2 KORIN 4 - OTSAO BAIBEL (BSI)

Chasa Tui-mwot a Tikkux ma

¹ Zange chix chingcha makhange kem ang ija mwot mok le koxdaoa, ikhoma kwom ang mong münhix.

² Zakkop hia huxsa mwot komle kwome tokna to toxdaoa; kwome a mix dyen-nganle münmok, chichangba kwome Zang kax chichangkya ang münachang. Zang miksho ma kwome otsingtsing kaxho ngaitho le apukpu, ilaxle pangnusae wüi kwom to sule le naxhu le texpu.

³ Chemthüikoxle kwome apüikya Kaxho Müikya züizüie tsingle lax ang chitho lechu changüi, ikoxle ija a omüt osam lom to lele ngokyabu pyenkya khoma changüi.

⁴ Ija chaxwannu angkya baozange, zangnak to hwom khangka je apale thomkya tokhange hwome Kaxho Müikya to mongong ang chitsuak. Zang füi tuita Khrista fuazang bama tüikya Kaxho Müikya makhange hwom to nyanle hüikya zangngai ngün ang chitom le chixe hwom to abax.

⁵ Kwome apuk-apuakya kwom bama münchang; Jisu Khrista a Jowanpa changle, tamchu kwom a Khrista ma hünzom dabu changpu, le apukwüi.

⁶ Khrista thünza ma Zang fuazangkyae nyankya tsingle lax angkya bama kem mongkha to chix zangngaie nyanle fa angkya Zang a “Zangnaknu khatokya zangngai laiün”, le akaxkya Zang tuitata wüi changpu.

⁷ Ikoxlechu Kaxho Müikya zong akhokya a Zang kux changle, kem kux münchang, le aho angkya hanpakma, ija Kaxho Müikya apuk-apua angkya hünlix füi tüikya kwom a tikkuxbu ningle changle.

⁸ Othuithuima kwom zothup, ikoxlechu kwom akhixle chipao; tampong khosam, ikoxlechu mong chimax;

⁹ zanbu huanuma tüi, ikoxlechu zuikhui chitüi homtoxle kwom otuechu chingo; üntoxle tampong huanuma maklax, ikoxlechu kwom mik chimax.

¹⁰ Othuithuima kwome, ziün angkya kwom tsangtsa ma Jisu mang laxlaxle ngo. Ija a kwom tsangtsa ma chix khüzün aho angkya hanpakma ile chang.

¹¹ Kwom tsangtsa ma chix khüzün ngün ang kop angkya hanpakmale, tsün-jang masu le kwom Jisu zi angkya thama ma ngo.

¹² Ija a kwom ma zik-mwot suapu, ikoxlechu hünzom a azün ang suapu.

¹³ Otsao Lai-e akax: “Ku mongong tüikya khoma kue akaxpu.” Ija chasa tuita mongong ma kwomechu kwom mongong tüikya khoma akaxpu.

¹⁴ Zang owae Jowanpa Jisu chatle azünpuix, chixe kwomchu Khrista füi tomle azangle zo ang koxüi ilaxle hünzom füi tomle kwomchu wüi chix ngwotnui to paoüi, le kwome awanle.

¹⁵ Ibu pangnu wüi hünzom kuxma changle; ilaxle Zang chingchae otukux ziatamle khünaknu ha aloppuix, hwome fuazangkya Zang ang münchong fale sisile jopüi.

Mongong makhange Ozün ma Ngokya

¹⁶ Ija khoma otuechu kwom ang mong münhix. Kwom tsangtsa tsün zaze-zazele zatnaile hüile, ikoxlechu kwom chasa tsün a nyixta füima nyixta le sümüile azünle.

¹⁷ Üntoxle ija onox ma kwome apongkya sikngüne, ija sikngün to nüile, kwom hato apyen ang jao chitsuakkya, chibak toxkya fuazang apüi angkya changle.

¹⁸ Chemthüikoxle mike ngünkya oli chichangle, kwom mikza ma, mike chingünkya oli thompu. Ikoxle chem ngünpuix, ija a onox ma ngoüi wüi, ikoxle keme ngün ang chithokya a jento ngo angkya changle.