2 PUKAX-PANGAO 9 - OTSAO BAIBEL (BSI)

Sheba Wangchanue Waikya

¹ Sheba nok wangchanue Solomon mün fuale wünkya atat, ilaxle chix to atuakle wan ang Jerusalem to ngui. She füi tomle thothat mixbu huanuma laxlaxle she ngui, ilaxle ongan müikya münga, likwün hia okhonguile hun, ibu füi hünzing laxle utbu füi ngui. Chemtue she-e Solomon füi apongle changpuix, she mongto texle atakkyakya pangwüi chix ma atüi.

² Chixe ibu pangwüi to lan; chix zongto ibu awanle fa ang khosamkya tuita ngaxchu chitüi.

³ Sheba nok wangchanue Solomon hwon-je atatle lax tamchu chixe zaile alaikya wanghom homlo ngünle lax.

⁴ Chix tsap ma shemle fakya sütling she-e ngünle lax; chix nguakax wangkhobu hom-pung tüle müikyabu ngünle lax, wanghom homkha sütmwot tüle müikya hia wanghom homlo ma sütmix mwotmixbu tamchu hwome awunkya nyizabu, fongkhat ma chix to humele fakya dabu üntoxle chu Zangshwom-Hom ma chixe koxkya tö, ibu pangwüi ngünle lax. Ibu ngünlaxle zakdün jao alakle abüt.

⁵ She-e wanghompa Solomon ang thüi: “Kue kwom chaxwan to nang bama tamchu nang je-hwon bama atatle laxkya otsing tomtata changdaongün a!

⁶ Ikoxlechu onui alople nguilaxle ku mik tomtatae ibu pangwüi ngünle machang tanto kue münongkya. Ikoxle kue atat ang kopkya a ibu süifi süitex ngaxchu münchangdao ngün-a; nang je-hwon hia tuina ku hama wünle fakya füi ngaxchu luile tüingün-a.

⁷ Jento nang zui ma ngolaxle nang je-kax hwon-kaxbu apale nang thotha ang kopkya khünakbu chemtukuxkya shomüimixbu hex!

⁸ Jowanpa nang Zang achuak kox. Nang Israel nok wanghom ang achang laxle nang füi chix mongzom ibukux müipule ahodaoa, chemthüikoxle Israel hanpakma tüikya chix mongkün a oshuk chitüikya changle, ikhoma nange chix wanlom to laxle sukya kaxfün thom angkya hanpakma chixe nang wanghom ang zingpu.”

⁹ She-e apüikya she hingho ibu Solomon ang kox: Hun tuak 4000, ilaxle ongan müikya münga hia likwünbu huanuma kox. She-e chix ang koxkya ongan müikya münga ibu a, chixe chemtuechu mix hingho ipongpongle tümakoptox le tüikya. (

¹⁰ Ofir tokhange hun apüikya Hiram khuae junipar pün hia likwünbu huanuma apüile kox.

¹¹ Junipar pün makhange wanghompa-e Zangshwom-Hom hia wanghom homlo ma lax angkya thongnu, fakngom üntoxle chix tsaipabue lax ang thuaput-waxmaibu zing. Anyix kople ija ningle junipar pün chemtuechu chihüi üntoxle ngün ang chikop.)

¹² Wanghompa Solomon-e ma wanghom homlo zai ang thomkya mwot-kat kha angkya, she-e apüikya hinghobu olüi huanuma kox, iboma ngaxchu Sheba nok wangchanu ang she-e laxse tsukya ajuju pangwüi koxle apao, ifüima ma dabu koplaxle she a ma chaxwan to chat.

Wanghompa Solomon Tuina

¹³ Hun shak-sünle changkyabue koxkya süi hia thalex-juatai ma kopkya olüi tamchu Arab nok wanghombue tamchu Israel nok haxsüt-haxsüt tokhange apüikya süi tok to onüi,

¹⁴ wanghompa Solomon-e zanglao to hun otuak ma 23, 000 pong kople ngo.

¹⁵ Solomon-e chongkya-chongkya dibu 200 zing, ilaxle ibu pangwüi to hun tuak anüt pong füi lile chwop.

¹⁶ Chixe hixkya dibu chuwüi 300 zing ilaxle ibu pangwüi to hun tuak anyi pong füi lile chwop. Chixe di ibu pangwüi Lebanon fao ma tüikya Homnu tuita ma thom.

¹⁷ Chix ang wanghom tüntong chuwüi chongle zingkya tuita tüikya. Ija jongta kha ang luakzong füi zing ilaxle mama pangwüi khato müikya hun füi chwop.

¹⁸ Ija tüntong a chifün azok donglaxle zaile tüikya. Ochabu ma tiale hun füi chwoplaxle ochifabu tüikya; ilaxle atale chaklwotnui tüikya ilaxle pangnyichi ma mailang zinglaxle tüikya.

¹⁹ Chifün ma tiale atadingle mailang mua zinglaxle tüikya. Ija lailaikya wanghom tüntong owa wangting tochu chitüi.

²⁰ Solomon ti ling wansa pangwüi hun füi zingle tüikya, ilaxle Lebanon fao ma tüikya Homnu angkya tiklak pangwüi hun füi zingkyakya wüi changkya. Solomon din to khop a wünlixle chitwon

²¹ Chix ang Hiram khua füi tomle aham ang tinu mongto aham angkya khua tüikya. Chix khua a zanglao azom obaba ma hun, khop, luakzong, müinak hia müisabu koplaxle chatle aham.

²² Wanghompa Solomon a wanghom pangwüi füi jetüi-hwonlang tamchu ahak-aluale tüikya.

²³ Zang-e chix ang koxkya je-kax to apa ang noknusae chix ma tsaitik-kaxshole chang.

²⁴ Chix hato ahüihüi pangwüi hingho-chaktwon ang: khopjan, hun, nyi-za, chang-hi-pax, ongan müikya münga, manbu hia mantsakbu koplaxle zangpua foto ngui.

²⁵ Wanghompa Solomon ang chix man-kanlin hanpakma, ibu thomnui pom 4000 iboma manbu tüikya, anaole chuwüi mankho makhange azan angkya süpahi 12000 tüikya. Züizüi chixe Jerusalem ma thom ilaxle mamabu a tingnubu to tiale thom.

²⁶ Ufrat Shuanu angkya, Filistia hia Ijip nok longzipong alople tüikya haxtok wankam ang chongwangpa hanpak changkya.

²⁷ Chixe apünle ngopongma khop-jan a Jerusalem ma long büta noknusa chak to tüile ngokya, ilaxle sedar pün a Judah nok haxnucha tokya zangjang saikomor pün büta awangle tüikya.

²⁸ Solomon-e Musri hia mama chaxwanbu tokya manbu apüi.

Solomon-e Apünkya Pukax Moxmoxle

²⁹ Owang makhange oshuk kople Solomon pukax mama a Ajepa Nathan Pukax Laipex ma, Siloh angkya Ahijah Aje kax ma ilaxle Iddo Mikngün-ohün, ojae Israel nok Wanghombu Pukax Laipex wanghom Jeroboam-e apünkya mochu wünle tüile.

³⁰ Solomon-e Jerusalem makhange Israel nok pangnu thakma zanglao 40 apün.

³¹ Chix zi ilaxle Tingnu ma akhün, ilaxle chix sasün Rehoboam chix man ma wanghom ang achang.