DANEL 6 - OTSAO BAIBEL (BSI)

Mailang Kun Khato Danel

¹ Dairas-e chix wangting pangnukha to ole apün angkya hanpakma Gowarnorbu süntsa kam angkya mongzangwünle tsuak.

² Ija to nüile chixe Danel hia hozui mixsün anyi a ibu Gowarnor hwom to tsa-ngaole chang angkya hia wanghompa mongtex mwot mok angkya pangwüi olom adangle fa angkyabu ang achang.

³ Lebama wüi Danel-e hozui hwom hia mama Gowarnorbu pangwüi füi ataxle müile mokle tsuakkya aho. Chix ma tsing-wankya huanuma tüikya ngünlaxle, wanghompa-e chix a wangting pangwüi to hu angkya hünlit kox.

⁴ Ikoxle mama lompa hia Gowarnorbue Danel mwot ma thaikya opong atak angkya hanpakma azong, ikoxlechu hwome chiataktsuak, chemthüikoxle Danel a noke mongongle tüikya tamchu thaikya hia chisukya oli chemchu chimokkya mix tuita chang koxle.

⁵ Hwome tata füi zangwünle thüi: “Zanglom füikya mwotlom male wüi chichang jangthüi keme Danel thaikya olom atak ang müntho angkya changle.”

⁶ Ikhoma hwom wanghompa füi apong ang ngui ilaxle akax: “Wanghompa Dairas, nange tsünlo-zaknuile apün-awangle naxchang!

⁷ Kwom opange nang zangshwom-hom ma thothale tüipuix: alixachongbu, Gowarnorbu, ifang angkya Gowarnorbu, tamchu mama okax-okhobu pangnusae notom laxle: nange noknusae wüi ija kax ma chilaxle chitüi angkya oli kaxtom tuita koxkoxle müi angkya changa lükya zangwün füi kwom nguipu. Hanpak nyix tsübün hanpak mongma khünak owaechu nang ma jukya boma tata ma chichangba owawa baozang ma chemchu ju-lomle chichang angkya nange kaxtom tuita laxkox. Ija kax ma chilaxkya mix owawa jangtüi, chix a mailange awangle tüikya tswomkha to adütüi.

⁸ Ikhoma lai ma zalaxle ija to nange sohi shingle ija kax jangapuk, ija a Medi hia Parsia haxtok ma tuita achat ang chithokya chongkya wanlom ang achangle paoüi.”

⁹ Ilaxle wanghompa Dairas-e ile kaxtom laiza to sohi shingle apao.

¹⁰ Chemtue Danel-e ija kaxtom laiza to wanghompa-e sohi shingle changdaoa le awan ang koppuix, chix hom to chat. Chix hom homdingkho angkya nui ma Jerusalem chito thale thangmikbu tüikya. Ikhato chixe mokzaikya ningle, thangmik ibu daple koplaxle chixe hanpak to othom azom pong ma chikux thongle Zang to zangjop.

¹¹ Chemtue Danel zanpabue, chixe ile zangjople changkya ngünle laxpuix,

¹² Danel-e chix kaxtom kax ma chilaxle thaikya kaxhux fe ang hwom pangwüi wanghompa hato ngui. Hwome thüi: “Wanghompa, nyix tsübün mong ma, nang ma ju-lomkya boma khünak owaechu tata ma chichangba owawa baozang ma tütali ju-lomle chichangüi, ilaxle owawae ija kaxtom kax ma chilaxle jangtüi, ija khünak a mailangbue awangle tüikya tswon to adütüi lükya kaxtom laiza to nang sohi shing laxle afanle changpu.” Wanghompa-e lan: “Changle, ija a owaechu chite angkya kaxtom tuita changpu; Mede hia Parsia wangting ma ija owaechu achat ang müntho.”

¹³ Ifüima hwome wanghompa ang thüi: “Danel, Judah nok zanda tuita, chixe ija nang kaxtom kax ma chilaxle tele. Chixe hanpak to othom azom pongma jao zangjople.”

¹⁴ Chemtue wanghompa-e ija kax atatpuix, chix ang tüle mongma ilaxle tsuakkya tukuxle Danel khose angkya olom lom. Chixe olom atak angchale lomle han ahomle tan.

¹⁵ Ipongma Danel zanpabu tamchatle nguilaxle wanghompa ang thüi: “Wanghompa nange awan ngopu, Mede hia Parsia nok ma wanghompa-e kax koxle apaodaokya zangwün otuechu achat ang müntho.”

¹⁶ Ikhoma wanghompa-e Danel a mailange awangle tüikya tswon khato tswonle awüt angkya kax kox. Chixe Danel ang thüi: “Nange owa to mongpak fünthole koxle shwomle ngopuix, ija nang Zang-e nang khosünle naxchangfa.”

¹⁷ Ija tswon ka longnu tuita füi hakle tüikya, ija longtok ma wanghompa-e chix shin top ilaxle chix nguawang hwom shin tople tox, ija a owa nguilaxle chu Danel khosün ang chitho angkya hanpakmale changkya.

¹⁸ Ifüima wanghompa a chix homlo to chat ilaxle, chemchu chisax chilingle zang angaile mik azangle ngo.

¹⁹ Zangngai sheme wanghompa a ija tswomkha hato nonokhaile pao.

²⁰ Chemtue chixe ijakha aloppuix, chixe künsum-mongtui le nyak: “Ozün ma tüikya Zang dapa, Danel! Mailangbu chak tokya nang, nange mongbakle koxle shwomle ngokya Zang-e nang khosünle tüilaxma?”

²¹ Danel-e lan: “Wanghompa, nang tsünlo-khothole ngohüi!

²² Ku to chitsüt angkya hanpakma mailangbu tun hux ang Zang-e chix kaxtaimix tsanle ajole. Chixe ija a, ku ma oma chemchu chitüikya mix tamchu nang zongto oma chemchu chimokkya mixle tsing laxle ile mokpu.”

²³ Wanghompa ang tüle mongmüi ilaxle ija tswomkha tokya Danel alai angkya hanpakma kax kox. Hwome chix dokle alai ikoxle chix to makman ojao chibang, chemthüikoxle chixe Zang to mongong thomkoxle.

²⁴ Ifüima Danel mik amüt ang atsingle kaxhux fekya khünakbu pangwüi kop angkya hanpakma wanghompa-e kaxkox; ibu a chixe hwom kako naosom hwom pangwüi füi tomle mailangbu tüikya ija tswomkha to tswonle awüt. Hwome hax ngaxchu makopba bawa towüi mailangbue hwom hale koplaxle zabu bakle apak-akhix.

²⁵ Wanghompa Dairas-e zangfang angkya onok hia jat-li pangwüi hato laiza ile afan: “Pangnusa ang salam!

²⁶ Ku wangting angkya khünak noknusae Danel-e shwomkya Zang chathua zale chang angkya kaxtom koxpu. “Chix a ozün ma tüikya Zang changle, ilaxle chixe jento apün-awangle ngo angkya changle. Chix wangting a chemtuechu münamütüi, ilaxle chix tsak-zong ma oshuk müntüitoxüi.

²⁷ Chixe khosünle tamchu kho-awale; chixe ding-hi-hax nyi bama ohünotün hia khosam fang mwotbu mokle. Chixe mailangbue sax ang chitomle Danel khosünle kople.”

²⁸ Danel a Dairas hia Parsia nok Sairas nyie apünkya tuk ma tüle alua-awangle ngo.