2 PUKAX-PANGAO 5 - OTSAO BAIBEL (BSI)

¹ Chemtue wanghompa Solomon-e Zangshwom-Hom zaikya mwot tsuakle hüipuix, hopa Dawid-e Jowanpa ang atsaole koxle toxkya tuina pangwüi chixe Zangshwom-Hom pungkha ma sho, ibu a hun, khop hia mama mwot-katbu pangwüi.

Tsaotsüt Suak a Zangshwom-Hom to Apüi

² Ifüima wanghompa Solomon-e, Dawid tingnu,, Zaion angkya Jowanpa Tsaotsüt Suak, Zangshwom-Hom to apüile chang angkya hanpakma Israel nok saxthom hia homjen lompabu pangwüi Jerusalem ma asox angkya kaxkox.

³ Hwom pangwüi Pomsa Pangpwon to pongma asox.

⁴ Chemtue hwom lompabu pangwüi asoxle changpuix, ipongma Liwi hwome ija Suak nwon,

⁵ ilaxle ija a Zangshwom-Hom to azyale apüi. Zompu-zangpabu hia Liwi hwom, ikha angkya Jowanpa Womle tüikya Nyihom ilaxle ima tüikya mwot-kat pangwüi Zangshwom-Hom to apüi.

⁶ Wanghompa Solomon ilaxle Israel khünaknu pangwüi ija Tsaotsüt Suak tunthoma asox ilaxle okiak chithole chun hia maihubu tö ang kox.

⁷ Ifüima zompu-zangpabue Jowanpa Tsaotsüt Suak, Zangshwom-Hom homkhato azyale adün ilaxle ija Ataxkya Otsao Nui ma, ozang füikya zünmok fang ma dan.

⁸ Ija müi nyi ozang pünkyae Suak hia ija paikya dang to o.

⁹ Ataxkya Otsao Nui fülom ma tangthole ajongkya mixe ija dang tun ngün ang kop, mama khato khange a ija ngün ang chikop. (Dang ibu anyix kople ikhama wüi tüile.)

¹⁰ Ijip nok tokya Israel khünakbu laile paokya zuma, Jowanpae hwom füi Longzale Kaxfün laxle changpongma chixe Mosa ang koxkya Longkhao anyi, oja Mosa-e Sinai Haxnukho to tüipongma shole laxkya hex, ija Longkhao boma Suak mong ma chemchu chitüi.

Jowanpa Fuazang

^11-14 Ikhama asukya zompu-zangpabu, hwom tüta othom tokya wüi changlax, chisüile, hwome pangnue wüi ma alüile atsao. Ilaxle Liwi hwom tsaipabu: Asaf, Heman ilaxle Jeduthun, ilaxle hwom saxthom khünakbu a jaknyi awunlaxle tüikya. Liwi hwom a tö-tsap zongma handünchi kao ma ajong. Hwom a khopsya hia waxmaibu koplaxle tüikya, ilaxle nyazong mütle 120 zompu-zangpabu hwom füi tomle tüikya. Tsaipabue: “Jowanpa achuak kox, chix a müikya changle, Ilaxle chix mongkün ma oshuk müntüi.” Le tsai ngaole changpongma, nyazong, khopsya, ilaxle mama klingkingkongbu tüle owon müile angao. Zompu-zangpabu Zangshwom-Hom angkya laile changpongma, Jowanpa womle tüikya zangchangjep hia zangfwom nyankyabu allele ikha awang ilaxle hwome zangshwomkya mwot tsuakle chang angkya hato ahüi.