2 SAMUEL 24 - OTSAO BAIBEL (BSI)

Dawid-e Khünak Akiak

¹ Mama tukechu Jowanpa ang Israel nok füi mongtsik, ilaxle chixe Dawid makhange hwom hato tingtui apüi angkya tsan. Jowanpae chix ang thüi: “Paolax üntoxle Israel hia Judah angkya khünak huak akiakle changkox.”

² So Dawid-e Joap, tuita chix süpahi lompa akhokya mix ang kaxkoxle thüi: “Nang nguakax-wangkhobu füi tomle paokox, ilaxle Israel nok pangnu saxthom-homjen hato chaxwan tüchi makhange atachi alople paokox, ilaxle khünak huak akiakle changkox. Hwom chemtukux tüipuix kue awanse tsule.”

³ Ikoxle wanghompa kax to Joap-e lan: “Wanghompa, Jowanpae Israel khünaknu a anyix tüikya to othom hotae nüile pu-tsale chang ang naxtom, ilaxle ibu ngün ang kople Jowanpae nang tsünlo-zaknuile ngo ang naxtom. Ikoxle wanghompa, nange ija büthüi ang akiaksele tsu?”

⁴ Ikoxlechu wanghompae Joap hia chix nguakax-wangkhobu ang chix kaxtom apa ang wüi tom; chix tuntho angkya hwom achex ilaxle Israel khünaknu akiak ang pao.

⁵ Hwome Jordan shuanu tale le ilaxle Aroar zongma shuathongchi ma pomzaile athong. Ija a Gad haxsüt angkya haxsha osungkha ma tüikya tingnu tuita changkya. Ikha angkya hwom shuakux chito Jazar to dong,

⁶ ilaxle Hit nok haxsüt tokya Gilid hia Kadesh to le. Ifüima hwom Dan to pao, ilaxle Dan makhange hwom hannop chito Sidon to le.

⁷ Ifüima hwom zün-zinglaxle ziakople tüikya Tair tingnu to le, ikhato hwom Hip nok tingnubu hia Kanan nok tingnubu pangnu khato le, oshukma shuathongchi Judah ma tüikya Bersheba to le.

⁸ Ile hwom haxtok okhui apongle aham laxle lyetjang aku nyixtsa füima hwom Jerusalem to chat.

⁹ Süpahi mwot to süttang zia to dongle tüikyakya: 800, 000 khünak Israel ma ilaxle 500, 000 khünak Judah ma atakle tsuakkya hwome wanghompa hato kaxwün wangle ngui.

¹⁰ Ikoxle ile Dawid-e khünak huak akiakle changkya füima, chix tutex mongto po ang süt, ilaxle chixe Jowanpa ang thüi: “Ija mwot mokkya bama kue khompua-zadün ochax lyenle changdaoa! Chingchalaxle ku ang thailak tüihüi. Kue ija ongat ningle mokdaoa.”

^11-12 Jowanpae Gad, Dawid ajepa ang thüi: “Kue Dawid ang, chix mong atsutsu tütapu changlax mok angkya mwot zünle kop angkya hanpakma chix ang mwot oli azom koxle ngokya wünle laxkox. Chixe oja zünle koppuix, kue ija moküi.” Ofüinop Dawid jipzole changkya füima,

¹³ Gad chix hato pao, Jowanpae chem akaxpuix ija chix hama wünle kox, ilaxle atüi: “Hünzom haxtok ma zanglao azom nuaknu le le chang angkya chichangba hünzom zanpabu thoto lyetjang azom paole samngo angkya chichangba hünzom haxtok ma nyix azom kaknu-laknu le angkya, ibu opupu naxchanglaxle thüiüi? Jowanpa hato kue kaxnong chem laxlaxle chatüi, ibu bama athax müile ajang koplax.”

¹⁴ Dawid-e lan: “Ku a khosam-ashukle tüile! Ikoxlechu kue khünakbue ku to zothuple chang angkya laxle müntsu. Kwom to Jowanpa chix jaojaoe zothuple naxachang kox, chemthüikoxle chix a chingcha füikya Zang changle.”

¹⁵ Ikhoma Jowanpae Israel hato kaknu-laknu ahüi, ija a ija nop makhange owang wangkya chixe zünle kopkya hanpak kople ngo. Hwom haxtok kaochi makhange ata-kaochi alopkya mong ma Israel nok hajat puzom bün zile pao.

¹⁶ Chemtue Jowanpa kaxtaimixe Jerusalem amütüi-khakha tüikya hex, chix khünaknu to sikngün fale changkya bama Jowanpa ang mong alüix ilaxle hwom langle hüikya kaxtaimix ang chixe thüi: “Zakün! Ibibi wüi nguidaoa!” Ija kaxtaimix a Jebu nok Araunah tsaxnaknui zui ma tüikya.

¹⁷ Dawid-e khünaknu langle hüikya kaxtaimix ngünle lax ilaxle Jowanpa ang thüi: “Thaikya mix a ku changpu. Ochax mwot mokkya khünak a ku changpu. Ibu mixshix-zasabue chem zia amadaopu? Nange ku ilaxle ku homkha towüi zothuplax angpu?”

¹⁸ Ija nyix-nyix wüi Gad a Dawid hato ngui ilaxle thüi: “Araunah tsaxnaknui to donglax ilaxle Jowanpa ang tö-tsap tuita zinglax.”

¹⁹ Dawid-e Jowanpa kaxtom kax ma lax ilaxle Gad-e akaxkya ningle pao.

²⁰ Araunah-e hukoxle Wanghompa hia chix khünakbu chix hato dongle ngokya ngün. Chixe Dawid chitong to chix alüile tswonle awütle akhux

²¹ ilaxle chixe atüi: “Nang ikhato chem mok ang nguipu?” Dawid-e lan: “Kaknu-laknu atsao angkya hanpakma nang tsaxnaknui shaklaxle ikhama Jowanpa hanpak ang tö-tsap tuita ajong angkya hanpakmale nguipu.”

²² Araunah-e thüi: “Wanghompa, ija laxlax ilaxle ikhama nang küntsu monglua ma Jowanpa ang chem koxse hex laxkox. Tötsap dingma tö koxle zokle ashun angkya hanpakma ikhama maihupongbu tüile; ima ha ang lax angkya hanpakma hwom han hia tsaxnak dang, ibu ikhama tüile.”

²³ Araunah-e ija abakle wanghompa ang kox ilaxle chix ang thüi: “Jowanpa nang Zang-e nang tö pongle naxkop-hüi.”

²⁴ Ikoxle wanghompa-e lan: “Athax, kue ija omün nang ang koxüi. Kue otha koxle shakkya chichang homkya chemlichu kue Jowanpa ku Zang ang kue tö koxle münchangüi.” Ilaxle chixe ija tsaxnaknui hia maihupongbu khop ngunkhix punyi-bün koxle shak.

²⁵ Ifüima chixe Jowanpa ang tö-tsap tuita zingle ajong ilaxle ikhama zokle ashunkya tö hia tumüi töbu kox. Jowanpae chix zangjop to la ilaxle Israel haxtok angkya kaknu-laknu zak müi.