1 WANGHOMBU 8 - OTSAO BAIBEL (BSI)

Tsaotsüt Suak a Zangshwom-Hom to Apüi

¹ Ifüima Dawid Tingnu, Zaion angkya Tsaotsüt Suak Zangshwom-Hom to apüi angkya hanpakma Solomon-e Israel nok saxthom, homjen lompabu komle Jerusalem ma nyakle asox.

² Hwom pangwüi, Ethanim lyet, lyetnu kua anüt lükya to Pomsa Pangpwon pongma hwom pangwüi asox.

³ Chemtue khünaknu atomtile asoxpuix, ipongma zompu-zangpabue Tsaotsüt Suak nwon,

⁴ ilaxle ija Zangshwom-Hom to paile apüi. Liwi hia zompu-zangpabu chu Jowanpa Ngwotnui Nyihom hia mama tuinabu komle Zangshwom-Hom to apüi.

⁵ Wanghompa Solomon hia Israel khünaknu pangwüi Tsaotsüt Suak tunthoma asox ilaxle chun hia maihubu okiak chithole tö kox.

⁶ Ifüima zompu-zangpabue Tsaotsüt Suak Zangshwom-Hom to nwonle dün ilaxle Ataxkya Otsao Nui ma cherubim fang ma dan.

⁷ Okhi ozang pünkyae Suak hia ija paikya dang to o.

⁸ Ataxkya Otsao Nui tunthoma tangthole ajongkya mixe dang otun ngün ang kop, iboma mama ojongkha tokhangechu ija ngün ang chikop. (Anyix kople dang ibu ikhama tüile.)

⁹ Israel khünaknu Ijip nok tokya chatle ngopongma, Jowanpae hwom füi longzale kaxfün pongma fakya longkhao anyi Mosa-e Sinai haxnu ma tüipongma ikhama shopuix, ija boma Tsaotsüt Suak ma chemchu chitüi.

¹⁰ Zompu-zangpabue Zangshwom-Hom angkya laile paopongma, allele zangfwome ijakha awangle

¹¹ Jowanpa womle tüikya wünnyane nyanle hwom ikhato mwot mok ang tamchatle dong ang chimüile chang.

¹² Ifüima Solomon-e zangjop: “Jowanpa, zanghan ding to nange panpu, Ikoxlechu zangfwom hia zangnaknu khato ngo angkya nange zünle koppu.

¹³ Athaxpi kue nang hanpak ang chongkya Zangshwom-Hom tuita zingdaoa, ikhama oshuk chitüile nang ngo angkya hanpakma.”

Solomon Khünaknu Pünzün-wangsai

¹⁴ Khünaknu ikhama ajongle tüipongma, Wanghompa Solomon hwomchi to thün aho ang aküi, ilaxle chixe hwom hanpak ang Jowanpa mohiman ju.

¹⁵ Chixe thüi: “Jowanpa, Israel nok Zang achuak kox! Chixe apa Dawid füi,

¹⁶ ‘Kue ku khünaknu Ijip nok tokya apüikya makhange, Israel haxtok ma ijongkha ma Zangshwom-Hom zailaxle ku to shwom angkya hex-ole kue tingnu tuita chu zünle chikop. Ikoxlechu, Dawid, kue ku khünaknu thakma apün angkya hanpakma nang zünle koppu’ le thüikya chix tsaotsüt otya ma thom.”

¹⁷ Solomon-e chizakle akax: “Ku apa Dawid, Jowanpa, Israel nok Zang to shwom angkya Zangshwom-Hom zaile alai angkya mong ma ajang,

¹⁸ Ikoxlechu Jowanpae chix ang thüi: ‘Nange ku to shwom angkya Zangshwom-Hom zai angkya mongtsukya olom jao changpu,

¹⁹ Ikoxlechu tütue chu nange zaile münalaiüi. Ku Zangshwom-Hom zai angkya a hünsa tix changüi.’

²⁰ “Ilaxle athax Jowanpae chix kaxtsao thom. Kue Israel ma apa man ma wanghompa mantswon ang kop, ilaxle Jowanpa Israel nok Zang to shwom angkya hanpakma Zangshwom-Hom zaile alaidaoa.

²¹ Kue Tsaotsüt Suak dan angkya Zangshwom-Hom ma onui kox. Ija Tsaotsüt Suak a Jowanpae hwom Ijip nok tokya alaile apüi pongma kem pupa hwom ang tsaosaxle changpongma fakya longkha anyi shole tüikya changle.”

Solomon Zangjop

²² Ifüima Solomon tö-tsap zui to donglaxle khünaknu tunthoma ajong. Imakhange chixe chak ajong

²³ ilaxle zangjop: “Jowanpa, Israel nok Zang, thakchi ding to tamchu fangchi hax to nang lailaikya zang owachu müntüi! Nange nang khünaknu füikya tsaotsüt thom ilaxle hwome kün-hi-mong makhange abakle nang kax ma laxle changpongma nange hwom hato nang mongkün aho.

²⁴ Nange ku apa Dawid füi tsaosaxkya otya ma thom; anyix ibu zangwün komkaile changle ngaidaoa.

