2 PUKAX-PANGAO 14 - OTSAO BAIBEL (BSI)

Wanghompa Asa-e Etheopia Nok to Lüt

¹ Abijah zi, ilaxle chix a Dawid Tingnu angkya wanghom hwom zukting ma akhün. Chix man ma wanghom ang chix sasün Asa achang, ilaxle Asa-e apünkya zangfang ma onoke zanglao 20 to nguile tingmüi-nokmale ngo ang kop.

² Chem supuix tamchu oja müipuix, ijaja mokkya makhange Asa-e chix Zang, Jowanpa mong amüi.

³ Chixe mixnok tö-tsapbu hia songsari baozang to shwomkya onui awüt, zomlongbu thuple ashix, ilaxle baozangchanu Asherah chapabu dakle atsun.

⁴ Jowanpa, hwom pupabu Zang mongtex mwot mok angkya tamchu chix kaxtombu kax ma laxle chang angkya chixe Judah khünaknu ang kaxtom kox.

⁵ Chixe Judah haxtok angkya tingnubu ma tüikya songsari baozangbu to shwomkya onuibu hia ibu ang ongan müikya sobu zokle koxkyabu awütle changkya tokhange, chixe apün-awangle ngopongma wangting a tingmüi-nokmüile ngo.

⁶ Chix din ma Judah nok tingnubu panzailaxle ziakople chang, ilaxle Jowanpae chix ang tingmüi-nokmale ngo ang tomkoxle, zanglao obiobi chax-zan chitüi homtoxle ngole hüi.

⁷ Chixe Judah nokbu ang thüi: “Tingnu long katukbu swonle hia zanhunuibu zaile, tamchu kapat ajale tox ang müile panbu zaile kemepi tingnubu ziakople changhax. Keme Jowanpa, kem Zang mongtex ma mokkya khoma haxtok a kem chak ma thom ang thopu. Chixe kem kho awale tamchu pangnu chitokya khuakhomle changdaoa.” Ikhoma hwome ibu zing ilaxle ahak-aluale ngo.

⁸ Asa ang Judah haxtok angkya süpahi 300, 000 tüikya, ibu a chang hia paxbu füi achwonle tüikyabu. Di hia wafax füikya süpahibu, Benjamin angkya 280, 000 khünak tüikya. Hwom pangwüi chachen-mongchen füikya tamchu olüi awandaokyabu changkya.

⁹ Etheopia nok Zerah le amünkya mixsün, million tuita khünak, man-kanlin 300, ibu koplaxle Mareshah alople jao nguilaxle Judah nok to sing.

¹⁰ Asa a chix füi azan ang lai, ilaxle hokhi pangnyie wüi Mareshah zui angkya Zefathah Haxsha ma machwon-chwon kop.

¹¹ Asa-e chix Zang, Jowanpa to jop: “O Jowanpa, nange tsak-zong chitüikya süpahi tuita to chongkya janzüi koxle fong tsuakpu. Jowanpa, kwom Zang, athaxpi kwom to fonghüi, chemthüikoxle kwome nang to mongong thompu, ilaxle nang mün male kwom ipong chongkya süpahibu füi azan ang laipu. Jowanpa, nang a owaechu anao ang chithokya kwom Zang changpu.”

¹² Asa hia chix süpahibue hwom to single changpongma Jowanpae Etheopia nok to anao, ilaxle ibu a fütle pao ang tom.

¹³ Asa hia chix othome hwom a Gerar alople achua. Ikhoma Etheopia nok huanuma lang ilaxle süpahibu a zantho ma ajong ang chithole chang. Ibu to Jowanpa hia chix süpahibue anao, ilaxle ibu tuina süpahibue müimamale tsuile kop.

¹⁴ Ilaxle hwome Gerar zui angkya tingnubu amüt ang tho, chemthüikoxle khünakbu a Jowanpa thua za. Süpahibue tingnu ibu pünle ama ilaxle tui huanuma tswonle kop.

¹⁵ Hwome chunnyetmixbu pom to chuwüi sing, ilaxle ut hia chun, ibu huanuma kop. Ifüima hwom a Jerusalem to chat.