2 SAMUEL 7 - OTSAO BAIBEL (BSI)

Dawid hato Nathan Kaxho

¹ Wanghompa Dawid a chix wanghom homlo ma ajingle ngo, ilaxle Jowanpae chix a chix zanpabu pangwüi chak tokya khosünle thom.

² Ifüima wanghompa-e ajepa Nathan ang thüi: “Ku ikhama Sedar pün füi zingkya homlo ma ngopu, ikoxle Jowanpa Tsaotsüt Suak mix a Nyihom to thomtüi!”

³ Nathan-e lan: “Nang mong ma chemle hüipuix ile mokkox, chemthüikoxle Jowanpa a nang füi tüile.”

⁴ Ikoxle ija ja Nathan füi Jowanpa akax,

⁵ “Paokox ilaxle ku dapa Dawid ang kue chix füi ile akaxle le wünkox: ‘Ku hanpakma Zangshwom-Hom zai angkya mix a nang münchang.

⁶ Israel nok Ijip nok chak tokya alaile apüikya makhange anyix kopkya mong ma, ku chemtuechu zangshwom-hom ma mango; ku a ojongjong tochu Nyihom ma ahamle ngotan.

⁷ Israel khünaknu füi aham fofole, kue kamle kopkya lompabu owaechu, ku zangshwom-hom a sedar pün füi büthüikoxle chizingpule ma-atüi.’

⁸ “Idaile ku dapa Dawid ang Jowanpa Khüthak Zang-e thüitüia, ‘Kue nang a faokha to chun nyele ngokya chifün tokya Israel nok lompa ang lax ang nyakle koppu.

⁹ Nang apaopao pangkha towüi ku nang füi womle tüikya, ilaxle nang zankat foto kue nang ang zanpabu to lüt ang tompu. Kue nang a tüle zangle wünkya khünak tuita ang, chaxwan tokma chongkya-chongkya lompabu ningle achangüi.

^10-11 Kue ku khünaknu Israel nok hanpakma onui kamdaoa ilaxle hwom a ima tingtan nokzingle ngo ang tomdaoa. Ikhato mixnok owaechu hwom to apün-awangkya chitüile ngo ang tomüi. Hwom ija haxtok to namnguikya makhange chang-nong pünthomle tüikya khünakbue hwom to single hüipu, ikoxle iningkya tamchatle chitüiüi. Kue hünzom a hünzom zanpabu pangwüi chak tokya sünle thomüi ilaxle hünzom ang simüi-limüikya faüile tsaosaxpu.

¹² Chemtue nang zile paoüihex ilaxle hünpu hünpa hwom füi tomle akhünle changüihex, kue nang sasün hwomkha angkya tuita wanghom ang zingüi ilaxle chixe wangting tüle tsak-zongle thomüi.

¹³ Ku hanpakma Zangshwom-Hom zing angkya a chix tix changüi. Kue thüipu, chix wangting a othuithuima ngoüi.

¹⁴ Ku a chix hopa ang changüi. Kue chix to hopa tuitae samakya ningle samale tüiüi.

¹⁵ Ikoxlechu Sol dantoxkya lailaile chihu-chimele kue chix mündantox. Sol a kue nang wanghompa ang achang tsuak angkya kuxmale apaopu.

¹⁶ Nang ang jento sixlibu tüile ngoüi, ilaxle kue nang wangting a oshuk chitüile tsünlole ngo ang tomüi. Nang wangting ma oshuk müntüiüi.’”

¹⁷ Nathan-e Dawid hama Jowanpae chix hama angaikyakya kax komkaile wünle kox.

Münchong Fakya Dawid Zangjop

¹⁸ Ifüima Dawid a Jowanpa ngwotnui Nyihom to pao, ikhato thung ilaxle zangjop: “Nange ku to chemle humele hüidaopuix, ibu atak-apong koxle ku ma ojao münasu.

¹⁹ Ikoxle nange athax sisi sümokmokpu, Khüthak Jowanpa, nange athax füichima tüi angkya ku sixli hanpak tsaosaxle changpu; nange ija a khünake ngün ang tomfa, Khüthak Jowanpa!

²⁰ Kue iboma nang füi chem zextsuaküi! Nange ku awanle ngopu, ku a nang dapa tuita.

²¹ Ija ile mok angkya nang mongtex tamchu nang tutex changkya; nange ku hama anwot-ano angkya hanpakmale changkya mwot ibu pangwüi mok.

²² Nang a chemkuxma chongpuix, Khüthak Jowanpa! Nang lailaikya owachu müntüi; Zang a nang tata wüile kue jento awanle hüipu.

²³ Hwom nang khünaknu ang lax angkya hanpakma Israel nok lailaile da ang ngokya nange danle changkya chaxwannu mama jat-li owachu müntüi. Hwom hanpakma nange mokkya chongkya tamchu ohünotün mwotbu tokhange nang mün chongkya zangfang pangnu khato ule. Nang khünaknu ang, Ijip nok chak to da ang ngokya nang khünaknu nguikya zuma nange mixjat-mixli hia hwom baozangbu jwonle apao.

²⁴ Nange Israel nok a othuithuima nang khünaknu ang zing, ilaxle Jowanpa, nang a hwom Zang ang achang.

²⁵ “Ilaxle athax, Jowan Zang, nange ku tamchu ku su-sa hwom hanpak ang tsaokya, pangwüi changle kotok to ngai ang tomfa. Nange moküihex-ole tsaokya pangwüi mokle fahüi.

²⁶ Nang mün a huanuma chongüi, ilaxle khünaknue jento thüiüi: ‘Jowanpa Khüthak Zang a Israel nok khangkho ma jento ngole.’ Ilaxle nange ku wangting othuithuima sünle thomüi.

²⁷ Khüthak Jowanpa, Israel nok Zang! Kue ija zangjop jop angkya to mongchongle, chemthüikoxle nange ku nang dapa hato ibu pangwüi ngaile aho, ilaxle nange, ku su-sa hwom wanghom ang achangüihex-ole thüi.

²⁸ “Ilaxle athax, Khüthak Jowanpa, nang a Zang changle; nange nang kaxtsaobu jento thom, ilaxle nange ija ohünotün kaxtsao ku hanpakma tsao.

²⁹ Ku su-sa hwome nang mohiman ma chizakle mongmüile ngo angkya kuxma, kue nang ma ku sixli hwom to mohimanhüile tikpu. Nang, Khüthak Jowanpae ija kaxtsao koxpu, ilaxle nang mohiman ku sixli hwom füi jento ngoüi.”