2 PUKAX-PANGAO 2 - OTSAO BAIBEL (BSI)

Zangshwom-Hom Zai ang Atha-anyemkya

¹ Wanghompa Solomon-e Jowanpa to shwom angkya onui hanpak ang Zangshwom-Hom tuita ilaxle chix hanpakma wanghom homlo zaile alai angkya mongzangwünle tsuak.

² Chixe tuinabu pole apüi angkya hanpakma 70000 khünak dan ilaxle long asex angkya mwot to süt angkya 80000 khünak dan. Mwt ibu to akhile hume angkya 3600 khünak ang hünlit koxle thom.

³ Solomon-e Tair nok wanghompa Hiram hato kaxho tuita ile akat: “Chix hom zai angkya hanpakma apa Dawid ang nange sedar pünthobu hangle koxpongkya lailaile anyixchu ku füi thalexle changhax.

⁴ Jowanpa, ku Zang achuak angkya hanpakma kue Zangshwom-Hom tuita zai ang sütle ngole. Ija a otsao nui tuita ang changüi. Ku ilaxle ku khünaknue ikhama chix to shwomüi ilaxle ongan müikya sobu zokle changüi. Jento kwome ikhama chix ang otsao an tö koxle ngo angkya changle. Ja-nop to zokle ashunkya töbu koxüi ilaxle Sabath nyixchu ile wüi töbu kox angkya changle. Lyetzün Pangpwon hia mama otsao hanpakbu, kwome, Jowanpa, kwom Zang achuakle ima nui angkya changpu. Ile jento mokle ngo angkya kaxtom chixe kwom Israel nok ang koxle thomle.

⁵ Kue Zangshwom-Hom chongle zaile alai ang ajong ngole, chemthüikoxle kwom Zang a mama baozangbu pangnu thakma achongkya Zang changle.

⁶ Changle, Zang hanpakma Zangshwom-Hom owaechu münzaitsuak, chemthüikoxle chix a ipongpong khaokya zangding ma ngaxchu münsha. Idaile Zang ang ongan müikya so zokle töbu kox angkya onui tuita lüwüi chichangba kue chix ang Zangshwom-Hom chemle zingle alai thoüi?

⁷ Athaxpi, ku hato ibibi mwot mankyabu akat-hüi: hun, khop wi hia jan, ibu mwot awankyabu ilaxle nakle hingkya, lumle khikya hia baxnat nyinu tak ang mankyabu. Hwome, apa Dawid-e zünle toxkya, Judah hia Jerusalem ma tüikya zingpabu füi tomle moküi.

⁸ Nang khünak pündak mixbu, mwot awankya kue tikle ngopu, idaile ku hato Lebanon tokya sedar saipres ilaxle junipar pünthobu akat-hüi. Nang khünakbu to asun ang kue ku khünakbu akat angkya achwonle thomle.

⁹ Hwome pünthobu huanuma achwon angkya hünzom to asunle changüi, chemthüikoxle kue zai angkya Zangshwom-Hom a tüle chongkya tamchu osün amüikya changüi.

¹⁰ Nang khünak mwotmixbu ang kox angkya kue othum 2000 wonglai tsax, othum 2000 tsaxsa tula, bom 20, 000 grepti-ju ilaxle olip münga bom 20000, ibu akatle koxüi.”

¹¹ Ija kaxnong achat ang Hiram-e laiza tuita za: “Jowanpae chix khünaknu to mongkün koxle, chixe nang a hwom wanghompa ang achangpu.

¹² Jowanpa, Israel nok Zang, ding-hi-hax zingle alaikya mix ang münchang fakox! Chixe Dawid ang tüle hwontüi-jezaikya sasün koxdaoa. Chix a tsing-wankya hia tüle mwot mankyae awangle tüikya khünak changle. Athax chixe Jowanpa Zangshwom-Hom hia chix homlo zai ang achwonle ngopu.

¹³ Kue Huram le amünkya mixsün, tüle je füikya tamchu zing mankya zingpa tuita, nang hato akatle ngole.

¹⁴ Chix honu a Dan homjen angkya mixcha tuita changkya ilaxle hopa a Tair nok changkya. Hun, khop, wi hia jan tamchu long hia pün, ibu füi tütali zing angkyachu chixe komkai tiklax ngole. Chixe nakle khikya, lumle khikya hia baxnat nyinu tamchu jaknyi, ibu füi mok angkya mwot pangwüi awanle tüile. Chixe noksa apütle zingkya mwot, nange atomtom oli bakle zing ang thoüi. Chixe nang zingpabu füi ilaxle wanghompa Dawid mwot mokle hüidaokya khünakbu füi tomle naxmok-kox.

¹⁵ Idaile athaxpi hwom hato wonglai tsax hia tsaxsa tula, grepti-ju, olip münga, chempang nange akat ang atha-achwonle tüipuix, ibu pangwüi akatkox.

¹⁶ Nange laxsese sedar pün kwome Lebanon haxnu ma daküi. Ibu akungle khalaxle ti ma achwotüi, ilaxle Joppa alople tinu tok to afwotle apüiüi. Imakhange nange ibu a Jerusalem to apüi ang thoüi.”

Zangshwom-Hom Zai angkya Mwt Owang Wang

¹⁷ Hopa Dawid-e akiak daokya lailaile, wanghompa Solomon-e Israel haxtok ma tüikya mixnokbu komle akiak. Hom-hax füi ngole tüikya mixnokbu khünak huak 153,600 tüile ngokya.

¹⁸ Chixe hwomkha angkya 70, 000 khünak ang ibu tuina apüi ang tom ilaxle 80, 000 khünak ang haxnu to long thole, ibu asex ang tom ilaxle ibu mwot to hume angkya khünak 3,600 kamle dan.