Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 PITAR 1 - OTSAO BAIBEL (BSI)

1 Jisu Khrista wangshem tamchu chix da tuita Simon Pitar tokhange: Zang hia khosünpa Jisu Khrista otsao ma hwom füi tomle tuita thalix mongong kopkyabu hato:

2 Zang hia kem Jowanpa Jisu Khrista tsingwankya tokhange chingcha hia mongsom thakho nguile hünzom hanpak ang naxchang.


Zange Nyakkya üntoxle Zünle Kopkya

3 Owae ma fuazang hia ataxle müikya süntswon ang kem sele laxpuix, keme chix awanle laxkya makhange, kem ozün ma tüipongma tamchu otsingtsing zanglom tsün ngopongma laxli komle Zang otsao tsakzong makhange kem ang fadaoa.

4 Ibu tokhange kem Zang jaopo ma wom angkya üntoxlechu ochax tutex khoma laikya chaxwannu tuma wanshix tokya azangle tsuak angkya bama, chixe kem ang tsaodaokya achongkya tamchu thalix hinghobu kem ang fadaoa.

5 Ija khoma hünzom mongong to onüi müikyae bo; onüi müikya to tsingwankyae bo;

6 tsingwankya to alüile akumathumkyae bo; ma alüile akumathumkya to adukyae bo; adukya to otsaoe bo;

7 otsao to khristan künkak mongküne bo; khristan künkak mongkün to mongküne bo; le chang angkya hanpakma hünzome tsuakkya apongle azongle moklax.

8 Chemthüikoxle ibu hünzom kux ang achang üntoxle sisile zaxle jangtüiba, ibue hünzom ang Jowanpa Jisu Khrista tsingwankyae ma chiziak chipua le tüi ang müntom.

9 Ikoxle hünzom ma ibu chitüi jangthüiba, hünzom a cha tokya ngün ang chithokya tamchu amipongkya ochax tokya ma khosün kopkya alak daokyabu changle.

10 Ikhoma, ku mongkün tüinaohom, Zange hünzom nyakkya hia zünle kopkya bama komkaile awan lax ang zongbakle azonglax; hünzome ile jangmok thüiningle otuechu ma mongong dantoxlaxle münpao.

11 Chemthüikoxle iningle tix kem Jowanpa tamchu khosünpa Jisu Khrista oshuk chitüikya wangting to hünzom ngui ang tomüi.

12 Hünzome ibu tsingle ngoün koxlechu üntoxle hünzome pongle kopkya otsingtsing ma hünzom tsingju kamong le tüiün koxlechu, kue ibu jento hünzom mongto texle atak ang tomüi.

13 Ku ozün ma ngotanto ibu bama hünzom mongto texle atak ang tom angkya a ku mwot changpu le kue texpu.

14 Chemthüikoxle kem Jowanpa Jisu Khrista-e ku füi ngaitho le akaxdaoa, thüikoxle, kue ija tsangtsa tsün chwonle wüi dantox angkya changle le awanle.

15 Ikhoma athax ku zi füimachu ibu zangwün hünzom mongto jento texle atakle lax angkya lompong awanle fa angkya bama kue tsuakkya apongle mok angkya changle.


Khrista Fuazangkya bama Mikngün

16 Kem Jowanpa Jisu Khrista zaxzangle nguikya bama hünzom ang tsingle lax ang tom pongma kwome khünake zingle alaikya pukax to ongle chingo; ikoxlechu kwome ma mik füi chix fuazang ngündaokya mo wünpu.

17 “Ija a kue mongkünkya Ku Sasün changle; chix füi ku mongzom müipu!”, le pangnu thakma akhokya fuazang tokhange kaxzing laile, Zange chix achuak achen pongma kwom ikhama tüikya.

18 Kwom chix füi tomle otsao haxnukho to tüipongma; zangkangting tokhange hüikya ija kaxzing kwome atat.

19 Ikhoma ajebue apukkya kaxho to otsing changpu le kwome sisile mongongpu. Anyixningkya zangngai ang machang tanto, üntoxle hünzom mong ma nyankya lyettsi malai tanto, zangnakle ngokya khato zangngai fakya wüntik tuita ningle, ija kax to hünzome mongkox koxle müi angkya changle.

20 Ibachu pongwang ma ija tsingle koplax: Otsao Lai kax tuitachu ma mongtex ma owaechu taitsuak angkya fang münchang.

21 Chemthüikoxle khünak tutex makhange hüikya jekax tümüntüi. Jowanpa tokhange hüikya kaxho zex pongma khünaknu a Otsao Chasae koplaxle tüikya.

Wancho Naga Bible - OTSAO BAIBEL

Copyright © 2012 by The Bible Society of India

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