ma tüikya malomlom athut apongle ngotsuak pu, ilaxle koxle thomkya opong ozitbue tix tomplo jaojao tuita ang achangle kople thompu. Idaile otue malomlom tüikya mik-chak mamwot mwot chemle mokse hex ile jangmok thüikoxle, tsangtsa komle tsongle ilaxle mongkün makhange ma alüile zingle tsuakle.

Khrista ma Tsün Hozün

¹⁷ Jowanpa mün ma kue hünzom zünpu: Tutex ma laxli chitüi ilaxle küntex mongjang ma zangnak to ngokya songsaribu ningle hünzom taxngo.

¹⁸ Zange fakya tsün ma hwom hak angkya jao münchang, chemthüikoxle hwom a ojao chitsing chiwan ilaxle kheba chithüikyabu changle.

¹⁹ Hwom ma thünzak lili ojao müntüi; hwome ma alüile müi-hi-aji mongzom müikya oma mwot mok ang abaxkya jao chitüi le koxthom daoa.

²⁰ Khrista bama hünzome awanle laxkya a ija münchang!

²¹ Hünzome chix bama atat jaojao daoa, ilaxle chix mantokyabu ningle Khrista ma tüikya otsingtsing hünzom hama anwot-ano daoa.

²² Hozang tsün oja dyen-nganse le tsukyae amütle thomtüi puix, ojae nang ami pongkya ningle ngo ang tompuix, ija tsün hozang füi atsailax.

²³ Nang mongtsang hia küntex mongjangbu hozün ang achang angkya wüi changle,

²⁴ üntoxle Zang lailaile zinglaxle otsingtsing, müikya hia otsao ma ngaile ahokya mixsün ang achanglax.

²⁵ Ifüima atsekya taxtüi! Pangnusae tomzi füi kaxtsing akax angkya changpu, chemthüikoxle kem a noknusa wüi Khrista tompo ma womkyabu changle.

²⁶ Nang ang mong jangtsik thüikoxle, ija nang mongtsike nang ochax to zun ang taxtom üntoxle han ahomle mongtsik ma taxngo.

²⁷ Nange haxshix ang chakba taxfa.

²⁸ Ahux mixe mix tsangtse le saxkya dandao, ilaxle mae otya ma saxlaxle ngo ang tsuakkya boma chitüi chinang to asun ang tsuakkya lima mwot mok ang sütkox.

²⁹ Nang kax füi, atatkyabu fün amüi angkya hanpakma mix zongto kak angkya zang taxwün, itülüi mix to juafong angkya oli kaxzex zangwünkox.

³⁰ Üntoxle Zang Otsao Chasa mongtsik ang taxtom; chemthüikoxle Otsao Chasa a khosün nyix hanpakmale Zange nang to hopunu münwan chix shintop le thomkya changle.

³¹ Khüt-kopkyabu pangnu, mongtsik hia mongma, ibu füi atsaile ngolax. Akhong-akhakya chichangba adix-adakya tamchu miktsak mongngwom chemchu taxtüi.

³² Itülüi Khrista makhange Zange hünzom ang thailak koxkya ningle tata zongto chingchajaja hia jonai ma ngolax.