1 SAMUEL 4 - OTSAO BAIBEL (BSI)

Tsaotsüt Suak Kopkya

¹ Ipongma Israel nok zan to ka ang Filistia nok asox, ikhoma hwom füi azan ang Israel nokbu chuwüi lai. Israel noke hwom pom a Ebenezar ma zai ilaxle Filistia noke Afek ma zai.

² Filistia noke single hüi ilaxle tüle azongle azankya oshukma Filistia noke Israel nok to lütle Israel khünak a 4000 jao zantam ma lang.

³ Azangle paokya thom pom to nguikya zuma Israel nok lompa-e thüi: “Anyix Jowanpae kem to Filistia nok ang lüt ang büthüikoxle tompuix? Kemepi Shiloh tokya Jowanpa Tsaotsüt Suak ikhato apüihax, ikoxle tix chix füi tomle zan to kalaxle zan chak tokya kem khosünle naxchang.”

⁴ Ikhoma hwome kaxho mixbu awünle Shiloh tokya Jowanpa Tsaotsüt Suak ikhato apüi. Jowanpa a ozang füikya zünmok ding ma thungle tüikya. Ilaxle Eli sasün Hofni hia Finehas hokhi ija Suak füi tomle ka.

⁵ Chemtue ija Tsaotsüt Suak ikha alople apüipuix, Israel khünakbu ang huanuma mongmüi laxle chaxwan achenle akhong.

⁶ Ija akhongkya zing atatlaxle Filistia noke thüi: “Ibri nokbu pom to huanuma akhongkya zing apalax! Chem hanpak ang ipongpongle akhongpuix?” Chemtue hwom, Ibri nok pom to Tsaotsüt Suak katle tüikya hwome awanle lax,

⁷ hwom tüle za ilaxle thüi: “Hwom pom to pi baozangbu nguikya changa! Kempi maxkya changa! Iningle kem to tümachangtox!

⁸ Ibu tsak-zong füikya baozangbu chak tokya kem owae azünüi? Ibu a sak-hax to Ijip nok langle awütkya baozangbu changle!

⁹ Taxza, Filistia noknu! Lüka ningle azanhüi chichang thüiningle keme anyix hwom kem da ang thompupule kem a hwom da ang achangüi changa. Idaile lüka ningle azanhüi!”

¹⁰ Filistia nok zongbakle azan ilaxle Israel nok to lüt. Israel nokbu a ma homchi to alüile zikle chat. 30, 000 Israel nok süpahibue mik max angkya atak.

¹¹ Jowanpa Tsaotsüt Suak hwome kop, ilaxle Eli sasün Hopni hia Finehas, hokhi pangnyi wüi lang.

Eli Zikya

¹² Benjamin homjen angkya mixsün tuita ija nyixnyix wüi zantam tokya chatle Shiloh to ngui. Chix mong makya aho ang, chixe chix nyi akyet ilaxle khang to haxkhix füi fu.

¹³ Eli. Owae Tsaotsüt Suak bama tsingsele mongtsu laxle lomzui ma tüntongkho ma thung laxle akhinle hule ngokya. Ija mixsüne ija kaxho tinglong pangkha towüi apuk, ilaxle khünaknu pangwüi abanle sop.

¹⁴ Eli-e ibu ozing atatle lax ilaxle atüi: “Ibu a chem hanpak ang azingpu?” Ija mixsün nonokhaile hüilaxle Eli hama ibu kaxho apuale kox.

¹⁵ (Eli a 98 zanglao nguile mike ojao chingünle azupa tuita changkya.)

¹⁶ Ija mixsüne thüi: “Ku a zantam tokya azangle paolaxle anyixnyix wüi ikha alople nguikya changpu.” Eli-e chix ma atüi: “Ku sasün nyi chemle changün?”

¹⁷ Kaxho mixe lan: “Israel nok a Filistia nok thoto azutle paobaküna. Izuma kem to ziamale jao lütle! Iboma hünsa Hopni hia Finehas nyi pangnyi wüi langdaoa, ilaxle Jowanpa Tsaotsüt Suak chuwüi hwome kopdaoa!”

¹⁸ Chemtue ija mixsüne Jowanpa Tsaotsüt Suak Filistia nok chak to dongdaoale thüipuix, Eli a chix ngwotnui angkya nuakfüi chito nguak. Chix a müimamale azupu ibomachu pangnu shoma athütle nguakkya zuma ngom pak, ilaxle chix a ikhama pan ma zi. Chixe Israel nok zanglao 40 azüi.

Finehas-e Dantoxkya Thanucha Zikya

¹⁹ Eli nomcha, Finehas kakonu a nao ngüntu nguile tüikya. Jowanpa Tsaotsüt Suak Filistia nok chak to dongkya, hohopa zikya hia she kakopa mik maxkya, ibu kaxho atatkya füi tomle she ang nao ngün angkya wok-kakle nao ngün.

²⁰ She zikoxlaxle maxpongma, she to humele ngokya mixchae thüi: “Mong chonglax! Nange lüka naosa puxdaoa!” ikoxlechu she-e ija kax to chiapa tamchu kax to lanle chichang.

²¹ She-e ija nao ang Ikabod thüikoxle “Zang fuazangkyae Israel nok danle toxdaoa” lükya tsyento mün ija nao ang mün kox; chemthüikoxle Jowanpa Tsaotsüt Suak nang amütdao, hohopa nang zidao ilaxle she kakopa nang zan to maxdao, ibu pangwüi to saile amün.

²² She-e “Zang fuazangkyae Israel nok dantoxdaoa”, le thüikya a:Jowanpa Tsaotsüt Suak amütkya to saikya changle.