2 PUKAX-PANGAO 18 - OTSAO BAIBEL (BSI)

Ajepa Mikaiah-e Ahap ang Kaxkhün Kox

¹ Chemtue Judah nok wanghompa Jehusafat tüle tüinangkya mix ang zaxzangle paopuix, chixe hwom homkha hia Israel nok wanghompa Ahap homkha bama atu-amaile chang angkya achwon.

² Obiobi zanglao lekya füima Jehusafat a Samaria tingnu to wanghompa Ahap füi apong ang pao. Wanghompa Jehusafat hia chix khünakbu achuak-achenle, hwom ang wünlit fong asüt angkya hanpakma wanghompa Ahap-e chun hia maihubu müimamale langle huak. Gilid angkya Ramoth tingnu to sing angkya hanpakma chix chima se angkya hanpakma tsuakkya tukuxle Ahap-e Jehusafat jik ang azong.

³ Chixe atüi: “Nang ku füito Ramoth tingtak ang dong ang chami?” Jehusafat-e lan: “Ku tamchu ku süpahibu nange sepupu ma hüi ang achwonle tüile. Kwom a nang füito haküi.”

⁴ Ifüima chixe thüi: “Ikoxlechu pongwang ma Jowanpa ma shong atüihax.”

⁵ Ikhoma Ahap-e ajepabu sele apüi, hwom 500 tukux tüikya, ilaxle hwom ma atüi: “Kwom Ramoth tingtak ang chipao hia paoüi?” Hwome lan: “Paokox ilaxle ija to singkox, Jowanpae hünzom ang wüi lüt ang tomüi.”

⁶ Ikoxlechu Jehusafat-e atüi: “Keme Jowanpa ma tsaitik-kaxshole chang angkya ibu boma aje tamchatle tüichahex?”

⁷ Ahap-e lan: “Chatle chu tuita, Imlah sasün Mikaiah tüile. Ikoxlechu kue chix thua anule chemthüikoxle chemtuechu chixe ku hanpakma müikya ajele münchang; chixe omama wüi ajele changle.” Jehusafat-e lan: “Nange ija ile chitex angkya oli changpu!”

⁸ Ikhoma Ahap-e khwa ma tüikya alixachong tuita se ilaxle momle Mikaiah sele apüi angkya kax kox.

⁹ Wanghompa anyi, wanghom hwom zapua laxlaxle, ma ngwotnuinui ma thungle Samaria panja angkya tsaxnak nui ma tüikya, ilaxle ajebue hokhi tunthoma ajele ngokya.

¹⁰ Hwom khama mixsün tuita, Kenanah sasün Zedekiah-e jan füi müizongbu zing ilaxle Ahap ang thüi: “Ibu koplaxle hünzome Siria nok füi azanüi ilaxle hwom to naishemle lütüi.”

¹¹ Aje mamabuechu ija ningle wüi akaxle thüi: “Ramoth tingtak ang dongkox, hünzome lütüi jao. Jowanpae hünzom ang lüt ang tomüi.”

¹² Ipongma, alixachong tuita Mikaiah lax ang paokya mixsün chix ang thüi: “Ajebu noknusa wüi kem wanghompa-e lüt angkya le amüimüi ajele ngole, ilaxle nangechu ile aje koxwüi müi angkya oli changle.”

¹³ Ikoxle Mikaiah-e lan: “Ozün ma tüikya Jowanpa mün ma thüipu, chixe ku ang chem ajelax thüipuix, ijatix kue ajeüi!”

¹⁴ Chemtue chix a wanghompa Ahap tunthoma ajongpuix, wanghompa-e chix ma atüi: “Mikaiah, Ramoth tingnu tingtakle chang ang Jehusafat kukhi chika hia kaüi?” Mikaiah-e lan: “Kakox! Lütkya a hünzome wüi lütüi. Jowanpae hünzom ang wüi lüt ang tomüi.”

¹⁵ Ikoxle Ahap-e lan: “Nange ku füi Jowanpa mün ma zangwünle changpongma otsingtsing akaxhüi! Ile chang angkya kue nang füi obithom ma akaxüi?”

¹⁶ Mikaiah-e lan: “Israel nok süpahi haxhua to, nyetmix chitüikya chunbu ningle chiakle samkya ngün ang kople. Ilaxle Jowanpae thüile: Khünak ibu ang lompa müntüi; hwom zingmüi ma mahom-hom to chat ang tomkox.”

