1 SAMUEL 9 - OTSAO BAIBEL (BSI)

Sol-e Samuel Apong

¹ Benjamin homjen khama Kish le amünkya khünak tuita hakpa sün tamchu pangnusae awan-atsingle ngokya mixsün tuita tüikya; chix a Abiel sasün, Zeror susün ilaxle Bekorath homkha angkya, Afiah saxthom kangkhai changkya.

² Chix ang sasün “Sol”, le amünle tuita tüikya. Chix a osün tüle müile tamchu tsaktan khüse ma tüikya. Israel nok pangnu khama Sol khang wüi sechuak ilaxle sünchu chix wüi sümüile tüikya.

³ Kish kux mantsakbu züita paole sam, ikhoma chixe Sol ang thüi: “Nang füi tomle da tuita koplax ilaxle mantsakbu lomle anohu.”

⁴ Okhi Efraim Haxhua akaile paole Shalishah haxtok to nguile lom, ikoxlechu ibu ikhatochu chibang; ikhoma hokhi a Shalim haxtok chito khange le le hu; mantsakbu a ikhatochu chibang. Ifüima hokhi a Benjamin haxsüt to ngui, ikoxlechu mantsakbu a chiataktsuak.

⁵ Ikoxle Zuf haxsüt to nguikya zuma, Sol-e chix dapa ang thüi: “Hom to chat-hax, mantsakbu khoma abüt-abankya to kaile apa künyi khoma mix abüt-abanle ngoüna.”

⁶ Chix dapae lan: “Taxmok! Ikhama chixe akaxkax pangwüi changle hüikya khoma noke e-sele tüikya otsao khünak tuita tüile. Chix hato tam nguiwan huhax, owatsing, chixe mantsakbu ojongto ataküihex, künyi hama apuale chu fatüilax.”

⁷ Sol-e atüi: “Künyi chix hato nguikoxle, künyie chix ang chemfaüi? Künyi saxtsom ang ngaxchu sax chitüi, iboma künyi ma chix ang kox angkya tütalichu chitüi khato chemle müiüi?”

⁸ Dapae lan: “Ku ma khop ngunkhix hidaole tüile. Kue ija chix ang koxtsuaküi, ilaxle künyie ibu ojongto ataküihex ija chixe apuale faüi.”

^9-11 Sol-e lan: “Ija a müikya tutex tuita changle! khaxa paohax.” Idaile hokhi a ija otsao khünak ngokya tinglong to ngui. Okhi a tinglong to dong ang haxfa to ahamle tüipongma, hokhi füi ti to za angkya naochabu apong. Okhie naocha ibu ma atüi: “Ajepa tinglong ma chitüitüipuix?” (Ipongma ajepa ang ngünpa le nyak, ikhoma owawae Zang ma tütali atüise jangtsuba, chixe thüiüi: “Aje hato paohax.”)

^12-13 Naochabue lan: “Chix tüile. Chix a athax ile le le hünkhi thothoma tüile, hünkhi süjangmom thüikoxle chix hato alople chang ang tsuak. Hünkhi tinglong to nguikya füi shemle chix bangüi. Khünaknue haxhua to tö kox angkya tüikya khoma chix a anyix ija tingto to nguile. Chix ahyenkya khünakbue, chixe ikha alople machang tanto fong münsaxüi, chemthüikoxle tö koxkya to chixe tix mohiman zangjop kop angkya changle. Hünkhi momle jangle, chix haxhua to dongle fongsax ang thungle changüi thoto wüi hünkhie chix ha alople changüi.”

¹⁴ Ikhoma Sol hia chix dapa nyi ija tinglong to ngui, ile hokhi tinglong alople changüi khakha ma, zangshwomnui to pao ang laikya Samuel hokhi chito hüile ngokya hokhie ngünle lax.

¹⁵ Othonyix Jowanpae Samuel füi akaxle tüikya,

¹⁶ “Ngainyix kue itukhae Benjamin homjen angkya mixsün tuita nang hato ahüiüi; ku khünaknu Israel nok thakma apün-awangle chang angkya mix ang nange chix to münga füi pale kamkox, ilaxle chixe hwom Filistia chak tokya khosünüi. Kue ku khünakbu sikngünle ngokya ngünle laxdaoa ilaxle hwom to asunfa angkya mix lomle sopkya kue atatdaoa.”

¹⁷ Samuel-e Sol ngünkya füi tomle Jowanpae chix ang thüi: “Kue nang hama wünkya mixsün a ija changpu. Chixe ku khünaknu thak ma apün angkya changle.”

¹⁸ Ifüima Sol a Samuel hato hüi. Ipongma chix a zünkai zui ma tüikya. Sol-e atüi: “Aje hom ojongma tüipuix shong-apua fahüi.”

¹⁹ Samuel-e lan: “Aje a ku changpu. Ku thoto achale zangshwomnui to nguithün. Anyix hünkhi pangnyie ku füi tomle fongsax angkya changle. Ngainop swomsae hünkhi kax to bakle lanüi ilaxle tix hünkhi chat ang tomüi.

²⁰ Nyix azom thoto maxle ngokya mantsakbu bama abanle taxngo; ibu a atakdaoa. Ikoxle onüi laxsele lomkya Israel khünak ija owahex? Israel noke laxsele lomkya a nang ilaxle hünpa hwom homkha changle.”

²¹ Sol-e lan: “Ku a Benjamin homjen tokya changle. Benjamin homjen a Israel nok homjen khama akiakya homjen, ilaxle kwom homkha a kwom homjen khama oshuk-okia tix changle. Jangchangthüiba, nange ku füi iningkya zang büthüikya to wün?”

²² Ifüima Samuel-e Sol hia chix dapa nyi chongkya nui tuita to dün ilaxle mixwünbu sün 30 tukux thungle tüikya khama hokhi ang tsaptsua tun ma ngwotnui kox.

²³ Samuel-e fongmok mix ang thüi: “Kue nang ang süile thomhüi-ole koxkya müidwon alaihüi.”

²⁴ Fongmok mixe müichung hak alailaxle Sol tunthoma dan. Samuel-e thüi: “Hulax, ija müifun a nang hanpakmale thomkya changpu. Ija saxlax. Kue sekya khünaknu füi tomle sax angkya hanpakmale kue ija a nang tsyen ang tswonle thomkya changle.” Ikhoma Sol-e ija Nyix Samuel füi tomle Fongsax.

²⁵ Chemtue hwom zangshwom-nui angkya tinglong to thaipuix, hwome homdingkho to, Sol hanpak ang lyatan

²⁶ ilaxle chix ikhato jip. Swomsae Samuel-e homdingkho tokya Sol nyak: “Zolax, kue nang hom to achat angkya changle.” Sol zo, ilaxle chix dapa hokhi tingjang lomnu ma tomtomle le.

Samuel-e Sol to Münga füi Pale Lompa ang kam

²⁷ Chemtue hokhie tinglong pantua alople changpuix, Samuel-e Sol ang thüi: “Nang dapa ang künyi thoto achale le angkya kax laxkox.” Ija dapa thoto achale lenui, ilaxle Samuel-e chizakle akax: “Ikhama noxtasa tamtang hüi, kue nang hama Zang-e akaxkya kax wünfang.”