1 WANGHOMBU 4 - OTSAO BAIBEL (BSI)

Solomon Nguakax-wangkhobu

¹ Solomon a Israel nok pangnu wanghom changkya,

² ilaxle ibu a chix nguakax-wangkhobu changkya: Nguapa: Zadok sasün Azariah

³ Khwalo ma chakza mixbu: Shisha sasün Elihoref hia Ahijah nyi Zale thom angkya mix: Ahilud sasün Jehusafat

⁴ Süpahi Lompa: Jehoiada sasün Benaiah changkya Nguapabu: Zadok hia Abiathar nyi

⁵ Haxsüt tuita ma gowarnor tüichong: Nathan sasün Azariah Chongwanghom wangsupa: Nathan sasün nguapa Zabud

⁶ Chongwang homlo datüichong: Ahishar Atsangle mwot amokkya to hu-mix: Abda sasün Adoniram

⁷ Israel haxtok ma haxsüt gowarnorbu ang mixhuak bün-anyi kam. Hwome wanghom homkhae sax ang ma haxsüt tokya sütbu apüile koxüi, zanglao mong ma mixhuak tuitae lyetjang pong thaüi.

⁸ Ilaxle ibibi a hwom 12 nguakax-wangkhobu hia hwome apünle hüikya haxsütbu mün changpu: Benhur: Efraim angkya haxhuak nok to apün

⁹ Bendekar-e: Makaz, Shalbim, Beth Shemesh, Elon, üntoxle Beth Hanan ibibi angkya tingnubu to apün.

¹⁰ Benhesed-e: Aruboth hia Sokoh ilaxle Hefar angkya haxsüt pangwüi to apün.

¹¹ Benabinadab, Solomon sacha Tafath laxkya mixsüne: Dor haxsüt pangwüi to apün.

¹² Ahilud sasün Bana-e: Tanak, Megido, ilaxle Beth Shan zui angkya, Zarethan tinglong zui angkya, Jezril zongma shuathongchi, Abel Meholah tingnu hia Jokmeam tingnu jao alople tüikya tingnubu to apün.

¹³ Bengebar-e: Gilid angkya Ramoth tingnu, Manasseh sixli Jair hwom saxthom kux tingkhuabu, Bashan angkya Argob wankam, pangwüi athüt koxle chongkya-chongkya tingnubu 60, panzailaxle long katuk füi ziakople tüikya hia pan zünkaibu to khopjanbu füi aja laxle tüikya, ibu to apün.

¹⁴ Iddo sasün Ahinadab-e: Mahanaim haxsüt to apün.

¹⁵ Ahimaz, owae mama Solomon sacha Basemath laxpuix: Chixe Neptali haxsüt to apün.

¹⁶ Hushai sasün Bana-e: Ashar wankam hia Biloth tinglong to apün.

¹⁷ Paruah sasün Jehusafat-e: Isakar haxsüt to apün.

¹⁸ Ela sasün Shimei-e: Benjamin haxsüt to apün.

¹⁹ Uri sasün Gebar-e: Gilid wankam, ojongkha Amor nok wanghom Sihon hia Bashan nok wanghompa Og nyie apünle hüikya kha apün. Hwom mixsün 12 boma, haxtok pangnu to o-le gowarnor tuita tüikya.

Solomon-e Ahak-aluale Apünkya

²⁰ Judah hia Israel khünakbu a tinu kax to tüikya fixtsang büta akiak ang chithole tüikya; hwom pangwüi sax-lingle tamchu mongmüi-pwonlale ngo.

²¹ Solomon wangting ma Eufrat Shuanu makhange Filistia alople ilaxle Ijip nok longzipong, ibu ma tüikya jat-li pangwüi womle tüikya. Hwome chix hato süidün ilaxle chix tsüntsün ma hwom chix wangpünnu ang ngonui.

²² Solomon homkha ma nyixfokya bak angkya tuina a ibibile tüikya: ankhix khong ma 5000, ilaxle süt khup ma 300;

²³ fünle tsomkya maihu 10, danle tsomkya maihu 20, chun 100; ibu a müikhi, müijax, chokpong hia o-chongli, ibibi obo ang changüi.

²⁴ Solomon Eufrates shuanu hannopchi makhange Tifsah hia Gaza tingnu hannopchi kople tüikya haxtok pangwüi apün. Eufrates hannopchi ma tüikya wanghombu pangwüie chix hato süidün, ilaxle tomzi nokbu füi chix nokmüi ma ngo.

²⁵ Chix ozün ma ngokya kople, Judah hia Israel angkya khünaknu pangwüi, kako foto makuxkuxle grep manzai hia fupsa pünbu füi ngo.

²⁶ Solomon ang man-kanlin 40000 ilaxle mankho ma azankya süpahi 12000 tüikya.

²⁷ Chix gowarnor hwom mixsün 12 e ma hato otsyen nguifofo, lyetjang tuipong hanpak ang, Solomon homkha hia chix wanghom homlo ma fongsax ang nguikyabu pangnu hanpak ang sütling tsüilüile kox.

²⁸ Gowarnor tuiponge wonglai tsax tamchu tsaxsa pokya zyen lin angkya manbu ang koxkya hia mama tsom-pombu ang kox angkya matsyen-matsyen apüile, ojongkha ma lompuix ikhama kox

²⁹ Zang-e Solomon ang ozangjang je to ataxkya thüt ang chitsuakle je-hwon kox.

³⁰ Solomon a handünchi nok jepabu hia Ijip nok jepabu thak to jetüi-hwonzaikya mix changkya.

³¹ Chix a khünak khama ataxle jetüi-hwonzaikya mix tuita changkya. Izra nok Ethan hia Heman, Kalkol hia Darda, Mahol sasün hwom, ibibi to ngaxchu chixe wüi nui, ikhoma chix mün fuale tomzi nok pangkha towüi wün.

³² Chixe 3000 tukux wanwünkax zing ilaxle 1000 tukuxle tsai zing.

³³ Chixe Lebanon pün sedar makhange katuk to nyemkya haisop to lünle fum-sui hia pün-zuabu pangwüi to sai; chixe müi-nyax hia 0-jux tamchu pu-mak pangwüi to saile zangwün.

³⁴ Chaxwantok angkya wanghombue chix hwon-je bama atat ilaxle chix tsai chix kax to apa ang khünakbu ngui.