1 TIMOTHI 4 - OTSAO BAIBEL (BSI)

Othai Nwotmixbu

¹ Athax füichi ma züizüi khünakbue mongong danle tox angkya kax Chasae tsaotha le akax; “ibue atsekya chasabu kax ma laxüi ilaxle haxshix hwon-nwot lom ma leüi.”

² Ija ningkya hwon-nwot a atsele dyen-ngankyabu, opang khangka jankhik füi akhamkya ningle omang ma tüilaxpuix, hwome apuküi.

³ Iningkya khünakbue aju-asomkya hia züizüi sütli sax angkya thaikya ang changüi le anwot-ano. Ikoxle ibu sütli lingli a, chix to mongongkya tamchu otsingtsing awan ang kopdaokyabue, münchong fale zangjop laxle sax angkya hanpakma Zange zingkyabu changle.

⁴ Zange zingdaokya pangnu li omüimüi wüi; tuitachu awüt angkya müntüi, ikoxle pangnuli wüi münchong fale zangjopkya füi pongle kop angkya changle.

⁵ Chemthüikoxle Zang kax hia zangjopkyae, ija Zang pomtho ma pongle kop angkya sukya ang achangle.

Khrista zongto Müikya Da tuita

⁶ Nang kaxbu ilaxle nange man tole hüidaokya otsingtsing hwon-nwot füi chasa ma nang tuxle ngopongma, tüinaohom hato nange ibu adangle jangfaba, nang a tuita Jisu Khrista da müikya mix ang changüi.

⁷ Ikoxlechu wün ang thakho chinguikya ibu Zang chitüikyabu pupa zangwün füi atsaile ngolax. Zang womle tsün ngo ang mokkya olom ma nange hanpak hia zong ashixlax.

⁸ Tsangtsa mwotchu tix changpu ikoxlechu chasa mwot sisi hotüichong, chemthüikoxle ijae anyixkya tsün tamchu füichi tsün monyi bama lap faüi.

⁹ Abakle pongle kop angkya tamchu mongong angkya kax ija a otsing tomta changle.

¹⁰ Kwom azanpu ilaxle azongle mokpu, chemthüikoxle pangnusa khosün mix tamnüilechu opange ongpuix, hwom hanpakma, kwome kwom monghom ozün Zang ma thompu.

¹¹ Hwom ang adangle fakox ilaxle ibu anwot-anole laxkox.

¹² Nang naosünsa changle le owawae nang to thajao le hu ang taxkox, ikoxle mongong mixbu zongto, nang zangwün ma, nang zanglom-saikha ma, nang mongkün ma, nang mongong ma ilaxle tsaothakya ma nang apyen angkya ang changkox.

¹³ Ku mangui-manguile, nang hanpakma hia azongkya noknu hato Otsao Lai ekya üntoxle hwon-anokya hia anwot-anokya mwot to sütle ngokox.

¹⁴ Ajepae akaxkya hia mixmüi tüichongbue nang khangkho ma chak dankya zuma nang ang fakya, nang ma tüikya chasa hingho chie chise le taxchang.

¹⁵ Ibu mok ang anole ngolax ilaxle nange ibu to mong koxlax, ikoxletix nang mwotthobu tsongle hüikyabu noke ngün ang kopüi.

¹⁶ Nange ma to alüile tamchu nang hwon-nwot to khünkhile hulax. Thuithui le ibu mokle lekox, chemthüikoxle nange jangmok thüikoxle nange ma khosün kopkya boma nang kax atatkyabuchu sün ang thoüi.