2 KORIN 11 - OTSAO BAIBEL (BSI)

Pol hia Othai Wangshembu

¹ Ku hidaole ongat ningle tüitoxpongechu, hünzom ang mong chima le namtüibae le texpu. Chingchalaxle shongadufa!

² Hünzom tuitexkya kuma zule tüile; hünzom zongto Zange chemle texpuix, kuechu ija ningle texle. Naocha tuita aju-asom angkya nyix mangui-manguile, mafüi tuizing-nazex daokya naosün zongto othai-onyai chitüi le büle haxtsao-zangthale ngotsuak puix, ilailaile hünzom chuwüi Khrista zongto thaikya ojao chitüile namngobae le texpu.

³ Ef to changkya ningle hünzom tochu nakchang ünkoxle ku zamaxle. Pu huanuma atsing ilaxle chixe Ef ochax to adüt. Ilailaile hünzom tutex zia ama ang tsuak, ilaxle hünzom Khrista zongto haxtsao-zangthakya chitüile changüi.

⁴ Kwome apuk-apuakya füi malili changkoxlechu hünzome Jisu bama hwome apüikya kaxho to ong! Hünzome kwom makhange kopkya Otsao Chasa oja hex, ija ngax chichang khato, hwome kaxtsao fakya chasa hünzome pongle laxpu! Ilaxle kwome apuk-apuakya füi chixlili changkoxlechu, hwome apuk-apuakya kaxho müikya hünzome pongle lax. Ile hünzom hato nguikyabu chak to hünzome ochwon ma hünzom dankya ngünlaxle ku abüt maxle.

⁵ Hünzome “ataxkya wangshembu”, le ekya füi ku sühixkya changpu le kue müntex.

⁶ Tun ma aluile tsai-kax süchidong lea tüiünkoxlax, ibachu tsingwankya olom ma ile münchang; kwome ija hünzom hama othuithuima üntoxle tütatuehex hünzom hama angai koxdaoa.

⁷ Khosün angkya Otsao Kaxho kue hünzom hato apukkya zuma kue hünzom ma chemchu chiju chilom. Hünzom thak to nwon angkya kuxma kumix fangto jupu. Ija wüi ku zongma ochax ang achang laxcha?

⁸ Hünzom khato mwot mok angkya hanpakma kue ngun syen mama müimüithom tokya mix koppu. Hünzom to fongtsox angkya kuxma hwom zothup daoa le kue akax tsuakpu.

⁹ Ku hünzom füi ngotanto, ngun laxsele thangkhüt pongma kue hünzom to poxbwom le chichang; kue laxsese komle Mesidonia tokhange nguikya tüinao hwome ku hato apüi toxpu. Ami ledaokya ziamachu ilaxle athax mahüikya ziamachu, ku hünzom hanpakma hünlix tuita ang münachangüi!

¹⁰ Ku ma tüikya Khrista otsingtsing ma kue tsaopu: “Akaia ma ojong khatochu ija ku mongngam mündang toxüi.”

¹¹ Kue ija a hünzom to chikün chilua laxle akaxpia? Kue hünzom to künkya Zange awan ngopu!

¹² Ngun syen lom ma süfonghüihu le kue otuechu münakax angkya changpu. Kue hwom füi tuitata ma wüi mokle hüipu le hünzome nyakkya “ataxkya wangshembu” ngam angkya olom tsyense le texpu.

¹³ Ibu a hwom mwot bama atsekya üntoxle Khrista wangshembu tomtatale naxngün ang sün aje laxle ngokya othai wangshembu changle; ibu khünakbu a otsingtsing wangshembu münchang.

¹⁴ Müipu, abüt angkya chemtüi! Zangngai kaxtaimixbu ningle baoe ngaxchu chix sün aje ang thole!

¹⁵ Idaile chix dabue hwom sün otsao dabu ningle naxngün ang alüile aje ang chem mwotnu akhokya ale. Hwom mwote chem atakse hex, oshukma hwome ija jaojaole ataküi.

