2 PUKAX-PANGAO 34 - OTSAO BAIBEL (BSI)

Judah Nok Wanghompa Josiah

¹ Judah nok ma wanghom ang achang pongma Josiah a zanglao 8 changkya, ilaxle chixe Jerusalem ma zanglao 31 apün.

² Chixe Jowanpa zongto chem supuix ijaja mok. Chixe chix putong Dawid man to, ilaxle Zang wanlombu khünzule to.

Josiah-e Songsari Baozang shwomkya Zan to Ka

³ Josiah wanghom ang achangkya zanglao 8 lükya to, athaxchu chix naosün ang tüitan, chixe hopu Dawid Zang to shwom ang süt. Zanglao ali füima chixe songsari baozangbu to shwomkya onuibu, baozangchanu Asherah muabu ilaxle mama chapabu, ibu pangwüi ama ang süt.

⁴ Chix kaxtom ma Bal to shwomkya ngokya tö-tsapbu ama, ilaxle ija zui ma tüikya ongan müikya so zokle changkya tö-tsapbu atsunle ama. Asherah muabu hia mama chapabu hwome haxkhix labu ang achangle awüt ilaxle haxbu ibu a ibu to shwomle ngokya khünakbu zukting to chiak.

⁵ Hwome shwomle ngokya tö-tsapbu ding ma chixe songsari zompu-zangpabu zatua zokle ashun. Chixe ile mokkya makhange Judah hia Jerusalem a tamchatle zanglom ma otsao ang achang.

⁶ Manasseh, Efraim, ilaxle Simeon, ilaxle shuakuxchi Neptali alople, tingnu ibu tochu chixe ilailaile wüi mok.

⁷ Shuakuxchi wangting pangkha towüi chixe tö-tsapbu hia Asherah muabu amale awüt, chapabu haxkhi labu ang achang, ilaxle so zokle changkya tö-tsapbu thuple akhix. Ifüima chix a Jerusalem to chat.

Wanlom Laipex Atakkya

⁸ Chixe apünkya zanglao 18 lükya to, songsari baozangbu to shwomkya onuibu oli thule amütkya tokhange chixe haxtok hia Zangshwom-Hom otsao ang achangle dan füima, wanghompa Josiah-e Jowanpa Zang Zangshwom-Hom zingle amüi angkya hanpakma mixsün azom apao. Mixsün ibu a: Azaliah sasün Shafan, Maseiah, chix a tuita Jerusalem angkya gowarnor, ilaxle Joahaz sasün Joah, chix a nguakax-wangkho tuita, hwom bibi.

⁹ Nyetmixbu Liwi hwome saile athünkya, Zangshwom-Hom ma tüikya ngun a Nguakho Hilkiah chak to kox. Ija a Efraim hia Manasseh tamchu shuakuxchi wangting, ibu ma saikya, tamchu Judah, Benjamin hia Jerusalem, ibu ma saikya ngun changkya.

¹⁰ Ija ngun a Zangshwom-Hom zaikya to akhi ang ngokya mixsün azom chak to kox, ilaxle hwome ibu a

¹¹ pün zingpa hia long zingpabu chak to koxle, Judah nok wanghom hwome ama ang tomkya homnu azünle zaikya ma lax ang long hia püntsibu shak ang twon

¹² Ija mwot mokkya khünakbu a chithai-chithaxkyabu changkya. Hwom to Liwi sün ali: Merari saxthom angkya Jahath hia Obadiah nyi, ilaxle Kohath saxthom angkya Zekariah hia Meshullam nyi, hwom bibi changkya. (Liw hwom a pangwüi tsaipabu changkya.)

¹³ Mama Liwi hwom a longkhao hia püntsibu apüi angkya tamchu malom-malom mwot-katbu apuale kox angkya, ilaxle züizüie a mwot ibu laiza ma akiakle thom angkya hia nyetmixbu mwot mok.

¹⁴ Pungkha angkya ngun alaile changkya zuma, Hilkiah thoma Wanlom Laipex tuita bang. Ija a Zang-e Mosa ang koxkya Wanlom changkya.

¹⁵ Chixe Shafan ang thüi: “Kue ija Zangshwom-Hom ma Wanlom Laipex tuita atakle.” Chixe ija laipex Shafan ang kox,

¹⁶ ilaxle Shafan-e ija wanghompa hato apüi. Chixe thüi: “Kwome nang kaxtom pangwüi mokle alaidaoa.

¹⁷ Zangshwom-Hom ma thomkya ngun alailaxle kwome mwot mokmixbu hia hwom to hukya khünakbu chak to koxle changdaoa.”