²⁵ Ilaxle athax, Jowanpa, Israel nok Zang, hwome khünkhikhile nang kax ma laxle jangchang thüiningle, Israel haxtok apün angkya hanpakma wanghom a jento chix sixli kha angkya wüi ngo angkya changle le apa Dawid füikya nang tsaotsütchu otya ma wüi thom hüile kue nang to joppu.

²⁶ Idaile athaxpi, O Israel Zang, apa Dawid, nang dapa füi tsaosaxkya pangwüi changle hüi ang tomhüi.

²⁷ “Ikoxle, O Zang, nang a chaxwannu ma ngo ang tho ang chami? Zangdingkho ibibi ma ngaxchu nang shatang onui chitüi, idaile kue zingkya Zangshwom-Hom tomning nguiüi hia?

²⁸ Jowanpa, ku Zang, ku a nang dapa changle. Ku zangjop to lanhüi, ilaxle anyix kue nang ma jukya ku ang fahüi.

²⁹ Ija Zangshwom-Hom to zangnak zangngaile nyele ngohüi. Ija a nang to shwom angkya hanpakma nange zünle kopkya onui changle. Ija Zangshwom-Hom chito hulaxle kue zangjop pongma nange ku to apahüi.

³⁰ Ija onui chito hulaxle kue tamchu nang khünaknue zangjople changpongma, nange kwom zangjop to lanhüi. Zangkho-wangting nang hom tokhange kwom to lanhüi ilaxle kwom ang thailak tüihüi.

³¹ “Khünak tuita hozuipa owawa zongto mütkopdaoale kaxhux fele nang tö-tsap zui to apüilaxle chix a chithaikya mix changpule tsaosaxle changpongma,

³² O Jowanpa, zangkangting tokhange apahüi ilaxle nang dabu bama kaxfün fahüi. Chix ma asukya ningle thaikya mix to sikangünkox, ilaxle chithaikya mix a sukya ang achang kox.

³³ Hwome nang zongto ochax lyenle changpongma chemtue nang khünak Israel nok to zanpabue lütle changüihex, ilaxle chemtue hwom künlop-monglüi laxle nang hato chatle ija Zangshwom-Hom to nguiüihex, tamchu puinaikya füi nang ma thailak jule changüihex

³⁴ zangkangting tokhange hwom to lanlax. Nang khünaknu thaikya ochaxbu alakkya tüikox, ilaxle nange hwom pupa wom ang koxkya haxtok to hwom tamchatle apüikox.

³⁵ “Nang khünakbue nang zongto achaxkya khoma chemtue nange zangwat abaxle thom, ikoxle hwom chemtue mong aloplaxle ija Zangshwom-Hom chito thün aho ilaxle puinaikya füi nang to zangjople changüihex,

³⁶ zangkangting tokhange hwom zangjop to lankox. Israel nok wanghom hia khünaknu thaikya ochaxbu alakkox. Chem supuix ija mok angkya hwom hama anwot-anole changkox. Ifüima, nange nang khünaknu ang othuithuima hwom kux ang fakya nang haxtok hato zangwat ajole changkox.

³⁷ “Chemtue ija haxtok ma otui-onuak tüiüihex chichangba kaknu-laknu lele changüihex chichangba tsaxsa-hikha chei-june ama tamchu kuk-wyae saxle changüihex, chichangba chemtue nang khünakbu to zanbue single changüihex, chichangba hwome okak-olak apongle changüihex,

³⁸ ipongma hwom zangjop to apakox. Israel nok nang khünak owawae athukle küntsik-mongmakya tokhange, ija Zangshwom-Hom chito chakthui laxle zangjople changpongma

³⁹ hwom zangjop to lankox. Nang ngwotnui zangkho-wangting tokhange hwom to apakox, hwom thaikya alakkox ilaxle hwom to asunkox. Khünak tutex-mongtsang nang tatae awanwüi. Pangnusa füi olom ma mokmole changhüi,

⁴⁰ ikoxle hwome ija haxtok ma ngokya kople nange kwom putong hwom ang koxkya kax ma othuithuima laxle naxngokox.

^41-42 “Chemtue ochu to ngokya mixnokbue nang zaxzangkya zing tamchu nange nang khünakbu hanpakma chongkya mwot mokkya zing atatle laxüihex, ilaxle ija Zangshwom-Hom ma nang to shwom ang nguile changüihex,

⁴³ chix zangjop to lankox. Nang ngokya zangkangting tokhange chix kax to lankox ilaxle chixe mok-hüile thüikya mokle laxkox, ikoxle tix nang khünaknu Israel nok ningle chaxwannu khünaknu pangnusae nang tsingüi ilaxle nang kax ma laxle tüiüi, Ifüima hwome, ija kue zaile alaikya Zangshwom-Hom a nang shwomnui changpule awanle laxüi.

⁴⁴ “Nange nang khünaknu hwom zanpabu zan to ka angkya kaxtom koxle changpongma, hwome chemtue nang to zangjople changüihex, tüta jongto khange wüi changlax, nange zünle kopkya tingnu hia kue zaile alaikya Zangshwom-Hom chito hwome thün ahole changpongma,

⁴⁵ hwom zangjop to lankox. Zangkangting tokhange hwom zangjop to lankox ilaxle hwome hwom zanpabu to lüt ang tomkox.