Wangshem Tuita Ningle Pol Sikngün

¹⁶ Chatlechu kue thüipu: Ku ang ongat tomtatale owaechu taxtex ünlax. Ikoxle hünzome jangtex thüikoxlechu, ku angchu ikuxsa ngax thüichu mongngam tüitsuak angkya kuxma, ku anga tuita changa lüngax thüichu pongle kop hüi.

¹⁷ Changle athax kue akax ngokya a Zange tomle akaxkya münchang; Ija mongngam bama kue ongat tuita ningle jao akax ngopu.

¹⁸ Ikoxlechu müi-hi-aji chifün khoma mongngamle ngokyabu tüihukya daile, kuchu otyatyale ngamle ngoüi.

¹⁹ Hünzom ma zongto alüile hwontüi jezaikyabu changpu, ikhoma hünzom ongatbu khato hakle.

²⁰ Owae hünzom chix da ang laxlaxpuix chichangba chix lap hanpakma hünzom twonlaxpuix chichangba hünzom tsün ma aman laxpuix chichangba hünzom to ajao afangle hulaxpuix chichangba hünzom to thün ma fitlaxpuix, iningkya mix füito hünzom azuile.

²¹ Kue thüipu, Kwom a iningkyabu mok ang namazak le zale! Ikoxle lilita khoma owawae mongngam ang tsukya jangtüi; kue ongat ningle akaxpu, ikhoma ku mongchu ngamse tsule.

²² Hwom Ibri khünakbu changpuix nyi? Kuchu wüi Ibri khünak changle. Hwom Israel khünak changpuix nyi? Kuchu wüi changle. Hwom Abraham sixli changpuix nyi? Kuchu wüi changle.

²³ Hwom Khrista dabu changpuix nyi? Kue ongat ningle akaxpu: ikoxle ku wüi hwom füi sümüikya da tuita changpu! Hwom füi süchongle kue wüi mokdaoa, ku kun to obi thomthom ma hexle ngodaoa, zu füi ku towüi süchongle fitdaoa ilaxle obi thomthom ma hexle bazizio le azangkya changpu.

²⁴ Othom aga ma tsübün aku pongma Jehudi apün-awangkyabue ku to zu füi fit;

²⁵ Othom azom ma Rom nokbue ku to zu füi fit; ilaxle tam a ku to longfüi thup. Khua ti to maxkyakya othom azom ma ku hak, ilaxle tam a khonta tsa ali tima ngole alyet.

²⁶ Wünhamkya tuk ma ku obi thomthom ma hexle tinu mualyemkya hia ahux mixbu tokhange, Jehudi nok hia mixnokbu tokhange thama apong angkya lai; tingnubu to thamakya, Molo-Tinu mongto thamakya, ilaxlechu othai zuikhuibu tokhange apüikya thama, ibu füi ku asao angkya lai.

²⁷ Mwotmok angkya hia fuxtsüi huanuma apongle hüi; obi thomthom ma hexle ku chijip homle le; woknuak tilane ku tüle-tüle jemax hwonsam; süt, zui angkya nui hia nyiza chilax homtoxle ku obi thomthom ma hexle ngole hüi.

²⁸ Mamabu mo chemwün angkya tüipu, nyixfokya to pangnu müimüithom bama mong ma kakle hwom tuitexkyae ku to sheple thom.

²⁹ Otue owawa shonai le changüihex, ima kuchu zong chitüile maxkya ningle chang; owawa ochax to dütkya zuma, thünzak wünchuae ku awang.

³⁰ Ku mong a ngam angkya wüi changle, ku ang zongshole ahokya olom bama ku mong ngam angkya wüi changle.

³¹ Jowanpa Jisu Zang ilaxlechu othuithuima chix mün mohiman naxchang! Chixe ku münthaile awan ngole.

³² Ku Damaska ma ngotanto, wanghompa Aretas-e kamle thomkya Gowarnor-e ku kop angkya hanpakma tingnu pan ma nyetmix danle thom.

³³ Ikoxle katuk akhale ngokya makhange tsong ma ashale akailaxle chix chak tokya azan