¹⁸ Chixe chizakle thüi: “Ija a Hilkiah-e ku ang atwonle koxkya laipex changpu.” Chixe ija wanghompa-e atat ang azaxle ele kox.

¹⁹ Ija laipex ma tüikya wanlombu ele lekya atatkya füi tomle wanghompa-e mongto kaklaxle chix nyibu akyet

²⁰ ilaxle Hilkiah hia Shafan sasün Ahikam hokhi ang, Mikaiah sasün Abdon, khwa chakzamix Shafan, ilaxle wanghompa wangshem Asaiah, hwom bibi ang ibibi kaxtom kox:

²¹ “Paokox ilaxle ku hanpakma tamchu Israel hia Judah ma ngole tüikya khünaknu hanpakma Jowanpa füi tsaitik-kaxshole changkox. Ija laipex ma anwot-anole tüikya tsaitong-kaxza tikle laxhu. Kem putong hwome chix kax ma chilax tamchu ija laipex ma mokle lün angkya chempang zale tüipuix, ibu chemchu chimok, ile changkya khoma Jowanpa ang kem füi mongmakya tüingole.”

²² Wanghompa kaxtom ma, Hilkiah hia hozui hwom Huldah le amünkya mixcha hato tsaitik-kaxshole chang ang pao. She a Jerusalem tingzün chikao ma ngole tüikya ajenu tuita changkya. (She kakopa Shallum, Tikwah sasün tamchu Harhas susün, chix a Zangshwom-Hom nyi-za to hu-mix changkya.) Chempangle changpuix ibu hwome she hama bakle wünle kox.

²³ She-e hwom a wanghompa hato chatlaxle

²⁴ ibibi kaxho akaxle kox angkya hwom füi akax: “Oja wanghompa-e atatle ija laipex ma zale tüikya othuak-ozom kax ele atat daopuix, ija othuak-ozom füi kue Jerusalem hia ima tüikya khünaknu to sikangün angkya changle.

²⁵ Hwome ku hato tok ahopu ilaxle mama baozangbu ang töbu koxle changpu. Hwome mokkya ibu mwot makhange hwome ku ang mongtsik adünle changdaoa. Ku mongtsik a Jerusalem zongto wünchua le jao changdao, ilaxle ija a chwonpai ma amüt ang münthopu.

²⁶ Ikoxle wanghompa, chix tomtata hanpakma, Jowanpa, Israel nok Zang, kue akaxpu: Ija laipex ma chem zale tüipuix, nange ija kax to apadaoa,

²⁷ ilaxle kue Jerusalem hia ima tüikya khünaknu sikngün apong ang tom angkya azale changkya kax atat pongma, nang nyizabu akyetle tamchu sople, mong puinaikya füi ku tunthoma mongchatle changdaoa. Kue nang zangjop atatle laxdaoa,

²⁸ ilaxle sikngün oja kue Jerusalem hato ahüi angkya hex, ija a nang mazi tanto hüi ang müntom. Kue nang a mongsom ma zi ang tomüi.” Khünakbu a ija kaxho füi Wanghompa Josiah hato chat.

Josiah-e Kax ma Laxle Tüi angkya Jowanpa füi Tsaotsüt

²⁹ Wanghompa Josiah-e Judah hia Jerusalem angkya lompabu pangwüi sele asox,

³⁰ ilaxle hwom onotomle Zangshwom-Hom to ngui. Hwom füi tomle zompu-zangpabu, Liwi hwom tamchu khünaknu, tüinangkya hia chitüi-chinangkyabu pangwüi womle tüikya. Hwom tunthoma, noknusae atatle, Zangshwom-Hom ma bangkya tsaotsüt laipex ija wanghompae komkaile ele aho.

³¹ Chix a wanghom ngwotnui ma ajong, ilaxle ija laipex ma zale tüikya ningle chix kax ma laxle tüi angkya, chix wanlom hia kaxtom, ibu pangwüi chilyenle kün-hi-mong makhange zongbakle thom angkya, ilaxle ija tsaotsüte lomkya mwot pangwüi mokle alyet angkya Jowanpa füi tsaotsüt.

³² Benjamin hia Jerusalem ma ngole tüikya khünaknu pangwüi ang chixe ija tsaotsüt thom angkya tsaosax ang tom. Ile Jerusalem angkya khünaknu noknusae, hwom putong hwom Zang füikya tsaotsüt kax ma laxle hüi.

³³ Wanghompa Josiah-e, Israel nok haxsüt ma atüitüi nushixdongle tüikya chapabu pangwüi oli thule ama ilaxle chix ozün ma ngokya kople khünaknu ang, Jowanpa, hwom putong hwom Zang thotha-manzaile ngo ang tom.