2 SAMUEL 9 - OTSAO BAIBEL (BSI)

Dawid hia Mefibosheth nyi

¹ Nyixta Dawid-e atüi: “Sol homkha ota toxkya owawa müntüi hexnyi? Owawa jangtüi thüiningle Jonathan mün ma kue chix to chingcha ahose tsule.”

² Sol homkha angkya dapa tuita Ziba le amünkya mix tüikya, ilaxle chix a Dawid hato ngui angkya akax. Wanghompa-e atüi: “Nang a Ziba changchami?” Chixe lan: “Changle, ku nang dapa Ziba changpu.”

³ Wanghompa-e chix ma atüi: “Kue Zang füi tsaosaxle changdaokya ningle, kue e-sekya tamchu chingchakya aho ang tsuakkya lima Sol homkha khünak owawa tütüichahex?” Ziba-e lan: “Athaxchu Jonathan sasün tuita tüile. Chix a chafai mix changle.”

⁴ Wanghompa-e atüi: “Chix ojongto tüipu?” Ziba-e lan: “Lodebar ma Amiel sasün Makir hom ma tüile.”

⁵ Ikhoma wanghompa Dawid-e chix apüi ang tsanle apao.

⁶ Chemtue Mefibosheth, Jonathan sasün tamchu Sol susün nguipuix, chix chathua zakya ahole Dawid chitong ma akhuxle shwom. Dawid-e nyak: “Mefibosheth.” Ilaxle chixe lan: “Alixachong, ku nang thotha manzai ang ikhama tüile.”

⁷ Dawid-e thüi: “Taxza, hünpa Jonathan khoma kue nang ang chingcha ahoüi. Hünpu Sol haxtok pangwüi kue nang ang achatle koxüi, ilaxle nang ku fongsüt ma wom angkya jento pongle koppu.”

⁸ Anaole chu akhuxlaxle Mefibosheth-e thüi: “Alixachong, ku a tuita hi mang tha ngaxchu münchang! Nange ku to ipongpong chemkhoma chingcha aho angkya tüi?”

⁹ Ifüima Sol dapa Ziba se ilaxle Dawid-e thüi: “Kue Mefibosheth, nang hopupa Sol susün ang, Sol kux chempang tüikya hex, komkaile achat koxpu.

¹⁰ Nang, nangsu-nangsa hwom ilaxle nang dapabue nang hopupa Sol hwom homkha hanpakma manzaile alailaxle hwom woktuxle chang angkya hanpakma ibu sax zütle wünkoxüi. Ikoxlechu Mefibosheth a othuithuima ku mamix ang ngoüi.” (Ziba ma naosom 15 ilaxle dabu 20 le tüikya.)

¹¹ Zeba-e lan: “Wanghompa, nange atomtom kue bakle moküi.” Ikhoma Mefibosheth-e fong a wanghompa tsap ma saxle tuita wanghom sasün thatha ma ngo.

¹² Mefibosheth ang sasün tuita Mika le amünle tüikya. Ziba hwom homkha pangwüi Mefibosheth da ang achang.

¹³ Ikhoma Mefibosheth tuita pangnyichi cha faikya khünak chang koxlechu Jerusalem ma ngolaxle wanghompa tsap ma saxlaxle hüi.