2 PITAR 2 - OTSAO BAIBEL (BSI)

Othai Hwon-nwotmixbu

¹ Kaikya khünaknu tu ma othai ajebu lai, ilailaile hünzom khamachu othai nwotmixbu lai angkya changle. Hwome max angkya othai hwon-nwot lai ang tomüi, üntoxle hwom shakle kopkya hopupa müntsing hex le thüiüi, ile alüile osünto ma max angkya thama apüiüi.

² Ilaxle hwome mokkya ochax mwotlom tokyabu laihuüi; üntoxle hwom mwot khoma hexle, mamabue otsingtsing lomtang ang kaxma thüiüi.

³ Ibu othai nwotmixbue, hwom nüfux tokhange, zingle alaikya pukaxbu zexkya füi achakle hünzom angkya ngun alapüi; kaipong tokhange wüi hwom kaxfün mix achwonle ngole, tamchu hwom mik amüt angkya mix ang mik azangle ngole!

⁴ Kaxtaimix ngaxchu, ochax lyenkyabu to Zange chishan, ikoxle kaxfün angkya nyix tanle nui ang oja zangnak khato hwom khakle thompuix, ija haolum to hwom tswonle awüt.

⁵ Zange kaipongkya chaxwannu to ngaxchu chiakhex, ikoxle Zang chilax homtoxle ngokya chaxwannu angkya khunaknu hato tinu mualyemkya apüi; otsao bama kaxho apukkya mix Noa boma hwom mixhuak anüt wüi azang ang tom.

⁶ Zange Sodom hia Gomorah, tingsho anyi, tha ajao; ibu wün füi amüt, üntoxle Zang chilax homtoxle ngokyabu to chemle changüi hex, ija hanpak kaxpan ang ija tingsho nyi achang.

⁷ Chixe Lut, müikya mix tuita, owa wanlom chilax homtoxle ngokya khünakbu chichang-chizang mwotbu füi mong chimüi, chix khosün.

⁸ Ija müikya khünak hwom füi tomle ngo, üntoxle nyixfokya to chixe ngünkya hia atatkya ibu ochax mwotbu khoma chix mong sikngün le ngo.

⁹ Ikhoma, otsao khünakbu chemle thwontsing tokya khosün angkya hex üntoxle chitsaokyabu kaxfünkya nyix hanpakma chemle sikngün ma thomüi hex, ija Jowanpa-e tsing,

¹⁰ tamnüilechu opang müi-hi-aji olom to chitsaokya to mong zalokya füi ahampuix, üntoxle Zange apün-adakya thua anupuix, ibu hanpakma. Ibu othai hwon-nwotmixbu a mong tsakle tüikyabu üntoxle ma mongtextex ma saxmok le tüile, üntoxle thakchi to fuazangle tüikyabu thua hwom münza; itülüi hwome ibu adix-adale.

¹¹ Ibu othai hwon-nwotmixbu füi sitsexle tsakzong le tüikya kaxtaimixbue ngaxchu Jowanpa thüntho ma hwom to adix-adale chichang.

¹² Ikoxlechu hwom hwon-je chitüikya mix ningkya khünakbu, jaopo ma hwom müibu ningle koplaxle lang angkya hanpakma puxpaikyabu; mae ngaxchu chitsing chiwankyabu to adix-adale tüile.

¹³ Hwome mix to sikngün apong ang tomkya khoma hwom angchu wüi sikngün apong ang tomüi. Anyixningkya zangngai to ma tsangtsa mongzom amüi ang chem mokpuix, ija a hwom zongma mongmüi akhokya ang laxle; Hünzom füi tomle fongsax ang tsap ma thung pongma, hwom a hünzom othom khama tuita münwan hia omak füikyabu, ma huxtsing-loptsang füi mongzom müikyabu changle.

¹⁴ Hwome chem tochu münhu ikoxle chinunchakkai angkya ziasyen to huwüi; ochax lyensale sungkya hwom mongsung mongtex ma tam münngui tox. Shonaikya khünakbu hwome tsünle amanle. Hwom kün-mongbu a osing nüfux tüi angkya bama anwot-anole thomdaoa. Hwom a Zang thuakzom fangma tüile!

¹⁵ Hwome tangthokya lom dantoxdaoa ilaxle hwome lom asamdaoa. Hwome Beor sasün Balam ahamkya man tole tüiüna. Ochax mwot mokle achakkya ma kopkya chix ngun to chixe tüle mongkün,

¹⁶ Ija chix ochax khoma chix to sadaoa. Chix gathoe khünak kax ma zangwün üntoxle osho ma chidongkya ajepa mwot abax.

¹⁷ Ibu khünakbu a tizopünkya shuazan ningle changpu, tamchu zangchei füifüi to jeple aham ngokya zangfwombu ningle changle; zangnak-zuzukya khato Zange hwom ang nui achwonle thomle.

¹⁸ Achax le ngokya khünakbu füi atsaile pao ang owang wangtankyabu tsün angkya hanpakma hwome chilaxli ongam zang wünle, üntoxle müi-hi-aji mongzok zalokya lom to tsangtsa twonle.

¹⁹ Ma alüile omüt da ang achangle ngo, üntoxle ibue hwom ang khangkho zang angaikox angkya tsaole; ikoxle kem to cheme lüt ang tompuix ija chak to kem dahaibu ang ngotüi.

²⁰ Ama angkya chaxwannu zong chak tokya, kem Jowanpa tamchu khosünpa Jisu Khrista tsingwankya makhange khünak paole azang ang tsuak; üntoxle ifüima ibue hwom chatle kop ilaxle hwom to lütle jangchangba, iningkya khünakbu oshuk, ami owang pongkya füi ngaxchu onüi ziama ang changle tüiüi.

²¹ Awanle koplaxle hwom ang fakya otsao kaxtom füi janle paokya füi hwom zongma otsao lomtang ojao tsingle chikopkya wüi amüikya changse dai.

²² “Hi ma fat hato anongle chatle, üntoxle ti ajodaokya wak haxthom to wot ang chatle” le tüikya jekax otsingtsing ang hwom ma ngai.