1 TIMOTHI 1 - OTSAO BAIBEL (BSI)

¹ Zang kem khosünpa ilaxle Jisu Khrista kem monghom tokhange Jisu Khrista wangshem ang achang ang tsankya mix Pol tokhange:

² Mongong ma kusa tomtata, Timothi hato: Hopa Zang ilaxle kem Jowanpa Jisu Khrista-e nang ang chingchajaja üntoxle mongsom naxfa hüi.

Othai Hwon-nwot bama Kaxkhün

³ Ku Mesidonia to kaüi lom to kue nang füi akaxkya ningle, kue nang a Efisia ma nuikoxle müisele texpu. Ikhato züizüie othai hwon-nwot apukle ngole, nange hwom ang dang angkya kax kox angkya changle.

⁴ Hwom ang ibu pupa zangwün ilaxle putong akiakle lowüilole zale thomdaokya awütdao le thüikox. Ibue kax ma alan angkya wüi chialaiba; ibue mongongle nyakkya Zang mongtex mokle aho angkya münchang.

⁵ Ija kax koxkya mongtex a: tsaothakya mong makhange laikya mongkün, je chipakya khangka ilaxle otsingtsing mongong azwot angkya hanpakma changle.

⁶ Ibu khatokya züizüi a chatle paoüna üntoxle ongat zangwünbu ma hwom lom asam daoa.

⁷ Zang wanlom ma hwom nwotmixbu ang achangse le tsu, ikoxle mongao ojao chitüi le hwome akaxkya chem hanpak changkya hex, ibu zangwünbu hwome awan ang chitho.

⁸ Ija twon angkya olom ma jangtwon thüikoxle wanlom a amüikya changpu le keme awanpu.

⁹ Ikoxlechu wanlombu a müikya khünakbu hanpakma chichangle wanlom pünkyabu, mix mik amütkyabu hanpakma, zang chilax homtoxle ngokya ochax khünakbu hanpakma, chasa ma chitsaokyabu hanpakma, honu hia hopa hwom langkya khünakbu hanpakma, mix mik amütkyabu hanpakma,

¹⁰ omüi-oma süile tsing ang chitsuakkyabu hanpakma, ahuxle mix kople paokyabu hanpakma, atse le zangwün ilaxle othai kaxkhi fakyabu hanpakma, tsaothale sungoünkya Baibel kaxtong füi apüile saxmokkya chemchem jangtüi thünba, iningkyabu hanpakmale zingkya changpu.

¹¹ Mohiman hia fuazangkya Zang tokhange kopkya Kaxho müikya oja apuk-apua angkya ku ang koxle thompuix, ija Kaxho Müikya ma ija hwon-nwot tüile.

Zang Chingcha bama Nomfui Thüikya

¹² Mwot mok angkya tsakzong ku ang owae fapuix, kem Jowanpa Jisu, chix ang kue münchong fapu. Ledaokya ma kue chix mo amale wün ilaxle chix to zothup tamchu adix-adale changdao koxlechu,

¹³ chix thotha angkya ku asukya ang lax ilaxle kamle kopkya khoma kue chix ang münchong fapu. Ikoxlechu Zange ku to chingcha chemthüikoxle ipongma ku ma mongong matüi üntoxle ikhoma kue chemmok laxpuix kue chitsing.

¹⁴ Ilaxle kem Jowanpa-e chix okhonguikya chingcha ku ma thokle kox ilaxle ku ang mongong hia mongkün fa, oja Khrista füikya notom ma kem tomkux changpuix.

¹⁵ Changpu le pongle kop angkya hia ong angkya bama: Khrista Jisu a chaxwannu to ochaxbu sün ang nguipu. Ku a hwom khama sümakya ochax khünak tuita,

¹⁶ mama khünakbue hwomechu oshuk chitüikya khüzün tsün atak ang thoüi changa le awanle lax ang kox angkya kuxma sümakya ochax khünak tuita füi ngaxchu chix ipongpong adupu le pangnusa hato afua angkya hanpakma Jisu Khrista-e ku apyen ang twon angkya bama Zange ku to chingcha, ija kax a otsing tomta changle.

¹⁷ Oshuk chitüikya wanghom, chizi angkya tamchu ngün ang chithokya chix boma chatle Zang tamchitüi: chix ang achuak achenkya tamchu fuazang othuithuima naxchang! Amen.

¹⁸ Kusa Timothi, ija kaxtom kue nang ang fapu: Nang ile chang angkya hexo le Jowanpa-e kem füi chix ajebu makhange akaxle thom daokya lailaile, Jowanpa zanhok ma nang amüile azankox.

¹⁹ Nang mongong shingmongle thomkox ilaxle khangka tsaotha le tüikox. Züizüi khünake hwom khangka kax ma chilax homtoxle hwom mongong oli thu ang koxle.

²⁰ Hwom khama Himanai hia Alekjendar hokhi changle, opang to kue bao chak to dankya makhange hwom ang sikngün fadao laxpuix; ijae hwom ang Zang ang omale thüikya zak ang anwot-ano le faüi.