2 SAMUEL 16 - OTSAO BAIBEL (BSI)

Dawid hia Ziba Nyi

¹ Dawid haxnukho akaile hidaole lekya füima, chixe athule Ziba apong. Chix a Mefibosheth dapa changkya. Chix ma mantsak anyi ma, ankhao 200 hia grep tswon 100, fupziak zan 100 ilaxle greptie awangkya müikhwon nyitsong tuita, ibibi füi hünzing üntoxle tüikya.

² Wanghompa Dawid-e chix ma atüi: “Nange ibu omalaxüi?” Zeba-e lan: “Mantsak a nang kako nga angkya hanpakma, ilaxle fupziak zan hia anbu a khünakbue sax angkya hanpakma, ilaxle grep chuwüi hwom faokha to na-juale changpongma naxlinglax ang koppu ta.”

³ Wanghompa-e atüi: “Nang hopupa Sol susün Mefibosheth omaün?” Zeba-e lan: “Chix a Jerusalem ma ngole, chemthüikoxle athaxpi Israel noke chix ang, hopu Sol wangting chatle koxüile chix mongto ongkya tüile.”

⁴ Wanghompa-e Ziba ang thüi: “Mefibosheth kux nang ma athax chempang tüipuix, ibu pangwüi nang kux changpu.” Zeba-e lan: “Ku a nang dapa tuita changle, ku a jento nang ang mong amüile thom ang ngoüi!”

Dawid hia Shimei Nyi

⁵ Chemtue wanghompa Dawid Behurim to nguipuix, Sol füi ma-mix Gera sasün Shemei chix füi apong ang lai. Chix a wanghompa to thuakzomngale lai.

⁶ Dawid a chix khünakbu hia chix nyetmixbue akankhople tüikya khato Shemei-e Dawid hia chix nguakax-wangkhobu to long füi thup ang süt.

⁷ Shemüi-e chix to thuakzomle thüi: “Paoün! Paoün! Nang ningkya mixlang mix a!

⁸ Nange Sol wangting pale laxpu, ilaxle athax a, nange Sol hwom homkha khünak huanuma langle awütkya khoma nang to sikangünpu. Nang chak angkya wangting a Jowanpae hünsa Absalom ang koxdaoa, ilaxle nang mix lang mix, nang a maxpu!”

⁹ Abishai, owa honu Zarüiah changkya hex, chixe wanghompa ang thüi: “Wanghompa, chuja hia ang nang to büthüikoxle thuakzomle chang ang tompu? Ku ikhato hüilaxle chix khang düt-hax!”

¹⁰ Wanghompa-e Abishai hia hotüi Joap hokhi ang thüi: “Ija a hünkhi mwot münchang. Jowanpa kax khoma chixe ku to thuakzomle changkya jangchang, ile büthüikoxle thuakzompule owae satsuak angkya?”

¹¹ Ilaxle Dawid-e Abishai hia chix nguakax-wangkhobu ang thüi: “Ku a ku sasüne lang ang tungle ngopu; idaile ija khoma hünzome Benjaminbu büthüikoxle abüt angkya? Jowanpae chix ang thuakzom angkya akaxpu; idaile chix to chemchu chithüile chix tata dantox dao.

¹² Owatsing Jowanpae ku sikngün ngünle laxüi ilaxle ija chix thuakzom lüi ma lax ang ku ang mohiman ozüita fale chuwüi changtüilax.”

¹³ Ikhoma Dawid hia chix khünakbu chizakle thuithuile le. Shemüi hwom füi tomtomle haxhua chito dongle azüi; ile chix hwom to thuakzomle tamchu long füi thuple hia haxthombue thuple azüi.

¹⁴ Jordan alopkya zuma wanghompa hia chix khünakbu a huanuma na-juale max

Jerusalem ma Absalom

¹⁵ Absalom hia chix füi tomle tüikya Israel khünakbu pangwüi Jerusalem to dong, ilaxle Ahithofel a chix füi tomle tüikya.

¹⁶ Chemtue Hushai, Dawid-e mongongle tüikya zuikhui füi Absalom apongle changpuix, chix akhong: “Wanghompa Tsünlole changhüi! Wanghompa tsünlole changhüi!”

¹⁷ Absalom-e chix ma atüi: “Nang shempa Dawid to nange ipongpongle e-sele ngokya athax büthüipu?”

¹⁸ Hushai-e lan: “Ku büle paoüi? Ku Jowanpae zünle kopkya tamchu khünaknu ibue zünle kopkya ilaxle Israel nok noknue zünle kopkya füito ku tüipu. Ku a nang füi towüi ngoüi.

¹⁹ Kue ku hopupa tho chithale owa thotha haxkux? Kue chemle hünpa thothale hüipuix, ilailaile athax a nang thotha angkya changle.”

²⁰ Ifüima Absalom-e Ahithofel chito aküile hulaxle chix ang thüi: “Athax keme ikha alopüna, nange kwom ang chemmok angkya apuale faüi?”

²¹ Ahithofel-e lan: “Paokox ilaxle hünpae homlo nyelax-ole danle toxkya chix danucha hwom pangwüi füi jip-pomle changkox. Ifüima Israel khünak noknusae nang a hünpa zongto zan ang changdaoale awanüi, ilaxle nang füito azüikyabu ang tüle zongdongle changüi.”

²² Hwome Absalom hanpakma wanghom homlo ma homkho to nyihom tuita zingle kox, ilaxle noknue ngünle donglaxle Absalom a hopae toxkya danucha hwom pangwüi füi jip-pomle chang.

²³ Ipongma Ahithofel kax a tuita Zang kax tukuxle hwome pongle lax; Dawid hia Absalom hokhi pangnyie wüi chix kax ma lax.