⁴⁶ “Chemtue nang khünaknue nang zongto achaxle changüihex ilaxle ochax chilyenkya mix owachu chitüi: ilaxle nang ang mongtsik üntoxle nange hwom to zanpabue lüt ang tom ilaxle hwom a mixnok chaxwan to da ang koplaxle paole changpongma, ija chaxwan ochu towüi chang koxlechu,

⁴⁷ nang khünaknu zangjop to apahüi. Ekhato hwom ang mong alop ilaxle nang to jople, hwom thaidaokya ochaxbu ngaile changpongma; O Jowanpa, hwom zangjop to lankox.

⁴⁸ Ekhato hwom otsingtsing ma mong alople jangchat, ilaxle zangjople hwome kwom putong hwom ang nange koxkya haxtok chito hule, nange kamle kopkya tingnu hia ija Zangshwom-Hom texle atakle jangchang,

⁴⁹ ipongma nange hwom zangjop to lankox. Nang ngwotnui zangkangting nang hom tokhange nange hwom to lankox ilaxle nange hwom to chingchakox.

⁵⁰ Hwom ochax hia nang zongto alün-aloxle thaikya ibu pangwüi alakkox, ilaxle hwom zanpabue hwom to chingcha füi hume ang tomkox.

⁵¹ Hwom a tüle zaxle chuale ngokya Ijip nok wünkham khatokya alaile apüikya nang khünaknu jao changpu.

⁵² “Khüthak Jowanpa, nang khünaknu Israel nok hia hwom wanghompa to othuithuima nange chingcha füi hukox, ilaxle hwom to asun angkya lomle nang ahyenle zangjop pongma, hwom zangjop to lankox.

⁵³ Nange hwom a khünaknu pangnu kha angkya nang khünaknu ang kamle kopkyabu changle; ija kax nange nang dapa Mosa makhange, Ijip nok tokya hwom alaile apüi pongma angaidaoa.”

Oshuk Zangjop

⁵⁴ Solomon-e akhuxlaxle chak ajongle Jowanpa to zangjopkya ashuk füima chix tö-tsap tunthoma ajong.

⁵⁵ Chixe akhongle ikhama asoxle tüikya khünaknu hanpakma mohiman ju. Chixe thüi:

⁵⁶ “Chixe koxüihex-ole tsaokya tumüi chix khünaknu ang koxkya Jowanpa achuak-achen kox. Chixe chix dapa Mosa makhange koxüihex-ole tsaokya chingcha kaxtsao pangwüi koxdaoa.

⁵⁷ Jowanpa kem Zang kem füi naxngo, ami kempu kempa hwom füi ngole hüidaokya lailaile a; chixe kem danle taxtox chichangba awütle taxtox;

⁵⁸ chixe kem chix kax ma laxle tüi ang tomhüi, ikoxle tix kem chix mongtex ma ngo ang tamchu kem pupa hwom ang koxkya chix wanlombu hia kaxtombu komkaile thom ang thoüi.

⁵⁹ Ija ku zangjop hia chingcha jukya Jowanpae jento texle naxatak. Israel khünaknu hia hwom wanghom to chixe chingcha-jajakya naxtüi, hwome chemle mokpuix ija lailaile a.

⁶⁰ Ikhoma chaxwannu pangnok-jating towüi Jowanpa ti Zang changpule awan ang kopüi, chix boboma Zang mama tamtüikya münchang.

⁶¹ Anyixkya lailaile, hünzom, chix khünaknu pangwüi othuithuima, chix kaxtombu kax ma laxle Jowanpa kem Zang to mongong tüikya füi naxngo.”

Zangshwom-Hom Atsaokya

⁶² Ifüima wanghompa Solomon hia ima asoxle tüikya khünaknue Jowanpa ang tö kox.

⁶³ Chixe 22, 000 maihu khang hia 1,20, 000 chunbu notom-tusüi tö ang kox. Ilaxle wanghompa hia khünaknue Zangshwom-Hom atsaole dan.

⁶⁴ Ija nyix-nyix wüi chixe khwa osungkha atsao, ija onui a Zangshwom-Hom tunthoma tüikya, ilaxle chixe ikhama otom ma lanle tamchu saxziak, ilaxle müi ozaobu notom-tusüi tö ang kox. Khop-jan füi zingkya tö-tsap ibu pangwüi hanpak ang sühixkya khoma chixe ija ile mok.

⁶⁵ Zangshwom-Hom ma Solomon hia Israel khünaknu pangnusae nyix anüt Pomsa Pangpwon sax. Hamath lomnu makhange shuathongchi Ijip nok longzipong alople khünaknu huanuma tüikya.

⁶⁶ Nyix achyet lükya to Solomon-e khünaknu mahom-hom to apao. Jowanpae chix dapa Dawid hia Israel khünaknu ang koxkya mohiman pangnu hanpakma chix achuakle mongmüi atungle khünaknu a mahom-hom to chat.