2 KORIN 1 - OTSAO BAIBEL (BSI)

¹ Zang mongtex makhange Khrista wangshem ang achangkya Pol hia kem tüinao Timothi nyi tokhange: Korin angkya Zang müimüithom, tamchu Akaia angkya Zang khünaknu nok hato:

² Zang kem Hopa üntoxle Jowanpa Jisu Khrista-e hünzom ang chingcha ilaxle mongsom naxfa.

Pol-e Zang Achuak

³ Chingchae awangkya Hopa, Zang, owa makhange fongkya oli pangnu hüipuix, ija Zang tamchu kem Jowanpa Jisu Khrista Hopa ang keme münchong fahax, oman!

⁴ Chixe kem sikngün pangnu to fongle hüi. Idaile, fongkya ija Zange kem ang fakya füi, kemechu mix, sikngün ma ngokyabu to fong ang tsuakle.

⁵ Keme chemle Khrista sikngünbu tom-hanle hüidaopuix, ilailaile Khrista makhange Zang chingcha achongkyachu tom-hanpu.

⁶ Kwom sikngünkya a hünzom to fongkya tamchu khosün hanpak changle. Sikngün pongma Zange kwom adu ang tomkya hünzom hanpak wüi changle. Füichima kwome apongkya sikngün hünzome apongkya zuma adutsuak angkya kuxma ija a hünzom zong changle.

⁷ Hünzome kwom sikngünbu tom-hankya ningle kwome kopkya mongsomchu wüi tom-hanle le kwome awanle. Idaile hünzom tokya kwom monghom otuechu münasho.

⁸ Asia haxtok ma kwome apong daokya thangnak bama kwome hünzom hama tamchatle wünse tsupu. Kwom ang alikle koxkya hünlix a huanu tamchu lixkya changkya ilaxle chatle ozün ma ngo ang kopüi le monghomkya kwom ma ojao chitüile mongmax.

⁹ Kwom ang mik amüt angkya tsaifün kaxfün tsuakdaongachu le kwom mongto texle hüi. Ikoxle ija a, kwome alüile ma to chichangle zidaokya azüntsuakkya to mongong naxtüi ang ile chang.

¹⁰ Ija ningle za-adünkya, mikjao maxse thomzün chak tokya chixe kwom azündaoa, üntoxlechu wüi sün angkya changle; ile hünzome zangjop makhange kwom to fongle ngopongma, chixe kwom chatlechu wüi sünüi le kwom mongong chix ma thomdaoa.

¹¹ Ikhoma kwom hanpakma zangjopkyabu to lanüi, üntoxle Zange kwom to mohimanüi; üntoxle kwom hanpakma münchong fale khünaknue Zang hato ma dingzak nwonüi.

Pol-e chix Mong Katzua Alüix

¹² Kwom mongngam a: Ija chaxwannu ma kwom tsün, tamnüilechu hünzom füi asyen-abuikya bama, khünak hwon-je makhange chichangle Zang chingcha tsakzong makkange, Zange fakya ngaitho hia zaxhune azuilaxle saxmokle hüidaoa le kwom khangka ma tsaotha le awandaoa.

¹³ Kwome hünzom hato hünzome awanle laxtang zapu. Ipongma hünzome kwom bama muale wüi tsingpu. Ikoxlechu otue Jowanpa Jisu hanpak nguile hüiüihex,

¹⁴ izuma hünzome kwom bama komkaile awanle laxüile kue monghompu. Imatix hünzom bama kwom ma tüikya mongngam füi tomwüi hünzomchu kwom bama mongngam tüi ang tsuaküi.

¹⁵ Ibu hanpakma mongao ojao chitüi le hünzome thom anyi ma mohiman naxkoplax ang, pongwang ma hünzom shongwaise le ku mong katzua changpu.

¹⁶ Chemthüikoxle Jehudi chaxwan to ka ang ku lom naxzuntox ang, ku Mesidonia chaxwan to paoüima ilaxle chatüi lom male hünzom wai angkya kue mongkat azuakya changpu.

¹⁷ Ija mongkat azuakya bama ku ang mong münajing le fe angkya chichang. Jangchang thüiba, kue ija mongkat azuakya zuma chaxwannu khünak ningle “jo, jo” thüilaxle lebama wüi “Müno”, le achat ang, ma zongma amüimüi ma lax ang zingkya hia?

¹⁸ Zange otuechu thaikya zang chiwün, ija ningle, ku kaxtsaochu “Jo, jo” thüi üntoxle “Müno”, le chichang.

¹⁹ Chemthüikoxle Jisu Khrista Zang Hosa, owa bama Sila hia Timothi kwome hünzom hato apuk-apua puix, chix a tuita “Jo, jo” ofüima “Müno” chichang. Itülüi chix a “jo, jo” Zang changpu;

²⁰ Chemthüikoxle Zang kaxtsaobu pangnu hanpakma “Jo, jo” a chix changle. Idaile Jisu Khrista kem “Amen” makhange keme Zang fuazang ang tompu.

²¹ Hünzom füi tomle kwomchu wüi Khrista füikya notom ma oshing mongle thomkya a Zang changle;

²² chix kem zongto hopunu changpu le aho ang, tamchu chixe kem hanpak ang athünle thomkya pangnu kox angkya münwan ang, chix Otsao Chasa kem mongto kox.

²³ Ku ngui ilaxle sale hünzom mong nak ama le ku Korin to münngui ngole mongzangwünle tsuakkya khoma; ija bama hünzom mongmakya chitüi angkya hanpakma, ku khosele kaxkhi fa ang kue Zang sepu ija chixe awan.

²⁴ Kwome hünzom mongong thakma apün awang ang azongkya münchang; ikoxle kwome hünzom füi saxmokkya a hünzom mong amüi ang changwüi; chemthüikoxle hünzom mongong ma shingmongle ajongle tüikya kwome awanpu.