DANEL 1 - OTSAO BAIBEL (BSI)

DANEL HIA CHIX ZUIKHUI HWOM PUKAX (1.1—6.28) Nebukadnezar khwalo ma Naosün tuita

¹ Jehoiakim wanghom ang achangkya zanglao azom lükya to, Babilon angkya Nebukadnezar-e Jerusalem tingtakle tingnu akhople kop.

² Jowanpa-e chix ang wanghompa Jehoiakim kop ilaxle Zangshwom-Hom angkya tuinabu züizüi tsui pao ang dan. Chixe chix füi tomle zandabu koplaxle Babilon tokya chix baozangbu to shwomkya nui to ngui ilaxle zan ma kopkya tuinabu baozang to shwomkya hom ma shole thom.

³ Wanghompa-e Ashepenaz, chix nguakax-wangkho tuita ang, zanda ang koplaxle apüikya Israel nok kha angkya wanghom hwom füikya naosünbu züizüi zünle kop angkya kax kox.

⁴ Ibu naosünbu a osün müile tüi angkya, jetüi-hwonzaile tüi angkya, jali mwot mok ang awanle chang angkya, tütali momle awanle lax ang tho angkya, tsangtsa ma manman chemchu chitüile chang angkya, ile changkox tix hwome wanghom homkha ma mwot thothale chang ang tsuak angkya changpu. Ashpenaz-e hwom hama Babilon nok laiza anwot-anole kox angkya oli ang chang.

⁵ Nyixfokya to ibu ang nyixfokya to wanghom hwome saxkya sütmüi-lingma asüt-alingle chang angkya wanghompa-e kax kox. Ile zanglao azom apu-achangle hume füima ibu a wanghompa hato apüile aho angkya changpule akax.

⁶ Ibu zünle kopkya naosünbu khama Danel, Hananiah, Mishael, ilaxle Azariah, hwom bibi changkya; ibu naosünbu a pangwüi Judah homjen angkya changkya.

⁷ Ikhama nguakax-wangkho hwom khama akhokya mixsüne hwom ang mün mamale ile kox: Belshazzar, Shadrak, Meshak, ilaxle Abednego.

⁸ Wanghom khwa angkya chitsaokya sütlingbu saxling üntoxle Danel-e chix chitsaokya khünak tuita ang münachangüile mongzangwünle tsuak, ikhoma chixe Ashpenaz ang chix to süfonghüile akax.

⁹ Zang-e Ashpenaz kün-hi-mong khama Danel to chingchale hu angkya kün-mong kox.

¹⁰ Ikoxlechu Ashepenaz a wanghompa thua za, ikhoma chixe Danel ang thüi: “Hünzom chemningkya saxlingle chang angkya hex ija bama wanghompa-e pangwüi adangle fadaoa, ilaxle mama naosünbu lailaile chix mik-hu ma hünzom a sule chibang thüiningle chixe ku mik amüt angkya changle.”

¹¹ Ikhoma Danel a Ashpenaz-e hwom mixsün azom to humele nye ang thomkya mixsün hato ngui.

¹² Ilaxle chixe thüi: “Kwome sax ang suihing laihing hia ti wüi kangfa.

¹³ Ifüima wanghom khwa angkya sütmüi-lingma saxlaxle ngokya mama naosünbu füi kwom afyen le anolax, ifüima nange kwom chemle ngünpuix, hulax.”

¹⁴ Hwome nyixbün bama ile saxle wan ano angkya chix ang mongtsu.

¹⁵ Chemtue hanpak nguile hüipuix, wanghom khwa ma sütmüi-lingma saxlaxle ngokya naosünbu pangnu füi hwom wüi haxkhi-zangsum le müile ngün.

¹⁶ Ija makhange ija nyetmixe hwom ang wanghompa-e koxkya süt chichangle suihing laihing wüi saxle ngo ang tom.

¹⁷ Ibu mixsün ali ang Zang-e man-ngünkya hia tsing-wankya fa. Ito bole chixe Danel ang mikngün-ohün hia wünmangbu tai ang awan angkya jetax-hwonnüi kox.

¹⁸ Wanghompa-e tyakya zanglao azom hanpak nguile hüikya zuma, Ashpenaz-e ibu naosünbu wanghompa hato apüi.

¹⁹ Wanghompa-e hwom pangwüi füi tsaitik-kaxtikle zangwün, ilaxle Danel, Hananiah, Mishael hia Azariah hwom wüi mamabu füi mik-hu ma sule ngün. Ikhoma hwom a wanghom khwa ma mok angkyabu ang achang.

²⁰ Wanghompa-e tüningkya kax atüi chichangba tüningkya khosam ahüi koxlechu, ibu mixsün hwom ali zongto chemchu chichang chemthüikoxle hwom haxtok angkya jenu-shipabu pangwüi to thombün-thomtsae nüile pangnuli hwome tikle ngo.

²¹ Parsia nok Chongwangpa Sairas-e Babilon tingtakle changkya kople Danel a wanghom khwa ma ngole hüi.