1 TIMOTHI 2 - OTSAO BAIBEL (BSI)

Müimüithom Zangshwom

¹ Ipue, zangjopkya, jukya, tamchu münchong, khünaknu nok hanpakma Zang ang laxkox;

² Ija ningle wanghombu hanpak ilaxle opang kem thakma apün-awangle ngolaxpuix, hwom hanpakma chichangba chongkya hünlix laxlaxle ngokyabu hanpakma, kem dangjale tamchu mongsom ma pangnu to Zang achuak achenle ilaxle olom ma changle saxmok le chang angkya zangjop kox.

³ Ija müikya changle ilaxle ijae kem Khosünpa Zang,

⁴ owae, pangnusae khosün atak angkya ilaxle otsingtsing awanle naxchangle texlax puix.

⁵ Chemthüikoxle Zang a tuita wüi changle; Zang hia khünak tama asüi ang tomkya, khünak tuita Khrista lan wüi changle,

⁶ owae khünaknüsa khosün ang, chix tsün alüile kox laxpuix. Ija a tuita hanpakma asule tüipongma pangnusae wüi khosün kopsele texkya Zang mongtex ngaikya changle,

⁷ üntoxle ikhoma ku mixnokbu hato mongong hia otsingtsing bama kaxho apuk ang wangshem tuita tamchu anwot-ano ang tsanle apaokya mix changle!

⁸ Zangshwom tusox pangnu khato wüi lüka mixmüibue ochax, mongtsik hia kax ma alankya chemchu chitüi homle, otsao chak Zang hato nwonle zangjop koxle müisele kue texpu.

⁹ Sheko mixnubuchu wüi hwom nyiza hia zapua müile lax üntoxle somdangle tamchu khünkhi-lilang le tüikox müisele kue texpu.

¹⁰ Khristan shekobu a müikya mwot mokkya makhange tix awan ang koxkox le müi angkya oli changle. Hwom khoshit nasai chichangba tuizanakom chichangba faxsaxle nyiza laxkya, ibu tokhange münchang.

¹¹ Shekobue mongkoxle apa angkya tamchu dangjajale ilaxle mix fangto puile awan lax angkya changle.

¹² Hwon ano angkya tamchu lüka thakma apün angkya kue hwom mündan; hwom a dangjajale tüi angkya jao changle.

¹³ Chemthüikoxle pongwang ma Adam zingpu ifüima tix Ef zingpu.

¹⁴ Üntoxle dyenle adütlaxle Zang wanlom amakya a Adam chichang, ikoxle shekonu Ef mix changkya.

¹⁵ Ikoxlechu she puinaile mongong hia mongkün ma tamchu otsao ma ngole jangchang thüikoxle, naosom puxpaikya makhange she sünüi.