2 PUKAX-PANGAO 12 - OTSAO BAIBEL (BSI)

Ijip Noke Judah Tingtak

¹ Chix wanghom ang achangle apünkya füi tomle Rehoboam-e, chix tamchu chix khünaknue Jowanpa Wanlom hato tok aho.

² Rehoboam-e apünkya zanglao aga lükya to, hwome Jowanpa kax ma chilaxle tüikya khoma sikngün fa. Ijip nok wanghompa Shishak-e Jerusalem tingtak.

³ Man-kanlin 1200 koplaxle imakhange azan angkya süpahibu, cha ma azan angkya süpahibu 60, 000, ilaxle Libia nok, Suk nok tamchu Etheopia nok süpahibu okiak chithole ngui.

⁴ Chixe Judah haxtok angkya, pan zailaxle ziakople thomkya tingnubu hwople kop ilaxle Jerusalem alople jao ngui.

⁵ Ajepa Shemaiah nguilaxle, Shishak thoto paole azang ang Jerusalem ma asoxle tüikya wanghompa Rehoboam hia Judah nok lompabu füi akax. Chixe hwom ang thüi: “Ija a hünzom hanpak ang Jowanpa kax changpu: ‘Hünzome ku awütdaoa, ikhoma athax kue hünzom a Shishak chak to koxpu.’”

⁶ Wanghompa hia mama nguakax-wangkhobue, hwome ochax lyenle thaidaokyabu ngai ilaxle thüi: “Jowanpae chem mokpuix ija wüi sukya changpu.”

⁷ Chemtue Jowanpae ija ngünle laxpuix, chixe Shemaiah füi tamchatle zangwünle thüi: “Ibue hwom ochaxbu ngaile changkya khoma, kue hwom a max ang müntom. Ikoxlechu chemtue Shishak-e hwom to single changüihex, hwom a moküsa mong ma azangle pao ang kopüi. Ku mongtsik janzüie Jerusalem to bakle münuüi.

⁸ Shishak-e wüi hwom to lütüi ilaxle hwome ku thothale changkya hia chaxwan apün-adale changkyabu thothale changkya anyi chemle malili hex ija awan ang kopüi.”

⁹ Wanghompa Shishak-e Jerusalem to nguilaxle, Zangshwom-Hom hia wanghom homlo ma tüikya tuinabu tsuile pao. Chixe pangwüi tsuile pao, Solomon-e zingle thomkya dibu ngaxchu chixe tsuile pao.

¹⁰ Ibu lüix to Rehoboam-e khop-dibu zinglaxle wanghom homlo nyele ngokya khünakbu to hu-mix ang thomkya süpahi lompabu chak to koxle nyele thom ang tom.

¹¹ Wanghompa Zangshwom-Hom to laile changfofo nyetmixbue di ibu koplaxle laiüi ilaxle ibu chatle nyetmixbu ngwotnui to apüile dantoxüi.

¹² Chixe Jowanpa chak to chix tsün koxlaxle Jowanpa mongtsike chix olithule chang ang chitom ilaxle Judah nok fün müile hüi.

Rehoboam-e Apünkya Pukax Moxmoxle

¹³ Rehoboam-e Jerusalem ma apün ilaxle chix wanghom tsak-zong achen. Wanghom ang achang pongma chix a zanglao 41 changkya, ilaxle chixe Jerusalem ma zanglao 17 apün. Ija tingnu a Israel haxtok angkya tingnubu khama, Jowanpae chix shwom angkya tingnu ang zünle kopkya tingnu tuita. Rehoboam honu a Naamah changkya. She a Amon nok tokya changkya.

¹⁴ Chixe chem chimüipuix ijaja mok, chemthüikoxle chixe Jowanpa mongtex lomle atak ang chiazong.

¹⁵ Rehoboam mwot owang makhange oshuk alople tamchu hwom homkha pukax pangwüi, ajepa Shemaiah Pukax Laipex ma tamchu ajepa Iddo Pukax Laipex male bangüi. Rehoboam hia Jeroboam nyi a othuithuima tata füi azanlanle ngokya.

¹⁶ Rehoboam zile pao; chix a Dawid Tingnu angkya wanghom hwom zukting ma akhün ilaxle chix sasün Abijah a chix man ma wanghom ang achang.