2 JUHAN 1 - OTSAO BAIBEL (BSI)

¹ Mixmüi Tüichong tokhange: Kue otsing tomtata ma mongkünkya tuita mixcha hia hosa hwom hato. Ku tatae le münchang ikoxle otsingtsing awanle tüikya pangnusae hünzom to mongkünkya tüile,

² chemthüikoxle kwom ma otsingtsing tüile ngole ilaxle ija a othuithuima ngo angkya changle.

³ Hopa Zang tamchu Hosa Jisu Khrista-e kem ang chingcha-jaja hia mongsom naxfakox; otsingtsing hia mongkün ma ibu a kem hanpak ang naxchang.

Otsingtsing tamchu Mongkün

⁴ Züizüi nang naosombu Hopa Kaxtom kax ma laxle ngokya ngünlaxle ku ang tüle mongmüipu.

⁵ Ikhoma kue mongkünle tüikya mixcha ang thüipu: keme tata to mongkünkya tüihax. Ija kue zale ngokya a kaxtom hozün zale ngopule münchang; ija kaxtom a keme pongwang tokhange wüi koplaxle ngopu.

⁶ Kem Zang kaxtombu kax ma laxle ngo angkya hanpakmale kue ija mongkün mo wünle ngopu. Hünzome pongwang tokhange wüi atatle hüikya kaxtom a, hünzom a mongkün ma ngo angkya bama changle.

⁷ Jisu Khrista khünak ang achangle nguikya to chiongkya, mixdyen angkyabu zangfang pangnu khato paodaoa. Iningkya khünak a mix-dyen-mix tamchu Khrista zanpa changpu.

⁸ Nange chem hanpakma mokle ngopuix, ija chiamütle hingho okhonguile kop angkya hanpakma mik-hingle ngolax.

⁹ Owawa Jisu Khrista hwon-nwot füi chingo, ikoxle ija akaile pao, chix ma Zang müntüi. Jisu hwon-nwot ma ngole tüikya khünak füi a Hopa hia Hosa pangnyi womle tüile.

¹⁰ Idaile, ija hwon-nwot chilax homtoxle nang hato owawa nguile jangchang, chix a nang hom ma pongle taxkop; “Nang füi mongsom naxtüi”, le ngaxchu taxthüi.

¹¹ Chemthüikoxle owawae ibu ang nomfui le thüikya mix jangtüi, chixchu wüi ibue mokkya mwot ma üitho changpu.

Kaxshukbu

¹² Kue hünzom hama wün angkya tüihupu, ikoxchu kue ibu a laiza makhange shongmün-wünngo; ikoxle ku mongmüi okho-angui angkya kuxma, ku huake jao hünzom wai angkya kue monghompu.

¹³ Nange mongkünkya Nanao hosa hwome hünzome hato salam akatle.