2 PUKAX-PANGAO 17 - OTSAO BAIBEL (BSI)

Jehusafat a Wanghom ang Achang

¹ Jehusafat a hopa man ma wanghom ang achang ilaxle Israel nok zongto chix chifün tsak-zongle chang ang tom.

² Chixe Judah angkya ziakople thomkya tingnubu, Judah haxtok chamtua-chamtua to, ilaxle Asa-e Efraim nok haxsüt to kople toxkya tingnubu, ibu to tiale chix süpahibu angwot.

³ Owangpong ma hopae mokkya mantole chixe mok ilaxle Bal to chishwom, ija khoma Jowanpa Jehusafat to mohiman.

⁴ Chixe hopa Zang thotha, chix kaxtombu kax ma lax, ilaxle Israel nok wanghombue mokkya ningle chimok.

⁵ Jowanpae Jehusafat ang Judah wangting apün-awangle ajit tsuak angkya tsak-zong kox, ilaxle khünaknu chix hato hingho-najobu huanuma apüile kox, iningle chix a tuita tüinangkya tamchu achuak-achenle tüikya mix ang achang.

⁶ Jowanpa thothale changkya a chixe mongngam ang lax ilaxle Judah haxtok ma tüikya songsari baozangbu to shwomkya onui hia baozangchanu Asherah chapabu pünle ama.

⁷ Chixe apünkya zanglao azom lükya to chixe ibibi nguakax-wangkho hwom Judah haxtok ang tingnu: Benhail, Obadiah, Zekariah, Nathanel, ilaxle Mikaiah ibibi to anwot-anole chang angkya hanpakma apao.

⁸ Hwom füi tomle Liwi hwom sün aku ilaxle nguapa sün anyi tüikya. Liwi hwom a Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah, ilaxle Tobadonijah hwom bibi; ilaxle nguapa anyi Elishama ilaxle Jehoram hokhi le tüikya.

⁹ Hwome Jowanpa Wanlom Laipex lax ilaxle khünaknu hama anwot-anole Judah nok tingnu pangkha towüi pao.

Jehusafat Chuak-chongle Changkya

¹⁰ Jowanpae Jehusafat zan to kale chang angkya tomzi nok wanghombu pangwüi chazale chang ang tom.

¹¹ Filistia nok züizüie Jehusafat hato khop hia mama hinghobu huanuma apüile kox, ilaxle mama Arab nokbue chun 7,700 ilaxle zwon 7,700 apüile kox.

¹² Iningle Jehusafat a sisile zaxzangle pao. Judah haxtok pangkha towüi chixe pan zailaxle tingnubu ziakop,

¹³ ikhato ahanle kox angkya süt-wongbu huanuma athünle thom. Jerusalem ma chixe pünlix-wangchongbu ngo ang tom.

¹⁴ Ibu a masaxthomthom khatokyabu changkya. Judah saxthom angkya süpahi othom khama Adnah a lompa changkya, ilaxle chix fang ma süpahi 300, 000 tüikya.

¹⁵ Anyi-lükya a Jehohanan changkya. Chix fang ma süpahi 280, 000 tüikya.

¹⁶ Azom-lükya a Zikri sasün Amasiah changkya. Chix fang ma süpahi 200, 000 tüikya. (Amasiah a Jowanpa mwot mok ang tsün koxle thomkya mix tuita.)

¹⁷ Benjamin saxthom angkya süpahi lompa a Eliada changkya. Chix a zangle wünkya süpahi tuita, ilaxle chixe 200, 000 khünak, di hia hapnu füikyabu to apün.

¹⁸ Chix fang angkya süpahi lompa tuita a Jehozabad changkya. Chix fang ma 180, 000, azan ang achwonle ngokya süpahibu tüikya.

¹⁹ Süpahi ibue Jerusalem ma wanghompa thotha, ilaxle obo ang Judah haxtok angkya ziakople thomkya tingnubu ma mamabu dan.