¹⁷ Ahap-e Jehusafat ang thüi: “Ija mixsüne chemtuechu ku hanpakma müikya ajele münchang, omama wüi ajele le kue nang hama akaxdaoa!”

¹⁸ Mikaiah chizakle akaxle le: “Athax a Jowanpa kax to apalax! Jowanpa chix ngwotnui ma thung laxle ngokya zangkho-wangting to kue ngünle; chix akhople kaxtaimixbu ajongle tüile.

¹⁹ Jowanpae atüi, ‘Ramoth nok zan to kalaxle chix mik ikhato naxmaxlax ang Ahap owae dyenüi?’ Kaxtaimixbue malom-malom to kaxlanbu fa,

²⁰ ipongma chasa nguile hüi, ilaxle Jowanpa hato hüilaxle chixe thüi: ‘Kue chix dyenüi.’ Jowanpae atüi, ‘Chemle?’

²¹ Chasae lan, ‘Ku paoüi ilaxle Ahap ajebu pangnusae othai aje ang tomüi.’ Jowanpae lan, ‘Paolax ilaxle dyenlax, nange thoüihex.’”

²² Ilaxle Mikaiah-e ashukle thüi: “Chemle changpuix ija a ile changpu. Ibu nang ajebue nang hama othai ajele chang angkya a Jowanpae tsuakle thomdaoa. Ikoxlechu chix jaojaoe nang füi mikmüt apong angkya kaxfün tsuakle koxdaoa!”

²³ Ifüima ajepa Zedekiah a Mikaiah hato hüi, chix thün to fit, ilaxle atüi: “Chemtu makhange ku angkya Jowanpa chasa laile paolaxle nang füi zangwünle changpu?”

²⁴ Mikaiah-e lan: “Nang azwon ang tokfüichi tokya nui to nople changpongma nange ija ataküi.”

²⁵ Ipongma Ahap-e chix nguakax-wangkho tuita ang kaxkoxle thüi: “Mikaiah kopkox ilaxle chix a, tingnu apünkya gowarnor Amon hia wanghom Joash hokhi hato paokox.

²⁶ Ku haxmüi-zangmale chatle machang tanto chix a kun ma shole, an hia ti zaza asütle thom angkya hwom füi akaxkox.”

²⁷ Mikaiah-e lan: “Nang müimüi-zangngaile jangchat, Jowanpa makhange ku füi chiakaxkya ang naxchang! Kue akaxkya ija kax to noknusae apale koplax!”

Ahap Zikya

²⁸ Ifüima Israel nok wanghompa Ahap hia Judah nok wanghompa Jehusafat nyi a Gilid angkya Ramoth tingtak ang ka.

²⁹ Ahap-e Jehusafat ang thüi: “künyi zan to dongle changpongma kue a mama zapua laxlaxle atsingle changüi ikoxle nange a wanghom za-pua wüi laxlaxtox.” Ikhoma Israel nok wanghompa a zan to zangjang mix ang achang laxle atsingle ka.

³⁰ Siria nok wanghompa-e chix man-kanlin ahamkya lompabu ang, Israel nok wanghompa to tungkya boma mama mix owa tochu chak chimok angkya kax kox.

³¹ Ikhoma chemtue hwome wanghompa Jehusafat ngünle laxpuix, hwom pangnusae chix a Israel nok wanghompa changüile thüt, ilaxle hwom pangnusae chix to single hüi. Ikoxlechu Jehusafat akhong ajong ilaxle Jowanpae chix khosün. Chix to singkyabu anongle achat ang tho.

³² Man-kanlin zopkya lompa-e chix a Israel nok wanghompa münchangle ngün ang kopkya zuma hwome chix achuale ngokya zak.

³³ Büthüikya bama hexle, Siria nok süpahi tuitae san füi haple wanghompa Ahap to suakpong ma asüt. Chixe man-kanlin ahamkya lompa füi akhongle akax: “Ku to pi sütdaoa! Zantam angkya laile pao ang anongle chatkox.!”

³⁴ Khamkhitle azanle ngopongma, wanghompa Ahap a man-kanlin kho to, Siria nok chito thün ahole nguakle ngo. Zanghan nopkya füi tomle chix zi.