1 SAMUEL 26 - OTSAO BAIBEL (BSI)

Tamchatle chuwüi Dawid-e Sol Chilangle Dantox

¹ Zif nok züizüi Sol hato Gibeah to ngui ilaxle Judah angkya Hachilah Faonu chamtua ma Dawid azwonle ngokya wünle kox.

² Israel haxtok angkya süpahi sümüimüi 3000 tukux koplaxle Dawid lom ang Sol a Zif Faonu to ka,

³ ilaxle chixe Hachilah faonu to lekya lomnu ma pom zaile athong. Dawid a ipongma chu ija faonu ma wüi tüikya, ikoxle chix lom ang Sol nguile tüikya zing atat ang kopkya zuma,

⁴ chixe zyetmixbu tsanle apao ilaxle otsingtomtata ma Sol ikhama tüikya atakle tox.

⁵ Chix akhangle paolaxle Sol hia Nar sasün Abnar, chix süpahi lompa hokhi ojongma pompuix, ija to hule tox. Sol a pom hommong khama jip ikoxle chix khünakbu a ija akhople pomzai laxle ngo.

⁶ Ifüima Dawid-e Hit nok Ahimelek hia Joap tuita-naopa Abisai (Hwom honu a Zarüiah changkya) hwom ma atüi: “Sol pom to ku füito hünkhi opupu dongüi?” Abisai-e lan: “Ku dongüi.”

⁷ Idaile ija wün Dawid hia Abisai nyi Sol pom to nop. Sol ang osungkha angkya pom ma, khangkho ma pax pütlaxle jiple tüikya. Abnar hia süpahibu a chix akhople jiple tüikya.

⁸ Abisai-e Dawid ang thüi: “Apa, Zang-e nang zanpa nang chak to koxdaoa. Kue chix pax füi wüi chix to hax ma adangle tople amyen fang, obiobi ma topngo angkya münchang ikoxle tamfang ma wüi tsuaküi.”

⁹ Ikoxle Dawid-e thüi: “Nange chix to chakmokle münchangüi! Chixe kamle kopkya wanghompa to chakmokle changkya khünak to Zang-e sikngün ang tomüi.

¹⁰ Kue ozün ma tüikya Jowanpa mün ma thüipu, zikmüi-kualo ma wüi changlax chichangba zanhok ma wüi changlax, Sol a Jowanpa chak fang ma tix lam angkya changle.

¹¹ Chixe wanghompa ang zünle kopkya khünak to kue chakmok-janlangle chang angkya Jowanpae ku abaxhüi! Kemepi chix paxlo hia tipe lanlan laxlax toxhax.”

¹² Ikhoma Dawid-e Sol khangkho zui ma tüikya chix paxlo hia tipe koplaxle Abisai hokhi ikha angkya laile pao. Owaechu ija chingün tamchu awan ang chikop ikhoma hwom owachu chizo; hwom pangwüi mikngüt khaxle jiple ngo, chemthüikoxle Jowanpae hwom pangwüi to zan-o tule mikngüt hüi ang tom.

¹³ Ifüima Dawid a tüchikao to tale lelaxle haxnukho to achuak koxle chialop tangle atsaile pao,

¹⁴ ilaxle eto khange Sol süpahibu hia Abnar hwom nyakle akhong: “Abnar! Nange ku zing atatcha hex?” Abnar-e atüi: “Ija wanghompa jip azwotle akhong ngokya mix owahex?”

¹⁵ Dawid-e lan: “Abnar, Israel haxtok ma nang achongkya khünak tuita münchang hia? Jangchang thüiba nange ma wanghompa kho büthüikoxle chiapapu? Athax ile pom to hünzom wanghompa lang ang dongle toxdaoa.

¹⁶ Nange nang mwotlom ma thaidaoa, Abnar! Kue ozün ma tüikya Zang mün ma tsaosaxle akaxpu, hünzom zompu-zangpabu pangwüi mik amütfang changkya, chemthüikoxle hünzome ma wanghompa kho awa ang chitho. Chix a Jowanpae wanghom ang kamle kopkya khünak tuita changpu. Hunohu! Wanghompa paxlo ojonghex? Chix khangkho angkya tipe ojongto tüi?”

¹⁷ Sol-e Dawid ding-zak awanle lax ilaxle thüi: “Dawid, kusa, ija nang hia?” Dawid-e lan: “Wanghompa, changle ija ku a.”

¹⁸ Anaole chu chizakle chixe thüi: “Nange ku athax kople büthüikoxle achuale ngopu? Ku a tuita nang dapa münchang hia? Kue chem zia amadaopu? Kue chem mütkopkya tüidaopu?

¹⁹ Wanghompa, kue akaxse ku kax to tam apahüi. Nang ku zongto zan ang achangle paokya Zang tokhange jangchang, tö koxkya makhange chix mong alüix ang tsuaküi, ikoxle khünakbue alop-alüikya jangchang, Jowanpa thuakzom hwom hato naxhüikox, chemthüikoxle Jowanpa haxtok angkya hwome ku mixnok chaxwan to jwonle apaopu, ilaxle mixnok baozangbu to shwom angkya chifün ma ku asam thompu.

²⁰ Ku a mixnok chaxwan to Jowanpa füi atsaile lang ang taxtom. Ku ningkya hitsik lang ang Israel nok wanghompa büthüikoxle ahüipu? Chixe ku, fao-osa atumkya ningle büthüikoxle atum ang tompu?”

²¹ Sol-e lan: “Ku thaidaoa, Dawid, kusa; nang chat-hüi! Kue nang to otuechu chakmok-janlangle münchangpu, chemthüikoxle awün nange ku lang tsuakse pa khosünpu. Ku a müimamale ngadaoa! Kue tüle oma-oshix mwot chimokfang mokle jao changdaoa!”

²² Dawid-e lan: “Wanghompa, nang paxlo ikhama tüile. Nang khünak tuita ahüilaxle ija paolax.

²³ Mongong füi tüikya hia otsao khünakbu ang Jowanpae hingho fale. Anyix chixe nang ku chak to koxpu, ikoxlechu kue nang to chemchu chithüi: chemthüikoxle nang a tuita Jowanpae zingkya wanghompa changle.

²⁴ Kue anyix nang chilangle chemle azünpuix, ilailaile Jowanpae zikmüt-mangkho pangnu chak tokya ku khosünle thom hüi.”

²⁵ Sol-e Dawid ang thüi: “Zang-e nang to mohimanle naxchang, Ku sasün! Nang mwottho pangnu ma nange naxtho naxlün!” Ilaxle Dawid chix lom to pao üntoxle Sol a hom to chat.