2 PUKAX-PANGAO 23 - OTSAO BAIBEL (BSI)

Athaliah Zongto Alünle Ajongkya

¹ Zanglao azok tanle nuikya füima nguapa Jehoiada-e angaile mok angkya hanpak nguidaoale texle atak. Chixe süpahi tüichong hwom mixsün aga füi mongno tom; ibu a: Jeroham sasün Azariah, Jehohanan sasün Ishmael, Obed sasün Azariah, Adaiah sasün Maseiah, ilaxle Zikri sasün Elishafat.

² Hwom Judah angkya tingnu pangwüi to aham ilaxle Liwi hia saxthom lompa hwom pangwüi Jerusalem to tamchatle apüi.

³ Hwom pangwüi Zangshwom-Hom ma asox, ilaxle ikhama hwome wanghom sasün Joash füi tsaotsüt. Jehoiada-e hwom ang thüi: “Ija a ziünkya wanghompa sasün changle. Jowanpae wanghom Dawid sixli hwome wüi apünle ngo angkya hex-ole tsaodaokya tüikya ningle, ija naosün a wanghom ang achang angkya oli changpu.

⁴ Keme ile mok angkya changpu. Chemtue Sabath nyix zompu-zangpabu hia Liwi hwom ma mwot mok ang nguiüihex, hwom othom azom kha angkya thom tuitae Zangshwom-Hom zünkaibu nyele thom angkya changle,

⁵ mama othom azome wanghom homlo nyele thomüi, ilaxle mamabu pangwüi Homting Fülom ma ngoüi. Khünaknu pangwüi Zangshwom-Hom khua ma asoxüi.

⁶ Ikhama mwot asukya nguapabu hia Liwi hwom boma owachu Zangshwom-Hom hommong to chidongüi. Hwom a ija otsao mwot hanpak angle jao kamle atsao thomdaokya chang koxle, ibu a nop ang tsuak, ikoxle khünaknu mamabu a Jowanpae adangle fakya kax ma laxle homtho to ngole nui angkya oli changpu.

⁷ Liwi hwom a, ma changlobu syetle alailaxle wanghompa nyele chix akhople ajongüi, ilaxle hwom a chix apaopao to wanghompa füifüile ahamle ngoüi. Ilaxle owawa Zangshwom-Hom hommong to dong ang azongkya mix jangtüi, chix a lang angkya wüi changpu.”

⁸ Liwi hwom tamchu Judah angkya khünaknue Jehoiada-e adangle fakya kax ma laxle mok. Sabath nyix hwom mwot tsuakle changkya füima khünaknu fale pao ang chitom, ikhoma mwot mok ang nguikyabu hia tsuaklaxle ngaikyabu to hu angkya süpahi lompabu ang mwot tüile ngo.

⁹ Jehoiada-e okax-okhobu ang wanghompa Dawid kux paxlo hia di, ibu kox ilaxle hwome ibu Zangshwom-Hom ma thom.

¹⁰ Wanghompa kho awa angkya hanpakma chixe khünakbu a changlobu syetle alailaxle Zangshwom-Hom homtho akhople ngo ang tsan.

¹¹ Ifüima Jehoiada-e Joash a homtho to alai, chix khang ma khohom sünle kox, ilaxle apün-ada angkya wanlombu zakya laipex tuita chix chak ma atwonle kox. Ile chix a wanghom ang kamle dan. Nguapa Jehoiada hia chix sasün hwome Joash to münga lile atsao, ilaxle noknusa akhong: “Wanghompa tsünlo-khothole changhüi!”

¹² Athaliah-e khünaknu, wanghompa pwonle akhongkya ozing atatle lax, ikhoma she a nonokhaile, khünaknu asoxle tüikya Zangshwom-Hom to ngui.

¹³ Ikhato she-e Zangshwom-Hom fülom ma, wanghom hwom ajong ang panle thomkya onui ma, süpahibu hia nyazong mütmixbue akhop laxle wanghom hozün tuita ajongle tüikya ngünle lax. Nyazongbu mütle khünaknu a mongmüi tungle akhongle tüikya, ilaxle Zangshwom-Hom tsaipabue tsai-lwombu lomzunle ija pangpwon shwonthom azuile tüikya. Mongtsik abakle she-e ma nyi-za akyet ilaxle: “Dyendaoa! Dyendaoa!”, le akhong.

¹⁴ Jehoiada-e Athaliah a Zangshwom-Hom tsawat mong ma langsele chitsu, ikhoma chixe süpahi lompabu sele alai ilaxle thüi: “She koplaxle nyetmixbu zyenle ngokya oba to anopdao, ilaxle she kho awa ang zikkya mix jangtüi, chix a langle awütdao.”

¹⁵ Hwome she kop, wanghom homlo to apüi, ilaxle ikhato Man Zünkai ma hwome she lang.

Jehoiada-e Mwottho Azünle Zingkya

¹⁶ Wanghompa Joash hia khünaknu pangwüi notomle, hwom a Jowanpa khünaknu lüwüi ngo angkya tsaotsüt, nguapa Jehoiada-e azünle zing ang tom.

¹⁷ Ifüima hwom pangwüi Bal baozang to shwomkya nui to pao ilaxle ija dakle atsun. Ikhato tüikya tö-tsap hia chapabu thuple ama ilaxle Bal nguapa ang ngokya mixsün Mattan ibu tö-tsap tunthoma lang.

¹⁸ Jehoiada-e Zangshwom-Hom zai angkya hanpakma zompu-zangpabu hia Liwi hwom mwot to asüt. Ibu ang, wanghompa Dawid-e adangle fakya ningle ma mwot-mwot mok ang tsan ilaxle Mosa Wanlom ma tüikya ningle Jowanpa ang töbu zokle kox ang tom. Pangpwon hia tsai-lwom ngaokya pangwüi hwom ang azui ang dan.

¹⁹ Zanglom ma chitsao khünak owawa nguidongle chichang angkya hanpakma Jehoiada-e Zangshwom-Hom ma nyetmixbu dan.

²⁰ Süpahi lompabu, tüichong mixmüi hwom, nguakax-wangkhobu, ilaxle khünaknu pangwüi, Zangshwom-Hom angkya wanghompa, chix homlo to apüi angkya khualyen ma Jehoiada-e chix füi tomle wom ang tom. Hwom ngailomnu makhange nop, ilaxle wanghompa-e chix ngwotnui kople thung.

²¹ Khünaknu pangwüi ang mongmüi, ilaxle Athaliah mik amütkya khoma tingnu a dangjale tüikya.