DANEL 5 - OTSAO BAIBEL (BSI)

Belshazzar Püntuxkya

¹ Wanghompa Belshazzar-e ja tuita nguakax-wangkho hwom hajat tuita jao fongsax ang se, ilaxle hwome tomwüi saxlingle chang.

² Hwome saxlingle ngopongma, Belshazzar-e hopa Nebukadnezar-e Jerusalem Zangshwom-Hom angkya apüilaxle thomkya hun hia khop wansa hia khup, ibu apüi angkya kax kox.

³ Lebama wüi hun wansa hia khup ibu apüi, ilaxle hwome ibu ma ju lingle chang

⁴ ilaxle hwome hun, khop, janjong hia jan, pün ilaxle long, ibu füi zingkya baozangbu to hwome shwom.

⁵ Allele khünak chaktho tuita lai ilaxle ija wanghom homlo katuk ma za ang süt; ikhama wüntik chuakkyae zang ngaile tüikya. Ilaxle wanghompa-e katuk ma zale ngokya ija chaktho ngünle lax.

⁶ Chix thün huishole chang ilaxle huanuma abüt-abanle changkya khoma chikux ngaxchu anyonle süt.

⁷ Jenu-shipa, opa-nanpa hia mama hinghai twon mankya khünakbu apüi angkya hanpakma owawa sele chix akhong. Chemtue hwom hommong to dongle hüipuix, wanghompa-e hwom ang thüi: “Owawae ija chakza e ang tho ilaxle ija chem hanpak hex, ija ku hama wünle fa ang thokya mix ang kue wanghom zapua nyikhik koxüi awunle koxüi, chix achuakle dingkux ma hun lik alikle koxüi, ilaxle chix a ku wangting ma apün ang, ku fang angkya azom lükya ang laxüi.”

⁸ Nguakax wangkhobu thochito hüi, ikoxle hwomkha angkya owaechu ija zale tüikya e ang chitho chichangba ija chem hanpak hexle wünle fa ang chitho.

⁹ Chix mongma laxle Belshazzar a sisile thün hüile pao, ilaxle ikhama tüikya nguakax wangkhobue chemle hwonüi khosam ma tang.

¹⁰ Wangcha hotatüi hia nguakax-wangkhobue, wanghompa-e kaxzing alaikya atat ilaxle fongsüt nui to nop. She-e thüi: “Wanghompa nang tsünlo-khothole ngohüi! Nang mong itukuxle taxhi üntoxle thün hüile taxchang.

¹¹ Nang wangting ma zang chasa füikya khünak tuita tüile. Hünchaxnue apünle ngopongma, ija mixsüne, owawa je-hwon füikya baozangbu ningle tuita müikya olom ahole changpu. Hünchaxnu, wanghompa Nebukadnezar-e chix a jenu-shipa hia opa-nanpa hwom pangnu lompa ang zingle thompu.

¹² Chix ma zangjang khünak to kaikya tsak-zong hia je-hwon tamchu tsing-wankya, tamnüile chu wünmangbu tai angkya, tsaisong-kaxnongbu to lan angkya ilaxle huxsa zangwün chixe tsingle tsuakkya changle; idaile ija mixsün Danel se ang apaokox; wanghompa-e chix ang Belshazzar le mün koxle thomkya changpu, ija chem hanpak-hexle nang hama chixe tix wünle fatsuak angkya changle.”

Ija Chakza Chem Hanpak hexle Danel-e Apuale kox

¹³ Danel a lebama wüi wanghompa hato sele apüi, ilaxle wanghompa-e chix ang thüi: “Nang a Judah nok tokya ku wanghompa zanda ang kople apüikya Danel changchami?

¹⁴ Otsao baozangbu chasa nang ma tüile ilaxle nang a tuita jetüi-hwonlangkya mix changle le kue atat ang kople.

¹⁵ Ibu nguakax-wangkhobu hia jenu-shipabu kue ija chakza ele fa angkya tamchu ija chem hanpak hex awanle fa ang sele anopu, ikoxle hwom opupuechu ija taile fa ang müntho.

