2 TIMOTHI 4 - OTSAO BAIBEL (BSI)

¹ Zang üntoxle Jisu Khrista owae ozün hia omang kaxfün angkya hex, tamchu chix chongwangpa le apün-awang ang ngui angkya changkoxle, hwom thüntho ma kue hünzom ang,

² kaxho apuk-apua angkya, (asukhakkya hanpak chichanglax changlax) Ija apuk-apua ang mongto zwomkya, anom-anai angkya, sa angkya ilaxle mong achen angkya, ibu nange adukya füi anwot-ano angkya bama kue nang ang mongtsukya tüihüi thüipu.

³ Khünaknue changkya anwot-anokya to na chitha angkya hanpak hüiüi, ikoxle ma küntsu monglua lom to leüi ilaxle hwom mongto apase le bule tüikyabu mo wün angkya nwotmixbu hwome süchongchongle asüiüi.

⁴ Otsingtsing to apakya lom tokya hwom anongle paoüi ilaxle hwome pupa zangwün to mongkoxle tüiüi.

⁵ Ikoxlechu nange tütue hex ma akumathum le thom angkya wüi changle; sikngün adukox, Kaxho Müikya apuk-apuakya mwot mokkox, ilaxle Zang da tuita ningle nang mwot pangwüi to thotha le tüikox.

⁶ Ku bama, ku tö ang kox angkya hanpak nguile hüile; ija tsün dantox angkya ku hato hanpak athax hüile tüile.

⁷ Zik ma otsuaktsuak ma azongle hüidaoa, oshuk to nguile ku zikdaoa, ilaxle kue mongong thomle hüidaoa.

⁸ Ilaxle athax a sukya tsün ngole hüikyabu ang kox angkya tholünkya hinghoe ku tanle ngole. Ija hingho a, Jowanpa, sukya kaxfünpae ku ang ija nyix faüi ilaxle ku tata angle münchang ikoxle chix ngai angkya tanle mongkün füi ngokyabu pangnu ang koxüi.

Huakpa Zangwünbu

⁹ Ku hato chwonle ngui ang otsuaktsuak ma azonglax.

¹⁰ Dema a anyix ngainyixkya chaxwannu füi mongkün fün mongüna lüta ilaxle chixe ku awüt toxlaxle Thesalonika to paoüna. Kresen a Galatia to, Tita a Dalmatia to le paoüna.

¹¹ Athax ku füi Luk tata wüi. Nang füi tomle Mark kop-hüitox, chemthüikoxle mwot ma chixe ku to fongtsuak angkya changle.

¹² Kue Taikhika a Efisia to akat daoa.

¹³ Nang nguikya zuma, Troas to Karpa hama toxkya ku wun-nyi tamchu laipexbu, tamnüilechu müikhwon füi zingkya laipexbu laxlaxtox.

¹⁴ Janthup mix Alekjendar-e ku to chisumüile hwonle; chixe mokdaokya lailaile chix ang Zange hingho fa angkya changle.

¹⁵ Chix hanpakma nangchu wüi müile khünzailax, chemthüikoxle chix a kem kaxho zongto tüle-tüle shixkya mix changle.

¹⁶ Pongwang ole kue ma khose pongma kuchima owa ngaxchu chise; noke wüi ku awüt. Zange ija bama omale taxnaxthüi!

¹⁷ Ikoxlechu Jowanpa ku füi ngo ilaxle ku ang zong kox, ikhoma tix kue mixnok pangnue atat ang tsuak le Kaxho Müikya apuk-apua ang tho; tamchu mik amüt angkya kaxfün chak tokya ku azang.

¹⁸ Üntoxle Jowanpa-e ku chisumüikya pangnu chak tokya azün ilaxle zangkangting wangting to chixe ku sünle kopüi. Fuazangkya a othuithuima chix kux wüi naxchang! Amen.

Oshuk Salam

¹⁹ Prisila hia Akuila üntoxle Onesifora hwom homkha pangwüi ang kue salam fapu.

²⁰ Erata a Korin ma nuiüna, üntoxle Trofima a kue Milita to dantox daoa, chemthüikoxle chix a sükakle.

²¹ Zangwa thoma ngui ang ole otsuaktsuak ma azonghüi. Eubula, Puden, Linu, hia Klaodia hwome salam fale, ilaxle mama khristan tüinaobuechu wüi salam fale.

²² Nang chasa füi Jowanpa womhüi. Zang chingcha hünzom pangnusa füi wüi ngohüi.