1 SAMUEL 5 - OTSAO BAIBEL (BSI)

Tsaotsüt Suak Filistia Nok to

¹ Filistia noke Jowanpa Tsaotsüt Suak kople changkya füima, hwome ija Ebenezar angkya hwom nok tingnu Ashdod to apüi,

² ilaxle hwom baozang, Dragon zangshwom-hom ma chix chapa zui ma dan.

³ Ofüinop swomsae Ashdod angkya khünakbue, ija Dragon chapa a Tsaotsüt Suak tunthoma haxchi to thün akhuxle nguakle ngokya ngün. Ikhoma hwome ija ajong ilaxle omanman ma dan.

⁴ Ofüinop chuwüi hwom thoma ija chapa a Tsaotsüt Suak tunthoma nguakle ngokya ngünle lax. Izuma a, ija khang hia chakbu apak laxle fülom zuito awütle bang; onui ma tompo tata tox. (

⁵ Ikhoma anyix kople Ashdod ma Dragon baozang to shwom ang hüikyabue, Dragon chapa danle thomkya haxmik ma chae münting.)

⁶ Ashdod angkya khünakbu to Jowanpae sikangün ilaxle tüle abüt-aban ang tom. Jowanpae hwom to tamchu hozui akhople tüikya khünakbu to haknüi lwotkya kak alaile sikngün apong ang tom.

⁷ Chempang-ole changpuix, ibu hwome ngün ang kopkya zuma, hwome thüi: “Israel nok Zang-e kem to tamchu Dragon to zothuple. Keme ija Tsaotsüt Suak ikhama thom ang müntomüi.”

⁸ Idaile hwome Filistia wanghom hwom aga pangnu hato kaxho mixbu tsanle apaole thüi: “Kwome Israel nok Zang Tsaotsüt Suak füi chemle hwonüi?” Hwome thüi: “Ija a Gath nok to paolax.” Ikhoma hwome Gath le mama Filistia tinglong tuita tüikya khato paole tox.

⁹ Ikoxlechu ija nguikya füi tomle Jowanpae ija tinglong to chuwüi sikngün fale hwom chabüt-lasün ang tom. Chixe hwom to haknüi laikya kakbu füi sikngün kox. Ija kak a mixmüi hia naosom pangwüi to tomwüi laile sikngün.

¹⁰ Ikhoma hwome ija Tsaotsüt Suak Ekron to pao. Ijachu Filistia tinglong tuita; ikoxle ija apüikya füi tomle khünaknu akhongle sop: “Hwome kem amüt angkya hanpakma ija Israel Zang Tsaotsüt Suak kem hato apüile toxle!”

¹¹ Ikhoma anaole Filistia nok wanghom hwom pangwüi hato kaxho koxle thüi: “Israel nok Zang Tsaotsüt Suak a ija bangkya khato achatle toxdao, ikoxtix wüi ijae kwom hia kwom homkhabu mik amütle münchangüi.” Zang-e hwom to sikngün apong ang tomkya khoma tingnu pangkha towüi khünaknu ang chabüt-lasünle max.

¹² Chizikyabu ang chuwüi haknüi laikya kak lai ilaxle khünaknu pangnue hwom to asun ang ma baozangbu to nyakle sop.