1 SAMUEL 27 - OTSAO BAIBEL (BSI)

Filistia Nok Khato Dawid

¹ Dawid-e chix mongto alüile ajangle lax: “Sol-e ku a ibama tütangai thüichu lang angkya changa. Ku zongto sümüikya a Filistia nok to paole azang angkya wüi changle. Ifüima Israel haxtok ma Sol-e ku lomkya zakle shuüi ilaxle ku a azangle ngoüi.”

² Ikhoma Dawid hia chix khünak 600 pangwüi Maok sasün Akish, Gath nok wanghom hato pao.

³ Dawid hia chix khünakbu Gath ma wanghom hwom homkha füi tomle ngo. Dawid füi tomle chix kakonu anyi, Jezril angkya Ahinoam ilaxle Karmel nok angkya Nabal-e dantoxkya thanucha Abigail hokhi tüikya.

⁴ Chemtue Sol-e Dawid a Gath to paoünatale atatpuix, chixe atumle ngokya dan.

⁵ Dawid-e Akish ang thüi: “Nang ku zuikhui jangchang, kwom ngo ang hidaoküsa tinglong tuita fahüi. Ku nang füi tomle pongwün tingnu ma ngo angkya mwot chemtüi!”

⁶ Ikhoma Akish-e chix ang Ziklag tinglong kox, ikhoma Ziklag a othuithuima Judah nok wanghom kux ang changle hüi.

⁷ Dawid a Filistia nok chaxwan to lyetjang 16 ngole hüi.

⁸ Ituke Dawid hia chix khünakbu Geshur, Girzi hia Amalek, kai to khange wüi ikhato ngole hüikya nokpubu to single hwom tingtak. Chixe ibu haxtok, Ijip nok lomjang fole Shur alople tsui, ibu angkya tuinabu lax.

⁹ Hwome sheko-lüka, mixnu-naosa bakle lang ilaxle chun, maihu, mantsak, ut hia nyi-za ibu to lünle tsui pao, ilaxle chix Akish hato chat.

¹⁰ Akish-e atüi: “Izuma ma a ochichi tsui ang paolaxle ngui?” Dawid-e lan: “Shuathongchi Judah haxsüt chichangba Jerahmel saxthombu ngole tüikya haxsüt chichangba Kin nok ngole tüikya haxsüt tsuipu.”

¹¹ Dawid-e chixe hwom khünak to single changkya bama Gath to nguilaxle kaxwün wangle chichang angkya hanpakma, sheko-lüka pangwüi tuita chitoxle lang. Filistia nok ma ngokya tuktuk ma Dawid-e ilele wüi mokle ngo.

¹² Ikoxlechu Akish-e Dawid to mongong ilaxle chix füi alüile akax: “Chix khünak Israel noke Dawid to müimama lüwüi khaxkya changa, ikhoma athaxpi jento chixe ku thothale ngo angkya changüi.”