AMOS 2 - OTSAO BAIBEL (BSI)

Moab

¹ Jowanpae thüi: “Moab angkya khünakbue chatchatnaole ochax lyenle changdaoa, ilaxle ija khoma kue hwom to sikangün angkya wüi changpu. Hwome Edom nok wanghompa mang zokle ashunle wünjuak ang achang laxle thajao ang tomdaoa.

² Kue Moab nok haxtok hato wün ahüiüi ilaxle Kirioth angkya zanhunuibu zokle ashunüi. Chemtue süpahibu akhong tamchu nyazongbu mütle changüihex, ija zanzing thoto Moab nokbu zile paoüi.

³ Kue Moab nok apünkya hia hwom haxtok angkya lompabu komkaile langüi.”

Judah

⁴ Jowanpae thüi: “Judah noke chatchatnaole ochax lyenle hüidaoa, ija khoma kue hwom to sik chiangün homle müntoxüi. Hwome ku hwon-nwot ajao ilaxle ku kaxtombu chilaxle changdaoa. Hwom, a hwompu-hwompa hwome opang thothale hüikya hex, ibu baozangbue lomchei to zunle paodaoa.

⁵ Ikhoma kue Judah hato wün ajoüi ilaxle Jerusalem angkya zanhunuibu zokle ashunüi.”

Israel Nok hato Jowanpa Kaxfün

⁶ Jowanpae thüi: “Israel khünaknue chatchatnaole ochax lyenle hüidaoa, ikhokho ma kue hwom to sikangünüi jao. Chem-machu chithaikya khünakbu, opange hwom thashe achatle kox ang chithopuix tamchu chitüichinangkyabu opange ma chisox shem tuita mün kox ang ngaxchu chithole maxpuix, ibu hwome da ang hangle apaodaoa.

⁷ Hwome chitho-chilün hia juafong angkya chitüile maxngokyabu tingle akhündaoa ilaxle mixshix-zasabu hwom lom ang thwomle apaodaoa. Hopa hia sasün nyie danucha tuita füi tomwüi nganguile changdaoa, ilaxle ku otsao mün akhu ang tomdaoa.

⁸ Zangshwomnui pangkha towüi khünakbu a, mixshix hia zasabue hwom thashe tsangthom hanpak ang thomkya nyizabu pale laxlaxle ibu awunlaxle jiple. Hwom ang ngun kox angkyabu chak tokya jubu pale lax üntoxle ibu hwome hwom Zang to shwomkya hom ma ling-saxle changle.

⁹ “Ikoxlechu, ku khünaknu, kue Amor nok komkaile amütkya a hünzom hanpak ang changkya. Ibu a pünjang büta tsua ilaxle zak pünnu lailaile thongmong le tüikya.

¹⁰ Kue hünzom Ijip nok tokya alaile apüipu, ilaxle zanglao punyi kue hünzom a sak-hax akaile lomzunle hüipu, ilaxle Amor nok ngokya haxtok hünzom haxtok ang koxpu.

¹¹ Kue hünzom sasün hwomkha angkya züizüi ajebu ang ilaxle naosünbu kha angkya züizüi Nazarait ang thomkyabu ang zünle koppu. Israel khünaknu, Jowanpa, kue akaxkya kax ibu otsing münchanglea?

¹² Ikoxlechu hünzome Nazarait ang thomkyabu ang ju-khan aling, ilaxle ajebu ang ku kax hole zang chiwün angkya akax.

¹³ Athax a kue hünzom hax to zutle akhixüi, ilaxle hünzom a athaxpi, tsax hün laxle leüi müilin zyen azing pupu le wotle nuzaoüi.

¹⁴ Tüle zik tsuakkya mix ngaxchu azang ang münthoüi; tsakpa-zongpabue hwom janzüi asamüi, ilaxle süpahibue ma khang azang ang ngaxchu chithole changüi.

¹⁵ Sanhap füikyabue hwom ziakople thom ang chithoüi, zik tsuakkyabue paole azang ang chithoüi, ilaxle mankho angkya khünakbu chu hwom khangkho azang ang opao chithole changüi.

¹⁶ Ija nyix a, naomüipa changpule ngokya mixe ngaxchu ma khyep-di toxlaxle pao ma sütüi.” Jowanpae ija akaxdaoa.