DANEL 10 - OTSAO BAIBEL (BSI)

Tigris Shuanu zui ma Danel Mikngün-ohün

¹ Parsia ma Sairas a chongwangpa ang achangkya füima zanglao azom lükya to, Belshazzar le nyakkya Danel hato kaxho tuita ngaile aho. Ija kaxho a otsingtomtata ikoxle ija awanle lax ang müimamale tsak. Ija a chix hama mikngün-ohün ma apuale fa.

² Ipongma ku a hatdang azom sople ngo.

³ Kue sütmüi-lingma hia omüi-onyax chemchu chisax, ju-khan chemchu chiling, chichangba ija hatdang azom akaile machang tanto kue kho tangtang ngaxchu shitle chichang.

⁴ Ija zanglao ma pongwang lükya lyetnu kua nyixtsa ali lükya to ku a chongkya Shuanu Tigris zui ma ajongle tüikya.

⁵ Kue angakle hukoxle müikya jaknyi awunlaxle hun züpak apak daole mixsün tuita ngünle lax.

⁶ Chix tsangtsa a liknu wai lailaile nyanle ngün. Chix thünza ang zangchangjep wünnyan ningle, ilaxle chix mik a wün lailaile khisumle tüikya. Chix cha hia chakbu a janjong nyan ma nyanle tüikya, ilaxle chix kaxzing a khünaknu tunu asoxkya zing ningle azing.

⁷ Ija mikngün-ohün ngünkya khünak a ku tata wüi changkya. Ikhama ku füi tomle tüikyabu owaechu chemchu chingün, ikoxle hwom a zalaxle zikle pao ilaxle khünle ngo.

⁸ Ija za-adünkya mikngün-ohün to hu ang ikhama ku tata danle tox. Ku ma zong ojao chitüile chang, ilaxle ku thünza a owaechu chitsingtsuak tangle jele pao.

⁹ Chemtue kue chix kaxzing atatpuix, jemax le ku haxkha to nguak ilaxle ku ikhato akhuple ngo.

¹⁰ Ipongma chak tuitae ku to kün ilaxle chak hia cha ma ku syetle ajong; ku a athaxchu abünle wüi ngole tüikya.

¹¹ Ija kaxtaimixe ku ang thüi: “Danel, Zang-e nang to mongkünle. Ajonglax ilaxle kue chem akaxpuix ija to mongkoxle apakoplax. Ku a nang hato tsanle ahüikya changpu.” Abün-ngale ku ajong.

¹² Ipongma chixe akax: “Danel. Taxza. Tsingwankya kop angkya hanpakmale nang mong ma tsule zangjop owang wangpong tokhange wüi Zang-e nang zangjop atatle laxdaoa. Ku a ija nang zangjop kax to lankya tuita ang nguipu.

¹³ Parsia angkya kaxtaimix wanghomsae ku nyixtsa büta jao abaxle thompu. Ifüima Maikel, tuita kaxtaimixbu khama lompa, ku to fong ang nguipu, chemthüikoxle ku a ija Parsia nok to ku tata danle tox.

¹⁴ Athax füichi ma hünzom khünakbu to chempangle chang angkya hex ija nang hama apuale fa angkya hanpakmale ku nguikya changpu. Ija a athax füichi hanpak mikngün-ohün changpu.”

¹⁵ Chemtue chixe ija kax akaxpuix, kue zangwün chithole haxchi to hule ngo.

¹⁶ Ipongma kaxtaimix tuita, owa khünak lailaile ngünpuix, chixe chix chak thüi ilaxle ku tun to lyet. Kue chix ang thüi: “Alixachong, ija mikngün-ohüne ku a chikux ahongle müimamale ashole maxle.

¹⁷ Ku a hopupa pomtho ma ajongle ngokya dapa tuita ningle changle. Kue nang füi zang chemle wünüi? Ku ma tsak-zong chemchu müntüi, zakdün ngaxchu müntho.”

¹⁸ Chixe tamchatlechu ku to kün, ilaxle ku ma janzüi hidaole hüi.

¹⁹ Chixe thüi: “Zang-e nang to mongkünle, idaile nang abüt-aban angkya hia za angkya chemchu müntüi.” Chemtue chixe ija kax akaxpuix, ku hato zong hüikya ningle khangka hing ilaxle thüi: “Alixachong, nange ku füi chem akaxse hex akaxhüi. Nange ku ang otsak-ozong koxle changdaoa.”

^20-21 Chixe thüi: “Ku nang hato chemto nguipuix ija nange awanchami? Ku a nang hato Otsingtsing Laipex ma zale tüikya ngaile aho ang nguikya changpu. Athax a ku chatlaxle Parsia angkya kaxtaimix hopupa ang ngokya füi azan angkya changle. Ifüima Grik nok kaxtaimix hopupa ang ngokya ngaiüi. Israel nok kaxtaimix hopupa ang ngokya Maikel boma ku to asunle chang angkya mix owachu müntüi.