1 WANGHOMBU 9 - OTSAO BAIBEL (BSI)

Solomon hato Zang Tamchatle Lai

¹ Wanghompa Solomon-e Zangshwom-Hom hia wanghom homlo tamchu chixe zaise tsukya pangwüi zaile ashuk füima,

² Jowanpa chix hato tamchatle lai, chix a Gibeon ma tüile asukya.

³ Jowanpae chix ang thüi: “Kue nang zangjop atatdaoa. Nange zaikya Zangshwom-Homnu othuithuima ku to shwomkya nui ang lax angkya hanpak ang kue süile kopdaoa. Kue ija jento nyele ngoüi tamchu sünle thomüi.

⁴ Hünpa Dawid lailaile nang chuwüi tutex mongtsaokya füi ku thothale jangchang thüiningle ilaxle nange ku wanlom hia kaxtombu pangwüi kax ma laxle jangtüi thüiningle,

⁵ kue hünpa Dawid füi tsaosaxkya pangwüi otya ma thomüi ilaxle Israel haxtok a chix sixli hwome apünle ngo ang tomüi.

⁶ Ikoxle nange tamchu nang sixli hwome ku mantokya jangzak, kue fakya wanlombu hia kaxtombu hünzome chito ikoxle ama baozangbu to shwomle jangchang,

⁷ izuma kue hwom ang fale thomkya ija haxtok angkya Israel khünakbu achaüi. Ku to shwom angkya onui hex-ole zünle kopkya ija haxtok tamchu Zangshwom-Hom chuwüi kue danle toxüi. Khünaknue pangkha towüi Israel nok to anu-ahaile changüi ilaxle she to adix-adale changüi.

⁸ Ija Zangshwom-Hom a homting zaza ma ang dantoxüi, ilaxle le-zyenüi khünak noknusa wüi khosam üntoxle abütle changüi. Hwome atüiüi, ‘Hulax! Ija haxtok hia ija Zangshwom-Hom to Jowanpae ile büthüikoxle hwonpuix?’

⁹ Khünaknue lanüi, ‘Hwome, Jowanpa hwom Zang awütkya khoma ile changpu. Chix a hwom pupa hwom Ijip nok tokya alaile apüikya Zang changhupu. Hwome e-sele tüikya baozangbu chak to hwom alüile kox ilaxle ibu to shwomle changkya khoma Jowanpae hwom hato ija thama ahüipu.’”

Hiram füikya Solomon Tsaifün-Kaxwün

¹⁰ Zangshwom-Hom hia chix wanghom homlo zai ang Solomon-e zangtsa lax.

¹¹ Tair nok wanghompa Hiram-e sedar pün hia chixe lomkya hun pangwüi ija mwot tsuak angkya hanpakma kox. Ija mwot tsuakle chang füima wanghompa Solomon-e Hiram ang Galili haxsüt ma tingnu 20 kox.

¹² Hiram ibu to hu ang pao, ikoxle ibu to chixe chilua.

¹³ Ikhoma chixe Solomon ang thüi: “Ikoxle, tüinao, tingnu ibu ang nange ku ang fakyabu changle!” Ikhoma anyix kople ijongkha ang Kabul le nyak.

¹⁴ Hiram-e Solomon hato otuak ma 4, 000 to nüile hun akat.

Anaolechu Solomon-e Tsuak-sangle Hüikya

¹⁵ Wanghompa Solomon-e Zangshwom-Hom hia wanghom homlo zaikya ma, tingnu zongma handünchi kao ma hax thok ang hia tingnu katuk swon angkya mwotmixbu ang amok. Chixe ija, Hazor, Megido hia Gezer tingnubu zing ang chuwüi twon.

¹⁶ Ijip nok wanghome Gezer to single ija tingnu kop ilaxle ima tüikya khünakbu hia tingnu to wün langle mik-amüt. Ofüima chixe chix sacha Solomon ang koxle changkya zuma hingho-najo tuita ningle koxle apao.

¹⁷ Ija Solomon-e azünle zingle lax. Chix mwotmixbu füi Solomon-e Amachi Beth Horon,

¹⁸ Balath, Judah faokha tokya Tamar,

¹⁹ tingnu ojongkha ma chix thalix tuibu thompuix, chix man hia man-kanlinbu hanpakma tingnubu, ilaxle Jerusalem ma chixe zaise atsutsu zai ang, Lebanon ma, ilaxlechu wangting mama khato chuwüi mwot mok ang hwom lax.

^20-21 Solomon-e chix mwotmixbu ang Israel noke chaxwan kop pongma langle awüt daokya Kanan nok oli-okanbu lax. Hwom khama Amor, Hit, Periz, Hip hia Jebu nokbu pangwüi sixli ima womle tüikya. Anyix kople hwom a da ang achangle wüi ngole.

²² Solomon-e Israel khünak owachu da ang chilax; hwome süpahi ma, alixachongbu ang, kaxtom koxmixbu ang, man-kanlin zopmixbu ang tamchu man ahamkya khünakbu ang ngolaxle chix thotha.

²³ Mali mali Solomon homzai mwotthobu ma mok angkya dabu to hu ang alixachongbu 550 khünak tüikya.

²⁴ Solomon-e tingnu handünchi kao hax füi lwon. Ija a chix wangchanu, Ijip nok wangcha, Dawid tingnu angkya she hanpak ang zaikya wanghom homlo to nguikya füima mok.

²⁵ Zanglao to azomzom ma Solomon-e zokle ashunkya tö hia notom-tusüi tö, chixe Jowanpa hanpakma zaikya tö-tsap ma kox. Chixe ongan müikya sobu Jowanpa ang zokle ashunle kox. Ija ningle chixe Zangshwom-Hom zaikya ashuk.

²⁶ Wanghompa Solomon-e Ezionzebar ma chun mun zütnui pom zai; ija a Agaba haxshuk tinu kax ma, Elath hama soxle Edom nok haxtok ma tüikya.

²⁷ Wanghompa Hiram-e tinu mongto khua ham mankyabu chix chun mun zütnui tokhange, Solomon khünakbu füi tomle mwotmok ang akat.

²⁸ Hwom Ofir nok to khua ma pao, ilaxle Solomon hato tuak 14, 000 to nüile hun apüi.