1 SAMUEL 3 - OTSAO BAIBEL (BSI)

Samuel hato Jowanpa Ngai

¹ Ipongma naosa Samuel-e Eli-e adangle fakya ningle Jowanpa thothale tüipongma, Jowanpa tokhange kaxho muapong wüi tüikya, ilaxle chix makhange mikza ma ngünkyachu tamtampong wüi changkya.

² Jata, Eli, owa owüiole mik apwomle changünpuix, chix a chix nui ma jiple ngokya;

³ Samuel a Zangshwom-Hom, Jowanpa Tsaotsüt Suak thomkya khama jiple tüikya. Zangngaiüi thothoma, wüntikchu ma amütba,

⁴ Jowanpae Samuel nyak. Chixe lan: “Alixachong, ku ikhama tüile!”

⁵ Chix Eli hato zikle nguilaxle atüi: “Nange nyakkya ku ikhama, hüile ngoüna.” Ikoxle Eli-e lan: “Kue nang chinyak-khato; chatlax ilaxle jiple ngodao.” Ikhoma Samuel a chatlaxle jiple ngo.

^6-7 Jowanpae anaole chuwüi Samuel nyak. Naosae ija a Jowanpae nyakpule chitsing, chemthüikoxle ithoma Jowanpae chix füi zangwünle machang. Ikhoma chix zolaxle Eli hato hüile atüi: “Nange nyakle ngokya ku hüiüna.” Ikoxle Eli-e lan: “Ku sasün, kue nang chinyak-khato; chatlaxle jiple ngodao.”

⁸ Othom azom lükya Jowanpae Samuel nyak; chix zo ilaxle Eli hato nguilaxle thüi: “Nange nyakkya ku ikhama tüile.” Izuma Eli-e naosa nyakle ngokya a Jowanpa wüi changpule awanle lax,

⁹ ikhoma chixe naosa ang thüi: “Chatle jipngoün; ilaxle chixe anaole nang nyakle jangchang, ‘Jowanpa akaxhüi, nang dapa kue apa ngole’ le thüilax.” Ikhoma Samuel a chatlaxle jiple ngo.

¹⁰ Jowanpa ikhato ngui, ilaxle ima ajong laxle ami nyakkya ningle wüi: “Samuel! Samuel!”, le nyak! Samuel-e-e lan: “Akax hüi; nang dapa kue apa ngole.”

¹¹ Jowanpae chix ang thüi: “Alüile chingo homtoxle kue Israel khünaknu to tütali tümoküi ilaxle ija atatkya khünak pangwüi khosamle changüi.

¹² Ija nyix, owang makhange oshuk kople, ku a Eli hwom kako zan to ka angkya changle.

¹³ Kue iwüiole chix füi akaxdaoa. Kue oshuk alople hwom homkha to sikangün angkya changle chemthüikoxle sasün hwome ku bama tsaima-kaxshix komle akaxdaoa. Hwome ibu ile mokle ngokya Eli-e awan ngopu, ikoxlechu chixe hwom to münte.

¹⁴ Ikhoma kue Eli hwom homkha ang thüipu, tütaningkya töbu koxle changkoxchu hwome mokdaokya ochaxbu khoma hwome apong angkya thama achatle lax ang müntsuak.”

¹⁵ Samuel a swomsa kople lyakho ma wüi ngo; ifüima chix zo ilaxle Jowanpa hom angkya kabu dap. Chixe ngünkya mikngün-ohün bama chixe Eli hama wün ang zale ngo.

¹⁶ Eli-e chix nyakle thüi: “Samuel, kusa!” Samuel-e lan: “Ku ikhama tüile.”

¹⁷ Eli-e atüi: “Jowanpae nang füi chempangle akaxpu? Ku pomtho ma chemchu taxpyen. Chixe akaxkya kax bakle ku hama chiwün jangthüi kue nang to oziamale sikangün angkya changle.”

¹⁸ Ikhoma Samuel-e chix hama pangwüi wünle kox; chiwün homle chemchu chitox. Eli-e thüi: “Chix a Jowanpa changpu; chix zongto chem müipuix ija chixe chimok homle chitoxüi.”

¹⁹ Ile Samuel tsongle hüikya zuma, Jowanpa a chix füi tüile ngokya ilaxle Samuel-e akaxkax pangwüi changle ngai ang kox.

²⁰ Ikhoma Israel khünaknu pangwüi, onok kaochi makhange kaochi alople, Samuel a otsing tomtata ma Jowanpa aje tuita changpule tsingle lax ang kop.

²¹ Chizakle Jowanpae Shiloh ma chix ngaile aho ang süt. Ijakha a chixe Samuel hato chix ngaile aho tamchu chix füi zangwünle changkya nui changkya. Ilaxle chemtue Samuel-e zangwünüihex, Israel khünak noknusae apa.