2 TIMOTHI 1 - OTSAO BAIBEL (BSI)

¹ Zang mongtex makhange Jisu Khrista wangshem tuita, owae kem Khrista Jisu füikya notom ma tsaole thomkya tsün khüzün bama apuk ang tsanle apaopuix, ija Pol tokhange:

² Mongkün kusa Timothi hato: Hopa Zang üntoxle kem Jowanpa Jisu Khrista-e nang ang, chingchajaja ilaxle mongsom naxfa.

Münchong fakya ilaxle Mong Achyenkya

³ Ku putong hwome mokle hüikya ningle khangka hingle kue Zang owa thothapuix, kue chix ang münchong fapu. Zangnak zangngai ku zangjop ma hünzom texle atak pongma kue chix to münchong fapu.

⁴ Kue nang mikfi jenkya texle atakle, ilaxle kue nang ngünse le tüle texle, ile changkoxle tix ku mongmüie awangüi.

⁵ Hünpi Luis hia hünnu Eunis hwom ma tüikya ningle khünkhikhikya nang mong kue texle atakle. Ija lailaile nang machu tüile le kue ongle.

⁶ Ikhoma, kue nang khangkho ma chak dankya zuma Zange nang ang fakya hingho ozün ma thomhüi le kue nang mongto texle lax ang koxpu.

⁷ Chemthüikoxle Chasa oja Zange kem ang fapuix, chixe kem thünbat chitsuakkya mix ang münachang; itülüi, chix chasae tsakzong, mongkün ilaxle malualua to akumathumkya füi awang ang koxle.

⁸ Kem Jowanpa bama kaxkhi fa angkya azakle taxtüi; chichangba Khrista khoma kun to thomkya mix changündai le ku bama azakkya taxtüi. Itülüi, Zange nang ang ija mok angkya zong koxle tüikya ningle, Kaxho Müikya bama sikngün apongkya atom-ahanle tüilax.

⁹ Chixe kem khosünle kop üntoxle chix zongto mamix ang nyakle laxkya a keme chem mokdao laxpuix ikhoma münchang ikoxle chix mongtex ilaxle chingcha khoma changle. Chixe kem ang ija chingcha a hanpak owang wangüi thoto wüi Khrista Jisu makhange fakya changle,

¹⁰ ikoxle athax ija a kem khosünpa, Khrista Jisu nguikya makhange kem hato angaile tüile. Chixe zi angkya zong ashuk ang koxdaoa üntoxle kaxho Müikya tokhange chizi angkya tsün ngaile ahole.

¹¹ Kaxho Müikya apuk-apua angkya hanpakma Zange ku wangshem tuita ang kamle kopkya changle.

¹² Ikoxle sikngün ibu athax kue apongle ngokya a ija khoma changle. Ikoxlechu athax kople ku mong chiaole wüi tüile, chemthüikoxle kue ongkya mix kue awanpu, üntoxle chixe ku ang panle thomkya nyix kople ku sünle thom angkya chixe thoüile ku monge texle.

¹³ Nange tole azui angkya olom tuita ningle, kue nang hama wündaokya otsingtsing kaxbu to nange mongle kün koplax, ilaxle Khrista füikya notom ma kem kux ang tüikya mongong hia mongkün ma chiatsai le ngolax.

¹⁴ Otsao Chasa owa kem ma ngopuix, chix tsakzong makhange, nang ang fale tüikya amüikya oli chiamütle thomlax.

¹⁵ Asia haxtok angkya Faigilo ilaxle Hamogini bue to lünle pangnusae wüi ku chilaxle awütkya nange awan ngopu.

¹⁶ Onesifora hwom homkha ang Zange chingcha naxaho, chemthüikoxle chixe obi thomthom ma hexle ku mong amüi daoa. Ku kun to tüikya bama chix chiazak,

¹⁷ ikoxle kue Rom tingnu alopkya füi shemle ma-atak ma-atak le chixe ku lom.

¹⁸ Ija nyix Jowanpa-e chix ang chix chingcha naxfa kox! Üntoxle Efisia ma tüipongmachu chixe ku hanpakma otukux mokdaopuix nange sümüile awan ngopu.