AMOS 5 - OTSAO BAIBEL (BSI)

Künlop-monglüi ang Ahyenkya Tuita

¹ Kue hünzom ang ngaokya mangsop tsai ija to apalax, Israel khünaknu:

² Naochasa Israel a nguakdaoa, Hwom a tamchizoüi! She a chaxwan tok ma awütkya ang achangle thom, Ilaxle owaechu she azwot ang chiasun.

³ Jowanpa Khüthak Zang-e thüile: “Israel nok angkya tingnu tuitae süpahibu 1000 akat, ikoxle 100 wüi azangle chat; mama tingnue 100 akat, ikoxle 10 wüi azangle chat.”

⁴ Jowanpae Israel khünaknu füi akax: “Ku hato oman, jangchangba hünzom ozün ma ngoüi.

⁵ Zangshwom ang Bersheba to taxka. Bethel ma ku lomle atak ang taxazong—Bethel a muato maxdao angkya changle. Gilgal to taxka—she ma tüikya khünaknu a zanda ang apaole asam angkya changle.”

⁶ Jowanpa hato nguilax, ikoxle hünzom ozün ma ngoüi. Hünzom ikhato chipao jangthüi: Israel khünaknu hato chix a wün lailaile zikle juüi. Bethel angkya khünaknu wünkha to zokle ashunüi, ilaxle ija wün owaechu amüt ang münthoüi.

⁷ Hünzom opange sukya kax füi asong-anong ngopuix tamchu opange khünaknu angkya ma huakpa süntswon amüt ang tompuix, hünzom a maxdaoa!

⁸ Lyettsibu a Jowanpae zing, Pleiad hia afoxle tüikya lyettsi chepnu ningkyabu a. Chixe zangnaknu a anyixningkya zangngai ang achang ilaxle anyixning a awünning ang achang. Chixe Molo Tinu tokya tibu nyak ilaxle ibu chaxwannu ding to thok. Chix mün a Jowanpa changle.

⁹ Tsakzongle hia shingmongle tüikyabu hato chixe omüt ahüi.

¹⁰ Hünzom khünakbue sukya kaxfün bama alatkya hia khwa ma kaxtsing zangwünle changkya mix to miktsak.

¹¹ Hünzome zasabu to afangle thom ilaxle hwom saxziak zongzukle lax. Ikhoma ipong müile hünzome zaile alaikya longhombu ma hünzom münngoüi chichangba ipong müile hünzome küile alaikya grep haxtok angkya grepti-ju hünzome münlingüi.

¹² Hünzom ochaxbu chemtukux khomtsikyabu hex tamchu hünzome chemtukuxle mix mik amüt daopuix kue awan ngopu. Hünzome müikya khünakbu to zothuple chang, zuizunbu lax, ilaxle mixshix-zasabu ang khwa ma sukya kaxfün kop ang chitom.

¹³ Ija khokho ma, iningkya ochax lwonkya tuk ma dangjajale ngokya wüi patzankya mwot changle!

¹⁴ Oja ochax hex ija chichangle, chem supuix ija mok angkya a nang mongjang ang achanglax, ile chang koxle nang ozün ma ngoüi. Nange akaxkya ningle, Jowanpa Khüthak Zang a otsing tomtata ma nang füi ngoüi.

¹⁵ Chem ochax hex ija thua anulax, chem supuix ija to mongkünlax, ilaxle khwa ma sukya kaxfün koxle chang angkya to hulax. Ile jangthüiningle owatsing, athax atale toxkya khünakbu to Jowanpae chingchakya tüiüi.

¹⁶ Ikhoma Jowanpa Khüthak Zang-e thüile: “Tingnu tingjang lomnubu to mangsopkya hia akhongkyabu tüiüi. Omün koxlaxle mangsop ang tsankyabu füi tomle manzai mixbu chuwüi mangsop ang ahyenkya tüiüi.

¹⁷ Grep haxtokbu ma mangsopkya tüiüi. Ku hünzom to sikangün ang nguile ngokya khoma ija ile chang ang tomüi”, le Jowanpae akaxle.

¹⁸ Hünzom Jowanpa Hanpak Nyix sungle ngokyabu hanpakma khomtsi angkya chongle tüile! Ija hanpak nyixe nang zongto müikya chem mokle faüi? Chemthüikoxle ija nyix a zangngai hanpak chichangle zangnaknu nyix ang changüi.

¹⁹ Ija a owawa mailang thoto paokya mixe chep apongle laxkya ningle changüi! Chichangba owawa hom to nguilaxle katuk ma achuakle changkya füi tomle pue tule laxkya ningle changüi!

²⁰ Jowanpa Hanpak nyixe a zangngai chichangle zangnak mix apüile faüi; ija nyix a zangnaktukkya nyix ang changüi, zangngai zazekya nyix ang münchang.

²¹ Jowanpae thüi: “Kue hünzom zanglom pangpwonbu to anule; kue ibu to hule ajong ang müntho!

²² Chemtue hünzome ku hato zokle ashunkya to hia saxziak tö, ibu apüile changpuix, kue ibu pongle münkopüi; ku hato apüi angkya hanpakmale hünzome tuxle anutkya müibu kue pongle münkop.

²³ Hünzom büi-hong samthu ngokya zakün; kue hünzom thuaput-waxmaibu zingto apase münlua.

²⁴ Itülüi, sukya kaxfün a shuasa ningle jenle ju ang tomkox, ilaxle otsao a tamchu chizopkya shuanu ningle jen ang tomkox.

²⁵ “Israel khünaknu, kue hünzom zanglao 40 sak-hax akaile zule alyet pongma kue hünzom ma tö ibu otuechu chitsangpu.

²⁶ Ikoxle athax a, hünzome Sakkuth muabu, hünzom wanghom baozang to, ilaxle Kaiwan angkya, hünzom lyettsi baozangbu to shwomle, kue hünzom zanda ang Damaska haxtok akaile paopongma hünzome ibu muabu azyale ahamkya changüi.

²⁷ Ija kax, Khüthak Zang le amünkya Jowanpa, kue akaxpu.”