2 KORIN 6 - OTSAO BAIBEL (BSI)

¹ Kwome Zang füi tomle mwot mokpu, ilaxle Zange hünzom ang fakya chingcha muato shixshixkhaxle taxchangünfa le kwome hünzom füi akaxpu.

² Chemthüikoxle Zange akax: “Hünzome ku lom pongma, kue hünzom to fongpu; hünzom khosün tuk nguikya zuma, kue hünzom to asunpu.” Apalax! Zang chingcha pongle lax angkya a athax changle; khosün kop angkya hanpak a anyix changle!

³ Kwom mwottho ma thaikya chibang angkya hanpakma, kwome owawa lom abax abang ang münazong.

⁴ Itülüi, sikngün tuitai ilaxle thangdangkya pangnu ma adukya tokhange, kwome mokkya oli pangnu lom ma kwom a Zang dabu changpu le ahopu.

⁵ Kwom to chak mokpu, kun to shopu, ilaxle tuwuk adünpu; kwome mwotnüi mokpu ilaxle chijip chipom homle chichangba chisax chiling homle akaipu.

⁶ Kwom tsaothakya, tsingwankya, adukya tamchu chingcha jajakya tokhange kwome kwom alüile Zang dabu changpu le ahopu. Ija Otsao Chasa, kwom otsingtsing mongkün, tamchu Otsao Chasae otsingtsing ma mix to künkya mongküne,

⁷ Otsingtsing tsakzong hia Zang Kaxho makhange tsuak ang tompu. Ma khosün angkya chang hia pax ang kwom ang Zang Otsao tüipu.

⁸ Kwom a achuak achen ilaxle adix-ada. Kwom ajao ahai ilaxle achuak achen. Kwom a khualop mix ang lax.

⁹ Owaechu chiawankya ningle, ikoxlechu noke wüi kwom mün awan; kwom a omang bütukux, ikoxlechu hünzome ngünle kwom a ozün ma ngo. Sikangün ikoxlechu mik chimax.

¹⁰ Küntsik mongma, ikoxlechu kwom othuithuima mongmüi le ngo; kwom a chitüi chinangkya mix ningle, ikoxlechu kwome khünak ahak alua ang tom; kwom a chemchu chitüikya ningle, ikoxlechu kwom a pangwüi koplaxle ngo.

¹¹ Korin angkya mongkün zuikhuibu! Kwome hünzom hama ngaitho le akaxdaoa; kwom mong a nuisha-kuidale dapdaoa.

¹² Hünzom tho to mix kwome kwom mongka hakkya chichang; kwom tho to mix hünzome ma mongka haklaxpu.

¹³ Masu masa ang laxlaxle athax kue hünzom füi akaxpu: Hünzom hanpakma kwom ma tüikya tuitex ningle hünzomechu kwom hato ahohüi. Hünzom mongka nuisha-kuidale dapkox!

Songsari bama Kaxkhün

¹⁴ Mongong chitüikyabu füi tomwüi saxmok ang taxazong, chemthüikoxle ile moktsuak angkya oli münchang. Chisukya hia sukya nyi üitho tuita ang chemle achang tsuaküi? Zangnak hia zangngai nyi tomle chemle ngothoüi?

¹⁵ Khrista hia Bao nyi chemle tsaino-kaxno tomle manüi? Mongong füikya hia mongong chitüikya nyi ang tomkuxle thüi angkya chemtüi?

¹⁶ Zang shwomkya hom hia chapabu tuita ang chemle achang thoüi? Kem a ozün ma ngokya Zang Zangshwom-Hom changle! Zang chixe alüile akaxle, “Ku khünaknu füi kue ku hom zingüi, üntoxle ku hwom khato ngoüi; Ku a hwom Zang ang achangüi, hwom a ku khünaknu ang achangüi.”

¹⁷ Idaile Jowanpa-e akax, “Hünzome hwom danle tox angkya wüi ilaxle hünzom hwom füi atsaiün; chitsaokya to ojao taxlyet, ikoxtix kue hünzom pongle kopüi.

¹⁸ Ku a hünzom Hopa changüi; hünzom a kusu kusahom changpu, le Khüthak Zange akax.”