2 SAMUEL 6 - OTSAO BAIBEL (BSI)

Tsaotsüt Suak a Jerusalem to Apüi

¹ Anaole chuwüi Dawid-e Israel nok süpahi sümüimüi sele asox, pangwüi athütle 30, 000 khünak,

² ilaxle, Khüthak Zang mün ma ozang füikya zünmokbu ding ma thungle tüikya Jowanpa Tsaotsüt Suak apüi angkya hanpakma hwom a Judah angkya Balah hato ngui.

³ Hwome ija hax ohua ma tüikya khato tüikya Abinadab hom ma tüikya lax ilaxle ija maihu-kanlin ding ma dan. Uzah hia Ahio, Abinadab sasün nyie ija maihu-kanlin aham.

⁴ Ahio a ija maihu-kanlin tunthochi ma aham.

⁵ Dawid hia Israel nok pangwüi Jowanpa achuak-achenle zongbakle azüi. Hwome klingkingkongbu atüitüi angao; büibu hong sambu thu, ilaxle khopsya hia jan-waxkapbu akhaole chang.

⁶ Nakon kux tsaxnak nui alopkya zuma maihu ang chikho thu, ilaxle Uzzah hüilaxle Tsaotsüt Suak düt ang thüikya hale kop.

⁷ Ima wüi thüile Uzzah füi Jowanpa ang mongtsik ilaxle chix chazakya chitüile Suak to twonle changkya ochax khoma Uzzah a ija Suak zui ma zile pao ang tom.

⁸ Ikhoma ijongkha ang emakhange Perez Uzzah le nyakle hüi.

⁹ Ifüima Dawid-e Jowanpa chathua zalaxle thüi: “Athaxpi kue ija Tsaotsüt Suak ku füi tomle chemle laxlaxtox angkya?”

¹⁰ Ikhoma chix füi tomle ija Suak Jerusalem to laxlaxle chingui angkya Dawid-e mongzangwünle tsuak. Ikoxle chixe ija Suak a mama lomkua to paolaxle Obed Edom hom to apüi. Ija mixsün a Gath tingnu angkya khünakbu füi haxnu-homsa tuita changkya.

¹¹ Ija a ikhato lyetjang azom thom. Jowanpae Obed Edom hia chix homkha to mohiman.

¹² Ija Tsaotsüt Suak khoma Obed Edom homkha hia chix ma atüitüi pangnuli to Jowanpae mohimanle changkya Dawid na to wang. Ikhoma chixe ija Tsaotsüt Suak Obed Edom hom angkya alaile pao ilaxle chongle pu-chokya füi ija a Jerusalem to apüi.

¹³ Tsaotsüt Suak paikya khünakbu chikap azoklükya füikya, Dawid-e maihupong tuita hia chun hosa tuita le lang ilaxle Jowanpa ang tö koxle changpongma hwom zak ang tom.

¹⁴ Dawid-e chix khyadax ma wokhit nyi füi ngui ilaxle chix zongzong ma Jowanpa achuak-achenle azüi.

¹⁵ Tüle mongmüi-tungle akhongle tamchu nyazongbu mütle, chix ilaxle Israel nok pangwüie ija Tsaotsüt Suak a Jerusalem alople apüi.

¹⁶ Ija Suak tingnu to anople ngopongma, Sol sacha Mikal-e thangmik makhange hukoxle Dawid a azüizüithale füt-shwon ngokya ngünle lax, ilaxle she mongto chix thua anule chang.

¹⁷ Hwome ija Suak apüilaxle, Dawid-e ija dan ang onui zingle achwon thomkya Nyihom ma ija Suak dan. Ilaxle chixe Jowanpa ang mama tö hia notom-tusüi tö, ibu koxle Zang shwom.

¹⁸ Chixe tö koxkya zangshwom ashuk füima Jowanpa mün male Dawid-e khünaknu to mohiman,

¹⁹ ilaxle hwom pangwüi ang sütling ahanle kox. Chixe Israel khünak sheko-lüka pangwüi ang an tuipong kox, atsankya müi funpong kox, ilaxle khünaknu a mahom-hom to chat.

²⁰ Ifüima, chemtue Dawid chix homkha khünakbu hato mongmüi kaxho kox ang nguipuix, Mikal chix füi apong ang zikle lai. She-e thüi: “Anyix Israel nok wanghompa-e chix hanpakma chix mün huanuma achenle nwondaoa. Chixe chix nguakax-wangkhobu hia danuchabu hato tuita angapa ningle ahodaoa!”

²¹ Dawid-e lan: “Ku a Jowanpa achuakle azüi wüi. Jowanpa a, hünpa man ma, chix khünaknu Israel nok lompa ang ku kamle kopkya Zang changle. Ilaxle Jowanpa achuak ang ku ilele wüi azüi ngo angkya changpu,

²² ilaxle kue sisile ku a ongat-ongüi ningle ahao angkya changpu. Nange ku ang chem changkya le thütkoxlax, ikoxlechu shekobue ku to tüle achuak-achenle changüi!”

²³ Sol sacha Mikal ma tsünjang ma sule naosom chingui chidongle chang.