2 WANGHOMBU 4 - OTSAO BAIBEL (BSI)

Elisha-e Chitüi-chinang Thanucha tuita to Fong

¹ Athax ajebue dantoxkya kakonubu kha angkya mixcha tuita Elisha hato nguilaxle akax: “Nang thothapa ku kakopa a zidaoa ilaxle nang thothapa a Jowanpa thua zale ngokya mix tuita changkya le awan-ngopu, ikoxle chixe ku kakopa angkya thashe achat kop angkya tüikya mixsün a kukhi sasün anyi da ang achang ang pao angkya nguile tüile.”

² Elisha-e she ma atüi: “Nang hanpak ang kue chem mokle faüi? Nang hom ma chempang tüipuix, ku hama wünhüi!” She-e lan: “Olip münga thua tuita boma hom ma chemchu müntüi changa.”

³ Elisha-e she ang thüi: “Nang tomzibu hato paolaxle ilaxle otsuaktsuak ma nange pe ohuabu afoxlax.

⁴ Ifüima hünsa hünzom a homkha to donglax, ka haklax, ilaxle pe ibu ma münga je ang sütlax. Amünpupu a süile danlax.”

⁵ Ikhoma chix ha angkya she achexle pao ilaxle sasün hwome ka hakle kop; sasün nyie she hato pe apüile kox, ilaxle she-e ibu ma münga je.

⁶ Chemtue tikkuxbu awangle changpuix, she-e sasün nyi ma atüi: “Pe tamchatle tüicha?” Hosa tuitae she kax to lanle thüi: “Athaxpi pe ohua a itata wüi changa.” Ifüima tomle münga jenle ngokya thwonle zak.

⁷ Ijama she-e Zang khünak Elisha hato chatle ngui. Chixe she ang thüi: “Paokox, olip münga pangwüi hang kox ilaxle nang thashe tsangthomle tsuakkox, ifüima ngaxchu hünsa hünzome sax angkya hanpakma ngaxchu okhonguile atale tüiüi.”

Elisha hia Shunem angkya Ahak-aluale tüikya Thanucha Nyi

⁸ Nyixta Elisha a luacha tuita ngole tüikya Shunem to ngui. She-e chix a fongsax ang se; ija nyix makhange chix Shunem to lefofo ija mixchanu hom ma fongsaxle tox.

⁹ She-e ma kakopa füi akaxle thüi: “Athax hulax, kem homzui makhange jento le-zyenle ngokya mixsün a Zang khünak tuita changale kue ngünle laxdaoa.

¹⁰ Chingcha üntoxle kemepi chix hanpakma nui tuita zingle shongkoxhax; ikhama lya tuita tanlaxle küntong tuita danle tamchu wüntik tuita atsople le toxhax; ile chix imakhange le-zyenle changpongma ikhama athongle naxchang kox.”

¹¹ Nyixta chix ikhato ngui, ilaxle ija nui to nop üntoxle ikhama nazakle nuitox.

¹² Chixe chix dapa Gehazi ang thüi: “Ikha angkya Shunem mixcha se-kox.” Ilaxle chemtue chixe ija mixcha sele apüipuix, she a chix tunthoma ajong.

¹³ Ilaxle chixe Gehazi ang thüi: “Athax nange she ang thüikox: ‘Hulax nange kwom to apu-achangle ipongpongle thangdao, nang hanpak ang mokle faüi? Nang bama chingcha jukya kax wanghompa chichangba süpahi lompa hato wünüi hia, chemle changüi?’” She-e lan: “Ku hanpakma ikhama kuma-kumix pangwüi tüile.”

¹⁴ Elisha-e Gehazi ma atüi: “Jangchangthüiba kue she hanpakma chem mokle faüi?” Chixe lan: “Changle, she ang lüka naosa müntüi, ilaxle she kakopa chuwüi azudaoa.”

¹⁵ Elisha-e kaxkox: “She ikhato ngui angkya akaxkox.” She nguilaxle ija nui fülom ma ajong.

¹⁶ Elisha-e she ang thüi: “Ngaizang itu shene nang chak ma nange nao pai ang kopüi.” She-e lan: “O alixachong, nange ku taxdyen, nang a Zang khünak tuita changle!”

¹⁷ Ikoxlechu Elisha-e akax daokya lailaile, ofüi angkya zanglao ma ipongkhae she-e lüka naosa tuita puxle alai.

¹⁸ Aluile chingo homtoxle, tsaxzüt tu kha, nop tuita a ija naosa a, hopae tsaxzütle ngokya khato hopa mwot to fong asun ang zang to kale hüi.

¹⁹ Allele chixe hopa nyakle akhong: “Ku ang khang luakle! Ku ang khang luakle!” Hopae dapa tuita tsanle thüi: “Naosa a honu hato apüikox.”

²⁰ Ija dapae naosa a honu hato apüile kox; chix zile paokya tuk alople honue naosa a she weho ma paile thom.

²¹ She-e naosa a Elisha nui alople dün, chix a lyading ma danle toxlaxle laile pao.

²² Ifüima she-e hokakopa sele thüi: “Ikhato mantsak tuita füi da tuita ahüihüi. Ku a ajepa Elisha hato pao angkya changle. Ku a otsuaktsuak ma chwonle chat ang thüiüi.”