¹⁶ Nange huxsa zangwün hia kaxhün-ngaotünbu tai ang tsuakle le kue atat ang kople. Nange ija chakza ele apua ilaxle ija chem hanpak hexle wünle fa ang jangtho, nang ang chongwang hwom nyilo nyikhik awunle koxüi, nang achuak-achenle dingkux ma hun lik alikle koxüi, ilaxle nang a ku wangting ma ku fang ma apünkya mix azom lükya ang achangüi.”

¹⁷ Danel-e lan: “Nang hinghobu nange tathomkox chichangba owawa ang koxle apaokox. Ija chakza kue nang hama ele apuale faüi ilaxle ija chem hanpak hex taile faüi.

¹⁸ “Khüthak Zang-e hünchaxnu Nebukadnezar ang tüle chongkya wanghompa ang achangpu ilaxle chix ang münchong hia achuak-achenkya fapu.

¹⁹ Zangfang angkya pangnok-jating chix thua zale abün. Chixe owawa mik amüt-se jangtsu, chixe ile mokpu; chixe owawa ozün ma panle thomse jangtsu, chixe ile mokpu. Chixe owato chemle achuak-achense tsupuix chichangba thajao-wünhai koxle changse tsupuix, chixe ile hwonpu.

²⁰ Ikoxlechu chix huanuma mongngamle changkya khoma, mongtsakle changkya khoma, tamchu mongtsik mongma huanuma tüikya khoma, chix a chix chongwang tüntong angkya athai ilaxle chix münchong-ngampai amüt.

²¹ Chix a khünaknu tu angkya jwonle asam, ilaxle chix tutex a müi tutex ningle achangle pao. Chix a faomüi mantsakbu füi ngo, maihu lailaile fum tsütle sax, ilaxle chix a kothofa to nyentie thuple pom. Oshukshukma chixe, zangfang angkya wangtingbu pangwüi Khüthak Zang chak ma tüile ilaxle chixe ija owa ang koxse tsupuix ija mix ang koxle le tsingle hüi.

²² “Ikoxle nang, chix sasün, nang a puinaile chitüi; nange ibu pangnu tsingle ngohupu.

²³ Nange zangkangting tokya Jowanpa zongto chichangle mok, chix Zangshwom-Hom tokya apüikya wansa hia khupbu to nang e twonpu. Nang, hünzom nguakax-wangkhobu, nang kakonubu tamchu hünzom danuchabue ibu tuina ma ju-khan lingle changpu ilaxle hun, khop, wi, jan, pün hia long, ibu füi zingkya baozangbu to hünzome shwompu: baozang ibu a ngün ang chitho, atat ang chitho chichangba mok ang hia tütali awanle lax ang chithokya baozangbu. Ikoxle nang ozün ma thom angkya hia zi ang tom angkya tamchu nangsüt-nangmwot pangwüi nuazing tsuakle hume ngokya Zang ang mix a nang e münchong chifa.

²⁴ Ikhoma ibu kax zale aho ang Zang-e ija chak ahüipu.

²⁵ “Ija zale tüikya a ile changpu: ‘Huake, huake, tuakthüt, ahak-ahan, ibu.’

²⁶ Ilaxle ija hanpak a ile changle: huake, Zang-e nang wangting hanpak ele tsuakdaoa ilaxle ija a oshuk hato ahüidaoa;

²⁷ tuakthüt, nang a tuak ma thütle anodaoa ikoxle müimamale chazangle bangle;

²⁸ ahak-ahankyabu, nang wangting a ahak-ahanle changdaoa ilaxle Medi hia Parsia nok ang koxdaoa.”

²⁹ Belshazzar-e chix dabu ang momle Danel ang wanghom hwome laxkya nyikhik nyilo awunle ilaxle dingkux ma hun lik alikle achuak achen angkya kax kox. Ilaxle chix wangting ma wanghompa-e Danel a apün angkya hanpakma chix fang ma azom lükya ang achang.

³⁰ Ija jaja wüi, Babilon nok wanghompa Belshazzar a mik amüt;

³¹ ikoxle Mede nok Dairas, zanglao puzombün anyi nguidaokya azupa tuitae wanghom ngwotnui pale kop.