AMOS 9 - OTSAO BAIBEL (BSI)

Jowanpa Kaxfün

¹ Kue tö-tsap zui ma Jowanpa ajongle ngokya ngün. Chixe kaxtom kox: “Zangshwom-Hom homkho ma zongbakle hongle homting to lün le alox ang laxkox. Ibu akhixle changkox ilaxle ibu a khünaknu ding to düt ang laxkox. Khünak mamabu a kue zanhok ma amütüi. Owachu paole azang ang müntom.

² Hwome amalum alople hwom pao angkya lom thule jukox ngaxchu, kue hwom kopüi. Hwom zangkho to ngale changkoxchu, kue hwom bele ajoüi.

³ Hwom a Karmel Haxnukho to khünle ngokoxchu, kue hwom lomle ataküi ilaxle kopüi. Kotho to hwom tinu othong to khünle changkoxchu, kue tinu khatokya müinu-nyaxpa ang hwom to tsüt ang tomüi.

⁴ Hwom a zannokbue zanda ang koplaxle paole thomkoxchu, kue ibu ang hwom mik amüt angkya kaxtom koxüi. Kue hwom to asun angkya chichangle hwom amüt angkya mongzangwünle tsuakdaoa.”

⁵ Jowanpa Khüthak Zang-e chaxwannu to lyet, ijama ija alox; ima tüikya pangwüi mongmaxle sop. Nail Shuanu tichap lailaile zangfang pangwüi dong-dong-ju le sile alox.

⁶ Jowanpae chix hom a zangkho tingto zai, ilaxle chaxwannu thak ma zangding ohua zingle alai. Chixe Tinu kha tokya ti nyak ilaxle ibu a chaxwannu ding to thok. Chix mün a Jowanpa changpu!

⁷ Jowanpae thüi: “Israel khünaknu, kue hünzom hanpakma mok pongma Etheopia nok hanpakma ajangkya tukuxle ajangpu. Kue hünzom chemle Ijip nok tokya apüipuix, ija ningle Kret, Siria hia Kir, ibu nok tokya Filistia nokbu kue apüipu.

⁸ Jowanpa Khüthak Zang, kue ija ningkya Israel nok ochax wangting tuita to hule ngopu, ilaxle kue ija a chaxwan thün angkya amüt angkya changpu. Ikoxlechu kue Jakop sixli hwom komkaile münamüt.

⁹ “Kue kaxtom koxüi ilaxle Israel nok a won-khua angkya sax chanpupu le chan ang tomüi. Kue hwom a chaxwannu onok khato chanüi ilaxle chilaxlili süile changüi.

¹⁰ Ku khünaknu khama opange, ‘Zang-e kem hato thama chiahüi ang khato’ le akaxpuix, ochax khünak ibu a zanhok ma max ang tomüi.”

Israel Nok Athax Füichi ma Tamchatle Zingle Amüi angkya

¹¹ Jowanpae thüi: “Kue Dawid wangting oja hom tuita pünle ama thomdaokya ningle tüipuix, ija tamchatle amüi angkya hanpak nguile ngole. Kue ija katukbu tamchatle zaile ajong laxle ija zingle amüiüi. Kue ija chatle zingüi ilaxle amipongma tüikya lailaile zingle achatüi.

¹² Ikhoma Edom noke danle toxkya tamchu amipongma ku onokbu ang ngole tüikya pangwüi to Israel noke lütle chang angkya kax, ibu pangwüi ile tsuak ang tom angkya Jowanpa, kue akaxpu.”

¹³ Jowanpae thüile: “Hanpak tuita nguile ngole, saxziakbu a züt ang chithole lwomle tsongle hüi angkya hanpak, grepbu oti ang achangle matsuakba wüi lwomle tsong angkya hanpak. Haxnubu a tijongkya grep-tibu dütkyae awang angkya hanpak, haxhuabu a ija jenle jukyae awang angkya hanpak.

¹⁴ Kue ku khünaknu a hwom haxtok to tamchatle apüiüi. Hwome pünle ama thomdaokya hwom tingnubu zingle amüi laxle ibu ma ngoüi; hwome grep manzaile changüi ilaxle ibu angkya grepti-ju lingüi; hwome pünziak laimo ali laxle ibu saxlaxle ngoüi.

¹⁵ Kue hwom ang koxkya haxtok ma kue ku khünaknu thwomüi, ilaxle hwom a tamchatle fuakle münawütüi.” Jowanpa hünzom Zang-e ija akaxdaoa.