3 JUHAN 1 - OTSAO BAIBEL (BSI)

¹ Tüichong mixmüi tuita tokhange: Kue otsing tomta ma mongkünkya ku mongkün Gaia hato.

² Chasa ma chemle thoto lele hüipuix, ilailaile mama pangnu lom machu thoto le angkya tamchu nang müimüi zangngaile ngo angkya bama kue zangjoppu.

³ Otue züizüi khristan tüinaobu nguilaxle nang otsingtsing ma shingmongle ngole hüikya bama wünpuix, ku ang mong tüle müipu.

⁴ Kusu kusa hwom otsingtsing ma shingmongle ngokya zing atat pongma müikya ningle ku ang mong otuechu münmüi tox.

Gaia Achuakkya

⁵ Ku mongkün tüinao, hwom mixwünbu changkoxle ngaxchu nange ma füikya khristan üithobu to chempang le hume puix, ibu mwot to nang shingmongkya mix changle.

⁶ Ikhato tüikya müimüithom hato hwome nang mongkün bama wünle. Zang zongto sukya lima nange chingchalaxle hwom paoüi to zunle changkox.

⁷ Chemthüikoxle hwom a chiongkyabu angkya fongkya chemchu chilax homtoxle Khrista thotha angkya mwot to achexle paokyabu changle.

⁸ Ikoxle kem khristanbue ibu to fongtsox angkya changle, ikoxletix kemchu hwome mokkya otsingtsing mwot süntom ma wom angkya changüi.

Diotrefa hia Demetria Nyi

⁹ Müimüithom hato kue moxmoxle tuita laiza kox; ikoxle hwom khama lompa ang chix achangse tsukya Diotrefa-e ku kax to na ojao chitha.

¹⁰ Idaile ku nguikya zuma; chixe hwom bama atsele zangwünkya hia kwom ang chichang-chizang kaxma thüikya; ija ma mongzom chimüi laxle chixe tüinaobu wünpwonle chikop ilaxle owawae pongle kopse tsukyabu ngaxchu chixe abax tamchu müimüithom angkya hwom mün atsai ang tom; ibu chix mwot pangnu bama hünzom hama wünüi.

¹¹ Ku mongkün, ochax hwon taxlax ikoxle chem müipuix ija hwon laxlax. Owae müikya mwot mokpuix ija a Zang tokhange changle, ikoxle owae mwot oma mokpuix chixe Zang mangün.

¹² Demetria bama khünak noke wüi tamchu otsingtsinge ngaxchu alüile kaxkhi fale; üntoxle kwomechu kaxkhi fapu ilaxle ija ma thaikya müntüile nange awanpu.

Kaxshuk

¹³ Kue nang hato za angkya tüihupu, ikoxlechu kolwom hia khanti füi ibu münza ngohom;

¹⁴ itülüi, chwonle wüi kue nang ngün ang kopüi le monghompu. Imatix künyi thünkhang asaole wün-zex ngohax.

¹⁵ Nang ma mongsom naxtüi. Tüinao hwome nang hato salam fale. Ikhato tüikya tüinao hwom angchu nok ang wüi mün lün le salam fakox.