²³ She kakopae atüi: “Nang a anyixnyix wüile omalax ang pao angkya? Anyix a Nazakle Nuinyix chu münchang chichangba Lyetzün Pangpwon chu münchang.” She-e lan: “Chem münchang, müiüi.”

²⁴ Ifüima she mantsak tuita ma nga, ilaxle dapa tuita füi akax: “Kue zakkoxle mathüi tanto nange man a mom-momle ahamkox.”

²⁵ Ikhoma she a Elisha ngole tüikya Karmel Haxnu alop ang laile pao. She tsaito tüipongma wüi Elisha-e she nguile ngokya ngünle lax ilaxle chixe dapa Gehazi ang thüi: “Hulax, Shunem angkya mixcha nguile ngole!

²⁶ Momlax ilaxle she kakopa hia naosa hwom pangwüi müimüi tüilaxma tikkox.” She-e Gehazi hama pangwüi müimüi-zangngai tüile le lan,

²⁷ ikoxle chemtue she Elisha hato nguile changpuix, she chix tunthoma akhux ilaxle chix cha to twon Gehazi-e she achale apao ang thüipongma Elisha-e thüi: “She to taxpokox. Nange she tüle künmax-mongshanle changkya münngün hia? Jowanpae ku hama ija bama chemle chu chiwün.”

²⁸ Ija mixchae chix ang thüi: “Alixachong, kue nang ma sasün jule changhexcha? Kue nang ang ohua to ku mong achenle taxchangle münthüidai hia?”

²⁹ Elisha-e Gehazi chito aküile hu ilaxle thüi: “Kangmomlax! Ku kiathox koplax ilaxle paokox. Nang füi apongkya khünakbu ang salam thüi ang zakzuile taxchang, kax to lan angkya hanpak laxle taxngo. Küithole hwom hom to nguikox ilaxle ija naosa ding ma ku kiathox tinkox.”

³⁰ Ija mixchae Elisha ang thüi: “Kue ozün ma tüikya Jowanpa hünkhi mün ma kue tsaosaxle thüipu, kue nang chikop homtoxle münchat!” Ikhoma hokhi pangnyi wüi tomtomle chat.

³¹ Gehazi a achale le ilaxle ija naosa mang ding ma Elisha kiathox tin, ikoxlechu ija nao azangle chatkya manwan chemchu chitüi. Ikhoma chix a Elisha füi apong ang chat ilaxle thüi: “Ija naosa a münzo.”

³² Chemtue Elisha-e hom aloppuix, nui to chix tata dong ilaxle naosa a lyading ma ajiple thomkya ngün.

³³ Chixe ka hak ilaxle Jowanpa to zangjop.

³⁴ Ifüima chix a nao ding ma, tun, mik hia chakbu asaole akhuple jip. Ile chix nao dingma jiple tüipongma nao a khamle hüi.

³⁵ Elisha zo, nui ma akhople aham, ilaxle anaole chuwüi nao ding ma akhuple jip. Nao a anüt ma akhik ilaxle mikzam.

³⁶ Elisha-e Gehazi nyak ilaxle nao honu se angkya kaxkox. Chemtue she nguilaxle ija nui to dongle changpuix, Elisha-e thüi: “Ija hünsa a.”

³⁷ She a Elisha chitong ma thüne hax to thule akhux; ifüima she a nao laxlaxle nui angkya laile pao.

Anaole chu Ohünotün Mwt Anyi

³⁸ Hanpak tuita ma, chaxwan pangnu khato tuinu nuaknu le le changpongma, Elisha a Gilgal to chat. Chixe ajebu othom hama anwot-anole ngopongma, chixe chix dapa füi tiknu tuita wün ma talaxle hwom hanpakma suiti zing angkya kaxkox.

³⁹ Hwom kha angkya mixsün tuita fao to hing fün ang pao. Chixe faozu tuita atak, ilaxle chixe chemtukux sangle tsuak puix itukuxle maikuakbu hünle apüi. Chixe ibu apüi üntoxle suiti ang zing ang afi-atsi, ikoxle ibu chem changkya hex chitsing.

⁴⁰ Ija suiti a khünakbue sax ang thok, ikoxle hwome ija sax ang sütkya füi tomle Elisha ang thüi: “Ija a zik-hing changle!” Ikhoma ija a sax ang chitho.

⁴¹ Elisha-e sax hidaole ju, ija tik ma sho ilaxle thüi: “Kwom hanpak ang athaxchu suiti thokkox.” Ifüima ija ma oma chemchu chitüi.

⁴² Mamatue, Bal Shalishah tokhange khünak tuita ngui, tsaxsa-tula puamün sax thulaxle zingkya ankhao 20 ilaxlechu tsaxkho shikkya Elisha hato apüile kox. Elisha-e chix dapa ang ibu füi ajebu othom tux angkya kaxkox.

⁴³ Ikoxle chixe lan: “Khünak 100 hanpakma isasa nguiüile nange thütpia?” Elisha-e lan: “Ija hwome sax ang laxkox, chemthüikoxle hwome wokfwot müile saxle chang füima ngaxchu ota-otua toxle chang angkya Jowanpae akaxdaoa.”

⁴⁴ Ikhoma Gehazi-e ajebu pomtho to sax fexle alai. Hwome ibu sax, ifüima ngaxchu Jowanpae akax daokya lailaile anaole chuwüi ota-otua toxle chang.