2 PUKAX-PANGAO 16 - OTSAO BAIBEL (BSI)

Israel hato Tingtui

¹ Judah nok wanghompa Asa-e apünkya zanglao 36 lükya to Israel nok wanghompa Basha-e Judah nok tingtak, ilaxle Judah to nguikya hia paokya lomtsyen angkya hanpakma Ramah tingnu ma pan zailaxle ziakop.

² Ikhoma Asa-e Zangshwom-Hom angkya hia wanghom homlo ma tüikya tuinabu lax ilaxle Siria nok wanghompa Benhadad hato Damaska to ija kaxho füi apao:

³ “Kem pa hwom lailaile kem chuwüi nokmüi ma ngohax. Ibu hun hia khopbu a nang hanpak ang hingho changle. Athaxpi Israel nok wanghompa Basha füi nokmüi ma ngokya zakdao, ile changkox tix chixe ku haxtok angkya chix süpahibu paoüi.”

⁴ Benhadad-e Asa zangwün füi im-jo ma tom ilaxle Israel nok tingnubu to sing ang chix süpahi lompa hia süpahibu akat. Hwome Ijon, Dan, Abel Beth Makah, ilaxle Neptali angkya tingnubu, süt-wong athünle thomkya kha pangwüi hwople kop.

⁵ Ile changle ngokya kax chemtue wanghompa Basha-e atatle laxpuix, chixe Ramah ziakop ang pan zaile ngokya mwot dantoxlaxle chat.

⁶ Ifüima wanghompa Asa-e Judah haxtok pangkha tokya khünaknu asüi ilaxle Ramah ma wanghompa Basha-e chix mwot to twonle ngokya long hia püntsibu pangwüi nwonle apüi ang tsan, ilaxle ibu a Geba hia Mizpah tingnubu pan zaikya to lax.

Ajepa Hanani

⁷ Ipong ajepa Hanani a wanghompa Asa hato ngui ilaxle thüi: “Nange Jowanpa, nang Zang to mongong thomhaxkux to Siria nok wanghom to nang mongong thomle changkya khoma, Israel nok wanghompa süpahibu a nang chak tokya paole azang ang tomdaoa.

⁸ Etheopia nok hia Libia nokbu ma süpahibu müimamale tamchu man-kanlin hia mankho ma azankya süpahibu huanuma müntüi daimi? Ile changkoxchu nang Jowanpa to nang mongong thomkya khoma, chixe nang ang wüi hwom to lüt ang tompu.

⁹ Ma kün-mong chix ang zongbakle koxlaxle ngokyabu ang janzüi kox angkya hanpakmale Jowanpae zangfang pangnu khato hule ngopu. Nange ongat mwot mokdaoa, ikhoma athax makhange nang a othuithuima azanlanle ngoüi.”

¹⁰ Ija kaxho khoma ajepa füi Asa ang mong huanuma ma ilaxle chix to janbüi füi khale thom. Ipongma Asa-e khünak züizüibu to mongtsik ashukle hwon.

Asa-e Apünkya Oshuk

¹¹ Pongwang makhange oshuk alople Asa-e mokkya mwot hia chixe apongle hüikyabu pangwüi Judah nok hia Israel nok Wanghombu Pukax ma zale tüile.

¹² Asa wanghom ang ngokya zanglao 30 lükya to, chix cha faile chang ang tom, ikoxlechu chixe Jowanpa hato mong chichatle kak-humixbu hato wüi pao.

¹³ Zanglao anyi füi chix a zile pao.

¹⁴ Dawid Tingnu ma chixe alüile chix hanpak ang longnu zolaxle zingle tüikya zuk-kha ma chix akhün. Hwome chix mang to pa angkya hanpakma ongam müikya müngabu apüile pa, ilaxle hwom mongmakya ahole khünaknue ha müimamale athünlaxle wün tak.