2 KORIN 10 - OTSAO BAIBEL (BSI)

Pol-e chix Mwottho Khose

¹ Pol ku jaoe hünzom füi akaxpu, hünzom hama tüipongma ku a zakhut mix ang achang, ikoxle hünzom ha angkya atsaikya zuma ku ang mongchongle le khünakbue akaxle. Khrista ningle ku somdangle tüise texpu.

² Ku ikhato nguikya zuma chingchalaxle ku ang zongzanle hia kheba chithüile tüihüile sütax-akaxünfa! Chaxwannu mongtex ma mokle le ku ma kaxhux fekyabu zongto atix ku zongzanle tüi angkya kue awanle ngopu.

³ Kwom chaxwannu ma ngokya changtomtapu, ikoxlechu kwome chaxwannu mongtex makhange achax-azanle münchang.

⁴ Kwome achax-azan ang twonkya chang-pax a chaxwannu chang-pax münchang ikoxle Zang tsakzong chang-pax changle. Kwome ibu oshing mongle ziakop laxle ngokya tha ama ang twonle. Chichang khato kaxma ma alatkya pangnu tha kwome amale.

⁵ Zang Kaxho Müikya füi opüi to alünkya pangnu kwom fang to bele ajole; tutex ma kople thomkyabu pangnu kwome lax üntoxle khünaknu mongjang Khrista tutex füi notom le lüi ang koxle.

⁶ Üntoxle hünzom athaxpi komle kwom kax ma laxle tüiüna le ahokya zuma, kax ma chilaxle tüikya mix to sikngün fa angkya kwom achwonle tüile.

⁷ Hünzom a mongjang ma khünzukya müntüi. Owawae atsingshole chix Khrista da changpu le tex ngo angkya mix jangtüiba, chixe müile ajang ang laxkox, ilaxle ku chuwüi chix bütukuxle Khrista da changpu le chixe tsingle laxüi.

⁸ Jowanpa Jisu Khrista-e ku ang, hünzom ama ang münchang ikoxle zingle amüi angkya hanpakma, hünzom to o angkya zong koxle tüile. Ija ku ang koxle thomkya zong bama ku hidaole onüisa tsaichong-kaxbongle tüidaobachu, ku azak azyen angkya oli müntüi.

⁹ Ku laiza ibu tokhange kue hünzom azapu le hünzom mongto tex angkya oli münchang.

¹⁰ Chemthüikoxle hwome thüile: “Pol laiza tüle khünzukya tamchu ahai ang chimüikya changle, ikoxle otue chix kwom füi tomle kun ma tüikyahex, chix ma zong chitüi, ilaxle chix tsai chix kaxbu chem angchu chichang!”

¹¹ Tsai tokhange kue hünzom hato laiza zakya ningle, athax Korin to nguilaxlechu ku tutex ityatya wüi chang angkya changle.

¹² Ibachu kwome, ma alüile achuak achenle changkyabu füi apanle hia apyenle ngose tsukya münchang. Hwom a chem tukuxkya ongatbu hex! Hwome alüile hwom chifün zingle laxle, ilaxle ibu füi hwom athut-apan le.

¹³ Ikoxle hwom hanpakma, kwom ngamkya othüt ziakaile münleüi; ija a Zange kwom ang koxle thomkya mwot longzi akaile chileüi. Ija ma kwome hünzom khama mok angkya mwotchu wüi womle tüile.

¹⁴ Hünzom chuwüi ibu ziamong ma tüikya daile, Khrista bama Kaxho Müikya koplaxle hünzom hato kwom nguikya zuma, kwome ibu zia akaile chile.

¹⁵ Ikhoma Zange kwom ang koxkya zia akaile mokle lekya mix mwot bama kwom münngam. Itülüi, Zange koxle thomkya mwot ziathüt mong ma, hünzom mongong ma tsong angkya ilaxle kwome hünzom khato süchongkya mwot tsuak angkya hanpakma kwome monghompu.

¹⁶ Ile jangchang thüiningle, Korin kai laxle mama chaxwanbu to paolaxle kwome Kaxho Müikya apuk ang thoüi. Zange chix ang fale thomkya ziamong ma mokle alan daokya owawa mwot khoma kwome ngam angkya münchang.

¹⁷ Ikoxle Otsao Lai-e thüile: “Owawa ngamse jangtsu Jowanpa-e mokdaokya mwot khoma ngamlax.”

¹⁸ Chemthüikoxle khünak tuita ang müile le thüi angkya a, chixe alüile ma müile le thütkya khoma münchang, ikoxle Jowanpa-e müile le thüikya matix changüi.